今日我好想分享一下我餵奶時遇上的問題，話說小Sheryl喺2個月零1個禮拜開始，佢食奶開始好唔合作，例如經常食幾啖就開始唔肯食，又擰開個頭又推開個樽又喊喊，次次都要同佢戰鬥好耐先至可以完成倒一餐奶，佢當時就食緊大約150ML-180ML，每次食奶都食成個幾鐘，甚至試過食2個鐘，真係少D耐性都唔得，果個時候我就上網研究下又問下朋友點解佢會咁，原來係因為佢過渡緊厭奶期，有D BB大約2-4個月會出現厭奶的情況，就係話佢開始睇得清楚周圍嘅事物，所以就產生好奇心，變得唔專心食奶，所以就唔肯食奶，網上就話一般黎講厭奶期會出現大概2星期，之後就會好番。厭奶期期間，盡可能製造一個安靜的環境俾佢食奶，唔好開電視，唔好有太多人講野同埋喺佢面前走來走去，讓佢可以專心D食奶就會好D。 可惜到左第3個幾星期，即使食奶時已經好安靜，佢理應好專心，但係佢仍然都係成日扭計唔肯食，而且奶量仲愈食愈少，由原本150ML-180ML變左好多時因係食100ML-130ML，我就開始好擔心，怕佢會跌磅，而且亦都唔明白已經咁耐了，點解佢食奶仲會食成咁… 所以我就打電話去衛生署問下D姑娘意見。我將BB嘅情況講俾姑娘知，姑娘亦好細心咁問我好多問題去了解BB嘅狀況，例如係佢食奶的次數、奶量、便便的情況、磅數、會有咩人餵佢、訓覺情況等等，最後，姑娘問左我一個問題，就係餵奶時有無”敲樽”巳嘅習慣，我就話有，其實呢個動作一開始係陪月姨姨教，佢話如果BB停左唔啜嘅時候，就敲下個樽提佢啜，所以我都有做個呢動作，而且都有教姐姐咁做。而我亦仔細咁諗番，一開始姐姐餵奶都係跟我嘅指示喺佢唔啜嘅時候敲樽提佢，但大概係1個月前，我發現姐姐開始唔係在佢唔啜時敲樽，而係由一開始飲就一直不停敲樽，即使佢啜緊都照係咁敲樽，而我又唔知原本呢個動作係會有Negative feedback，所以都無特別出聲。而姑娘就話俾我知呢個動作其實對於BB來說係即係吹佢食，而如果每次飲奶就成日吹住佢，佢就會唔開心唔鍾意，自自然然就會唔鍾意飲奶，姑娘就話唔應該做呢個動作，佢話如果BB唔啜你想提佢嘅話係可以郁下佢手仔、耳仔、扥下下巴仔咁，仲之就盡量唔好做敲樽呢個動作。 講完呢個電話之後，我就立即同屋企人溝通，亦同姐姐講以後唔好再敲樽，大家一致唔再做呢個動作，俾BB做番主導，佢想啜就啜，唔郁時輕輕郁下佢提下佢，佢扭開頭唔想食就唔再迫佢食，試左1、2日之後，情況大有改善!! 小Sheryl而家次次都一次過/最多分2次食完支奶，唔再扭好多計，有時佢食唔晒支奶扭開個頭我地就停止，咁樣做之後唔單止佢食快左好多，而且仲食番多左，而家係10分鐘已食完150ML一次過，我覺得好感動… 有關奶量方面，姑娘就話其實BB愈大就唔代表佢就會食多左，而其實係按佢需要的，佢簡單咁解釋俾我知就話，可能BB一開始時佢需要好多奶量去Delevelop一舊肉，但當佢大D果時，佢只需要少量D嘅奶去Develop同一舊肉，即係唔係話愈大就需要更多奶，而其實係睇番BB嘅需要，佢夠就會停，唔夠就會話你知佢肚餓要食。所以如果佢需求少左食少左係唔出奇，只係按佢所需的。 我好開心我打左呢個電話，果位姑娘真係幫倒我，其實每位BB都唔一樣，每位媽媽可能都會遇到唔同的情況，如果媽媽在湊BB時遇上困難，真係可以打下呢個電話問人專人意見，睇下幫唔幫倒忙喔!!~ 衛生署家庭健康服務 24小時健康資訊熱線：2112 9900 網頁: https://www.fhs.gov.hk/tc_chi/health_info/child/12146.html =============================================================== 80後手作媽媽 - Sing Ching  作為一個80後手作人媽媽，自寶寶出世後，對她穿的用的都每天學習研究，務求給寶寶最好的，也很想跟新手媽媽們分享經驗，盡力搜羅實用又靚靚的寶寶衣服和用品，以貼地價錢分享給大家！有興趣媽媽們歡迎Follow以下Facebook Page: https://www.facebook.com/bjbabyhk Follow 我們的Instagram睇更多小Sheryl的生活照啦! https://www.instagram.com/bjbabyhk/ 如有任何邀稿或產品試用，歡迎電郵聯絡: bjacchk@gmail.com