20190830 第26日人仔 晞晞竟然有咳同痰聲， 初生bb正常唔應該會自己病， 因為佢哋係母體出黎個時有抗體保護住， 穩陣起見我帶咗佢去 睇醫生，睇反軒軒平時睇開個位。 因為實在太細初生bb， 所以醫生都唔會開藥， 幫佢檢查聽一聽心肺， 檢查下 口仔鼻仔耳仔，個肺聽落都清， 喉嚨冇紅冇發炎， 都係有啲鼻水鼻塞聲， 醫生話可以幫佢拎啲生理鹽水滴下鼻同吸下鼻， 都係要靠佢自己身體打仗去慢慢好返。 檢查過後知道佢心肺無問題都好啲。 點知到夜晚七點幾開始， 直到凌晨兩點左右， 就算抱住佢都係咁喊係咁扭計， 佢完全瞓得唔好， 中間keep住探熱都冇事， 所以我怕佢唔知係咪有咩好辛苦但佢又唔識講 去到凌晨兩點， 我同老公抱佢都覺得好熱，額探37.6， 我哋決定帶佢去睇急症。 20190831 第27日人仔 大約凌晨兩點八去到北區醫院急症室， 用晞晞出世紙登記， 好彩呢個時候 急症室得幾個人等， 登記完去護士站 量血壓探熱問返情況， 呢個時候姐姐幫佢耳探37.7， 姑娘都有話因為bb關係會快少少睇佢。 果然等咗一陣間就已經叫名入房， 入到去醫生都係先幫佢檢查一下， 因為咁細個bb有37.7少少低燒， 醫生建議入院， 因為北區醫院冇兒科， 所以要等白車車我哋去大埔那打素， 我哋有問過可唔可以去沙田威爾斯，但 醫生話只係可以安排到去那打素， 然後叫我哋帶bb去照x光照下個肺， 去到x光部由我抱住細佬入去照， 入面好大間房一張床係中間， 冷氣仲好凍添， bb瞓喺張床度幫佢解開啲衫， 我再捉住佢兩隻手仔放低唔好畀佢喐， 好快兩分鐘都唔使就照完。 然後返返去搵姑娘， 去咗個入院等候區度等白車， 大概三點八我地就上車去大埔那打素。 急症室等咗一陣就有人帶上病房，4樓e4兒童及青少年病房， 呢邊好似係發燒病房黎。 入去診症室等姑娘問下症， 幫佢再量下體重量下血壓身高， 點知黎到呢邊姐姐幫佢腋探，37.1度， 咁即係到底細佬有冇發燒㗎 過咗一陣有個應該係houseman入嚟問下症檢查下， 再過多一陣就有主診醫生黎睇細佬。 循例都係做番個啲一模一樣嘅野先， 不過主診醫生好好人， 我哋有咩問題都會細心解答 而佢都有同我哋講， bb無論係額頭探熱或者耳仔探熱都係唔準， 要腋探先係最準， 所以到底細佬有冇發燒過， 呢樣真係好尷尬 好難搞清楚， 因為 北區醫院 係用耳探， 那打素就係用腋探。 另一樣主診醫生話原來bb照x光係唔準確， 因為正常個肺照x光係要深呼吸 忍住一道氣先照 咁就最準確， 但因為bb未識得咁樣做，所以其實照出嚟會唔準， 不過初步就咁睇x光片 就冇明顯嘅肺炎等等。 問及痰聲同埋咳會點處理， 醫生都係話因為太細唔會開藥， 要靠佢自己身體打仗， 同時醫生知道佢係全人奶bb， 都叫我繼續keep住餵母乳畀抗體佢。 我都有問醫生大概呢場仗會打幾耐， 醫生話都要大約一星期。 雖然晞晞係初生嬰兒， 但因為佢有咳， 同埋懷疑曾經發燒， 所以冇得入住新生嬰兒病房（ 即係瞓箱仔嗰啲）， 要入住兒童及青少年病房，所以亦唔會有姑娘24小時可以照顧到佢， 於是要家長24小時留喺身邊照顧佢， 當然呢個任務就由我嚟負責。 安排咗病床之後， 細佬就被帶走去抽血同埋貼尿袋留小便，而我地就留係病床等佢番黎，由於距離都幾近，所以隔住門我地都聽到細佬嘅喊聲呢度一間房5張床， 好闊落，只得我地同另一位bb，入面有埋廁所有得沖涼。 搞掂哂朝早六點幾老公就搭的士番屋企訓番幾個中先， 我就展開留低係醫院照顧細佬嘅任務。 早上9點幾， 主診醫生再黎左巡房，然後細佬又被叫左入間房抽鼻水驗，我又係門外聽到佢嘅喊聲 主診醫生巡完房之後， 隔一陣佢會再同另一位高級兒科醫生再巡多次房。 到十二點幾老公過嚟我就落樓下餐廳大家樂食野， 因為陪伴嗰位家長係唔可以喺房入面食野， 外面走廊都有一兩張枱， 因為可以有人24小時留喺度陪伴， 所以隨時都可以換家長入去不過只限一位， 至於其他親戚要嚟探病， 就跟返兩個探病時間。 期間醫生開咗生理鹽水畀佢滴鼻， 會有姑娘定時過嚟幫佢滴， 等佢鼻仔可以舒服啲。 下午三點幾， 有姑娘嚟話因為細佬佢都keep住幾次幫佢探熱都冇發燒， 所以可以轉去一個普通病房觀察， 轉去f4病房， 嗰邊同樣都係一個大病房入面仲有接近十間房， 而我哋嗰間房有四張床， 住滿曬， 有一間洗手間同一間沖涼。 六點幾老公嚟咗我又落去大家樂食飯 如是者我食完飯上番去老公坐多陣都返屋企陪軒軒， 有姑娘透露， 話主診醫生講低咗， 如果細佬今晚都冇事嘅話聽日如無意外可以出院， 不過因為聽日係星期日嘅關係， 主診醫生係唔會嚟。 夜晚大概十點， 留低陪瞓嗰位就可以開張梳化床出嚟瞓。 20190901 第28日人仔 朝早大概七點就要收起張床變返張梳化凳 九點幾當值醫生嚟巡房， 佢見到細佬隻眼好多分泌物， 可能係有細菌發炎， 開眼藥水幫佢滴， 係抗生素眼藥水， 所以要連續滴足七日一個療程， 另外醫生幫佢聽診， 話佢個肺都仲係有啲痰聲， 擔心會變成支氣管炎， 又話聽到細佬心臟有少少雜音， 所以幫細佬安排照個心電圖， 另外再幫佢約期照心臟超聲波。 所以佢叫細佬留院觀察多日。 過一陣有另一位高級兒科醫生 再嚟巡房， 呢個時候老公都喺度， 咁我哋就再問個位高級兒科醫生情況， 佢都話聽到心臟有少少雜音， 我哋對於呢件事覺得好奇怪， 因為一出世細佬都有係兒科打三日抗生素都冇任何醫生提過呢件事， 喺入院前我帶細佬去診所睇醫生， 醫生都冇話聽到佢有雜音， 而入院嗰日主診醫生都冇提過佢心臟有雜音。 同埋因為留喺醫院實在好難休息， 因為問過如果冇人24小時可以留喺度陪伴， 姑娘都只係會喺滴藥或者餵奶， 量體溫嗰啲時間過嚟睇佢， 留佢一個喺度實在太慘， 所以我哋幫佢申請回家渡假， 高級兒科醫生都批准咗， 咁去藥房拎埋滴鼻滴眼嘅藥水我哋就帶細佬返屋企喇。 20190902 第29日人仔 呢日早上9點前就要帶番細佬番醫院報到，好快有一位高級兒科醫生嚟巡房， 佢見細佬冇咩事都批准細佬出院， 我都有再問呢位醫生聽唔聽到佢心臟有雜音， 呢位醫生又話聽唔到 拎曬所有文件，我再落去幫細佬拎埋藥（ 醫生轉過第二種眼藥水畀佢），咁我就同細佬真正出院嚕～ 總結： 初生bb由母親體內出世 理應係有抗體保護住， 係唔會無啦啦自己病，係唔應該會病， 如果真係有病應該都係傳染。 確實今次見咗咁多位醫生， 每位醫生我都有問佢點解細佬會有咳同痰， 每位醫生都係問我一條問題， 就係屋企有冇人唔舒服， 已確實屋企係有人唔舒服！ 所以有病一定要戴口罩洗手！ 同埋儘可以都唔好接觸初生bb！ 因為bb太細唔會開藥畀佢食， 要靠自己身體打仗， 好在我餵人奶可以再畀抗體佢， 問過醫生場仗大概會打幾耐， 醫生話大概一星期， 到我出文章今日已經一星期， 確實細佬啲咳同痰已經清咗。 如果bb真係不幸發燒， 同樣都係唔會畀退燒藥， 而係入院幫佢打抗生素療程， 同埋要做一輪好詳細嘅檢查， 當中包括抽脊髓液去驗。 如果要幫bb探熱， 額頭同耳仔探都係唔準確， 最準確係腋探同肛探， 不過而家已經好少會 肛探。 聽完醫生咁講之後，細佬出咗院 我都有去買返支探熱針幫佢腋探， 然後再幫佢額頭探， 兩支探熱出嚟嘅結果相差0.6度， 額頭探嗰支係有低燒， 腋探嗰支係冇問題。 至於心臟有雜音嗰度， 喺9月4號返健康院嘅時候， 健康院醫生幫佢聽， 都話聽唔到有雜音， 因為都好多醫生講話聽唔到有， 我哋都唔太擔心， 而家就留待十一月等細佬3個月大嘅時候返去照超聲波 就應該一清二楚了。 產品試用/活動邀請/其他合作 歡迎聯絡：tanleesharon2004@yahoo.com.hk 謝謝 軒軒與小小b facebook page http://www.facebook.com/leessssfamily
