石垣親子旅行2019～DAY1:美崎牛燒肉、入住ART HOTEL、BIRTHDAY、舟藏之里居酒屋，驚安DONKI行街 出到機場大概係日本時間11點3，因為廉航無野食提供，所以肚已經開始餓，拎咗車就出發去食美崎牛燒肉，聽說美崎牛仲矜貴過石垣牛架！ 美崎牛燒肉 由機場出發，揸咗大概15分鐘車就到（事前我去佢facebook專頁訂枱）一場黎到，坐低就叫咗最貴嘅8千同6千yen嘅set試，lunch係包埋任添白飯，泡菜，湯～嘩！呢度係真炭燒，特別正，啲牛肉好好食，好好味呀，雖然我地已經食過好多唔同地區嘅和牛，但覺得美崎牛真係好味，肉味濃得黎又溶，我地係好鐘意食好肥好香嘅肉！佢唔會得個溶字而無肉味，平時唔好白飯嘅我仲送咗好多白飯一齊食，停唔到口，啲汁又係好好味！簡直念念不忘！就連貝貝一路食都一路好滿意，平時佢都食好少飯！但佢自己坐喺度都食咗好多，仲食咗好多牛肉！細個已經食咁多好野，大個點算，哈哈！不過呢間真係值得encore!大推～ Facebook 專頁：美崎牛本店・炭火焼肉misaki 電話: +81 980-87-0575 ▲就算同行親友唔食牛肉，餐牌都仲有豬肉，雞肉選擇，不過味道如何我就唔知啦～ ▲貝貝自己揭餐牌睇下有咩好野食先！ ▲呢set就係8000yen，超正的！ ▲最右邊有粒檸檬果兩件係厚燒牛舌，不過佢產地唔係美崎，但都好正架！ ▲依家唔係得返好多地方保留炭爐燒架嗱，但用炭燒真係特別好味架！ ▲呢個就係6000yen，味道都好好架！尤其係右上果幾粒牛肉粒！入口即溶，意想不到的好味！ ▲貝貝都話正呀！ ▲佢食咗超多飯！！ Art hotel，birthday母嬰店 由餐廳返art hotel都只係兩分鐘車程，住呢間酒店好方便，我安排嘅行程都唔會離酒店好遠，最遠都係揸20分鐘左右，除非兜錯路啦！酒店都非常近食飯行街嘅地方，呢間酒店好方便好易搵，我地訂咗superior twin，房都幾大，我地揀咗兩張雙人床可以泊埋一齊，變到超大超大床！我地3個一齊瞓，全晚都可以掂唔到對方，貝貝終於舒服到可以一覺瞓天光！其實如果泊埋兩張床，大家又可以痴埋瞓嘅話，都可以瞓到4－5個大人，佢另外仲有張梳化床都可以瞓到1個大人，不過感覺就污漕啲咁。同埋廁所細啲同埋成日覺得廁所有陣味，房間入面有清新機不過好似無咩用，有泳池（我地無去，睇相仲有sir滑梯），有大浴場，超正！（男女分開，無得著衫嘅，夜晚我同貝爸輪流去浸，因為怕貝貝熱所以無帶佢去，浸完直接喺入面沖埋涼先上房，省時又有得嘆下！） 由於早機嘅關係，貝爸同貝貝喺酒店等我執野嘅期間瞓著咗！一瞓仲瞓到差不多5點，無咗半日行程，所以大家有心理準備，真係有機會攰到無咗半日行程，咁等佢地瞓完，唯有去birthday行陣再去dinner！自從有小朋友，依家每次去日本都超期待行birthday掃bb衫同日用品，點知平時我買開果個牌子嘅冬天衫，已經無乜90-100碼嘅衫買，原來bb大個咗，啲款真係會少咗選擇！ 最好買都係初生階段同7-80碼，最多最靚最齊！今次去birthday係買得最少野嘅一次唯有再等去西松屋睇下有無野啱！ art hotel 官方網頁：art hotel ishigakijima 電話： 0980-83-3311 birthday母嬰店電話：0980－88－1755 ▲酒店免費提供bb床，不過張床都幾細張，好似係90cm長，貝貝都仲訓到。我都強烈建議帶bb去嘅媽媽，點都request咗bb床先，就算未必諗住俾bb床佢瞓，但如果小朋友仲係學行階段，好易碌黎碌去，咁你有咩事行開行埋執野，都可以放佢落bb床自己玩住先，唔洗下下跟實看住佢。 ▲本黎同貝貝換好晒泳衣，諗住爸爸一瞓醒就去游水，但貝貝等爸爸等到自己都瞓咗～ ▲我地張床太舒服嘅關係，貝貝瞓咗一兩次bb床之後，晚晚都係痴實我地瞓。 ▲媽媽必逛birthday母嬰店，啲衫好靚，超好買的，仲有好多日用品！ 舟藏之里居酒屋 呢間我事先搵visa白金秘書服務(廣東話：800900781)訂枱，只要有visa白金信用卡，查定餐廳電話，提供個人資料，就可以叫秘書幫手訂枱，非常方便！ 去到門口已經非常有鄉土風味，係非常傳統嘅木屋，可以坐塌塌米或者坐櫈，如果有特別要求記得訂枱時講，我地有bb，佢又坐唔定，所以佢坐bb櫈會適合啲。野食我地叫咗傳統料理，一set已經好多野食，味道幾好，特別過沖繩菜，魚生都幾喜出望外，因為沖繩果啲魚生都麻麻地。另外仲追加咗海膽龍蝦，石垣牛陶板燒，墨魚汁炒飯。！我地2大1小，枱面勁多野食，但隔離枱日本人又係2大1小，全晚食得4碟野，點解我地咁大食？仲要食得晒。餐廳每晚大約8點會有歌舞表演，貝貝一聽到唱歌就超開心，發現佢好適合坐呢啲居酒屋食飯，完全融入到當地文化！有得食又有得玩！呢間餐廳整體黎講都唔錯！ 舟藏之里居酒屋 電話：0980－82－8108 ▲貝貝只係心諗，我食得未呀媽媽？ ▲食到張枱都擺唔晒 ▲海膽龍蝦，醬汁好好味，不過煮得有d老。 ▲石垣牛陶板燒，係非常非常差，可以直接skip咗唔駛叫。 ▲海葡萄，對我黎講係每次必點食物。 ▲前菜，幾好味。 ▲前菜，呢舊野唔好食。 ▲前菜，我鐘意食呢d，酸酸地好開胃。 ▲魚生，我鐘意食上面白色果舊唔知乜，有咬口，新鮮。 ▲苦瓜炒蛋，我唔食苦瓜都接受到食咗少少，幾甘，不過無乜蛋。 ▲炸魚，好難食，但set入面有，無得唔要。 ▲唔知係咪東坡肉啲朋友，我老公食咗咋，佢話唔好食。 ▲墨魚汁炒飯，好好味呀，貝貝咁潔癖竟然都唔怕黑蚊蚊，仲食咗好多。 ▲長命草冷豆腐，甜品，我唔識形容，好似雪糕，但佢只係豆腐黎...長命草味道好辛口，有啲難入口，但食咗一啖又想食第二啖。 ▲我諗貝貝唔敢相信，佢呢刻個嘴係黑色的。 ▲我見到佢咁樣，我都覺得好得人驚，哈哈哈。好彩隔一陣，啲黑色無晒，都好易抹。 ▲一聽到有人唱歌，就勁興奮要拍手。 ▲原來仲興成間餐廳的食客一齊起身跳舞～ ▲貝貝好用心學～ ▲心情好好的貝貝～ 驚安Donki （營業：08:00-02:00） 去日本唔行Donki，實在好似無去過日本一樣，行donki最好係收得夜，食完dinner去到慢慢行都得，原來石垣島呢間donki係上年8月先開幕，日本一定大過香港好多好多，慢慢行都可以行粒幾鐘，貝貝有得shopping又係超興奮，成日都要走黎走去捉住佢，又唔肯坐bb車，要落車慢慢行，慢慢揀，佢咩都拎上手話要買！不斷擺野入購物車，我成日都要偷偷地擺低，激死！ 驚安Donki 電話：0980-82-0411 ▲最開心係donki，無論大人、小朋友、寵物、車野都有得揀。 ▲貝貝就係呢度買咗個小包包，好可愛。 ▲黎到日本，可能掛住自己套煮飯仔，以為呢d都係玩具。 明明食咗好多野，但行完街個老豆又話餓，但石垣好多餐廳去到21:00就準備關門，只剩返快餐店，最後爸爸食咗個mos burger宵夜成為第一日旅程嘅總結！ ▲ 貝貝唔執輸，佢都要食薯條。 下一篇會介紹第二日行程，Dolphin fantasy親親海豚之旅～公設市場～石田屋品嚐石垣牛！ 重溫： 「石垣親子旅行2019～飛機篇」： https://mamibuy.com.hk/talk/article/79460 「石垣旅行～day1：美崎牛燒肉、入住art hotel、birthday、舟藏之里居酒屋，驚安Donki行街」： https://mamibuy.com.hk/talk/article/79505 「石垣旅行～day2: 麵屋八重山style、Dolphin Fatasy親親海豚、公設市場買手信、食著名雞蛋布丁、石田屋品嚐石垣牛」： https://mamibuy.com.hk/talk/article/79684 「石垣旅行～day3: Vanilla Deli食超juicy和牛漢堡、竹富島觀光：坐水牛車、踩單車、西棧橋，kondoi beach、fusaki beach 睇消失的日落、超好氣氛嘅居酒屋「一魚一會」，coco咖喱宵夜」： https://mamibuy.com.hk/talk/article/79994 「石垣之旅～day 4: fusaki beach、雞白湯拉麵、刺激到爆炸的小朋友天地BANNA PARK，encore 美崎牛燒肉」： https://mamibuy.com.hk/talk/article/80366 1Y10M9D —————————————— 喜歡我地一家三口就follow我地啦，仲要 Set 做搶先看呀～ Facbook page: 貝貝Alice-小寶貝夢遊日記 Instagram: bowl_lam
