藍莓滿月啦! 第一胎選擇左喺聖保祿醫院生，而今胎就選擇左喺港怡醫院生，由每次產檢，照結構，百日咳針等都係喺港怡做哂，雖然港怡嘅普通房最多都係兩個人，本來都諗住揀普通房，但經過幾番考慮最終暖爸都係決定半私家單人房，有埋張梳化訓又得招呼朋友亦得始終方便D，唔怕嘈到人亦唔怕俾人嘈 今胎同樣地係緊急開刀，半夜突然開始覺得有唔妥，慢慢開始陣痛，到醫院已經係朝早，醫生好快就黎到，姑娘幫我準備開刀，未推入產房之前本來姑娘話因為緊急開刀嘅關係，老公係唔俾陪產，我同暖爸都有D失望，一邊痛一邊等候入手術室嘅時候，有一位手術室醫護人員突然問我係咪好想老公陪產，佢可以嘗試安排因為人手足夠就可以俾佢陪產同剪臍帶，因為佢都係人哋爸爸能夠同理到陪入產房嘅重要性，嗰一刻完全感動到想喊就係咁一邊痛住咁得到安慰話好快唔痛架啦，醫生們準備緊，老公都好快換好衫就入產房陪我！經過一輪手術後阿妹就出咗嚟見我哋啦！姑娘仲好有心機地喺產房幫我地一家三口都影咗好多張相，之後仲會送返隻碟俾我哋，觀察一陣之後就返病房，我同暖爸喺醫院嘅五日四夜之旅亦正式開始！ 港怡醫院基本上真係似一間酒店，有Shuttle bus來回海洋公園站及醫院，醫院入面亦有7–11,Pacific Coffee,原味家作,canteen,都好方便！基本上Package都已包每日嘅早、午、晚3餐，而且仲係月子餐，幾日都有不同選擇，2餸1湯，仲有甜品同飲品，味道都唔錯。半夜餓都仲可以叫野食！房間隔音都好好，完全唔會被外面聲音嘈到！產科姑娘同BB房姑娘都好好，好有耐性，而且仲好支持餵母乳！ 港怡醫院嘅package除咗一般私家醫院都有嘅嘢之外，佢哋仲會有7人車出院接送服務，送BB生日蛋糕同一D小禮物總括來講真係要好好珍惜係醫院隨時有人幫忙嘅五日，好好地盡快復原回家繼續作戰