以前陀第一胎，因為懶，一個產前講座都冇報。第二胎，因為湊住大仔，又冇時間去講座。到今胎，兩個小朋友大了，時間多了，就報幾場講座聽吓，update 一下自己嘅育兒知識，話晒對上果胎已經 6 年前，要溫故知新。 呢個星期，分別參加了 美素佳兒 Friso 及 美贊臣 Enfinitas 產前工作坊。因為兩個都係工作坊/實習坊形式，所以兩者都主要比爸爸媽媽動手實習，唔會排排坐係度齋聽。   首先分享「Friso 美素佳兒產前實習坊」，於金域假日酒店舉行。 入到會場，一圍圍圓枱咁坐，每張枱都準備了幾個 BB 公仔、紗巾、薄紗包被、綿花。 先由營養師分享懷孕飲食資訊，例如講講有咩食物會令血糖上升太快，有咩食物多 DHA 等等。期間，亦有工作人員派媽咪奶粉比大家試飲。 講解途中，有互動環節，大家可以用電話登入網頁，參與即時投票、問答遊戲，仲可以用手機發問問題，營養師會即時睇到，即時解答。多咗互動，爸爸媽媽就唔會聽到瞌眼瞓啦。 接住，就由護士教大家點樣幫 BB 洗頭、沖涼、換片、掃風、洗面等等，準爸媽就用面前嘅 BB 實習一番。對於我同老公，難道不大，好彩仍然有 6 年前嘅記憶。 最後，臨走時就係禮物時間，美素佳兒送出每位媽媽一個三角枕、育兒書、媽咪奶粉試用裝。我最鍾意個三角枕，尤其宜家肚肚愈來愈大，側睡時非常需要枕頭支撐。第日細佬出世又可以比佢用。老公話仲可以比佢用來踱腳。   至於「美贊臣 Enfinitas 育兒護理工作坊」，於美麗華酒店舉行。到達會場後，工作人員會派枱號卡，同 Friso 一我樣都係坐圓枱。仲會派藻油 DHA 試食，同埋小甜品 -- 係用安嬰媽媽A+奶粉製成嘅十勝紅豆燉奶，正好啱晒孕媽咪做早上嘅小食。 美贊臣請咗伍文生做主持，講嘢生動有趣，冇悶場。先由註冊護士及助產士簡單講講初生兒嘅護理知識，例如頭幾天嘅糞便的正常顏色、小便量、䐭帶護理、掃風，又特別示範企係度掃風嘅抱法。 接住，實戰時間，大家嘗試幫 BB 換片、沖涼、換衫。同時，在場多位陪月姨姨，會行過黎提點同幫忙，有唔明可以即刻問姨姨。 場內仲可以用優惠價 $100購買原價 $268 媽媽藻油 DHA。禮物方面，最吸引係張薄包被同埋和尚袍，啱晒我10月生產，天氣唔太凍，涼涼爽爽嘅時候用。