10月下旬去左好多個講座, 每星期都好充實! 唔講咁多開場白, 即刻睇下有咩講座!   第二十四個產前講座: 2019/10/20 Marvoto 3D超聲波胎兒見面會 (約1小時) 其實呢個唔係產前講座, 只係咁啱係網上見到呢間公司搞個BB超聲波見面會, 就報名參加. 平時只會係產檢見到BB, 個原來坊間係有超聲波儀器可以比媽媽安坐家中都可以見到BB. 去到會場首先登記, 跟住比左1條手帶我之後換禮物, 之後坐低填下form, 睇下媽媽雜誌, 大半個鐘後就入房照超聲波喇. 房入面有2個女仔, 我估應該係護士實習生. 同普通產檢一樣, 搽D啫喱係肚皮就照得. 因為BB用手仔遮左面, 所以今次睇唔到4D. 照左3-4分鐘就照完出去lu. 照完就用手帶去拎禮物喇~ 呢個儀器有2D同4D, 用apps連接就可以透過電話見到BB喇. 不過當然唔能夠同醫院診所嗰D相比喇, 而且畫面都有1-2秒delay. 而照的過程中可以係電話cap相保存. 現場係無人sell 呢部超聲波儀器, 真係純粹比媽媽體驗下. 大約過左1星期就有send email黎介紹返呢部儀器. 呢部機SOGO, 永安都有得賣, 不過我依家已經去到懷孕後期階段, 都唔會買呢部機lu~ 第二十五個產前講座: 2019/10/21 Cryolife 臍帶血應用&代謝病篩查講座 (約2小時) 臍帶血就聽得多, 但到底係乜東東? 講座第一部份由護士講下懷孕前中後的飲食營養資訊, 我之前已經聽過好多次, 所以知識已經非常充足! 第二部份就係主角臍帶血應用, 原來除左可以儲臍帶血, 仲可以儲臍帶, 佢地係2樣野. 臍帶血通常用係免疫系統, 而臍帶就應用係器官多. 但最最最重點一件事係, 係香港依家只有私家醫院先提供儲臍帶血/臍帶服務, 如果係公立醫院生產係無呢個選擇. 老實講, 儲臍帶血並無我想像中咁昴貴, 2萬幾蚊可以儲18年, 之後可以續約. 而且臍帶血除左可以BB本身合用, 仲有50%機會父母同25%兄弟姐妹都合用, 真係一個救全家. 如果係私家醫院生產的媽媽真係可以了解下. 第三部份係講代謝病篩查, 呢個就個個BB都啱用. 依家香港只有幾間醫院提供初生嬰兒篩查先天性代謝病服務, 而且種類只有廿幾種. 係香港新生嬰兒患有代謝病的機率其實唔低, 大約1700個就有1個患上. 有D代謝病可以透過藥物或者食物控制去治療, 所以早D知道就可以早D準備. 呢種檢測自己出去做費用大約2千幾蚊, 而驗到的種類有百幾種, 都好值得媽媽們去了解下. 聽完D咁有用的資訊, 就可以like facebook拎小禮物走喇~ 第二十六個產前講座: 2019/10/22 敏兒安safeT21express產前講座 (約1.5小時) 呢個講座我由7月開始抽, 抽左3次終於係10月抽中. 最初我以為會講下T21的資訊, 但原來係無. 講座內容由一位婦科醫生講解分娩過程, 順產&剖腹生產的注意事項, 最後係問答環節. 之後就係抽獎活動, 如果本身係星級會員會多一次抽獎機會. 完場就排隊交問卷拎禮物走得~ 其中一份禮物係奶粉, 要去醫療中心拎, 不過間醫療中心只係開一至五,,,哈哈// 第二十七個產前講座: 2019/10/23 Kinectics母乳餵哺及疫苗小百科 (約2小時) Kinectics呢個講座我亦都係抽左3次先係10月抽得中. 講座內容分2部分, 首先係講母乳餵哺的資訊同用品, 之後就係講BB打針各種疫苗資訊. 基於我之前已經聽左一次疫苗資訊, 所以今次好清晰到底要為BB揀咩疫苗打. 本身都以為join疫苗plan係最抵, 但比較過幾間唔同醫療中心價錢, 再加埋係BB展買針優惠, 我發現分開係唔同診所打仲會化算D. 當然除左價錢, 要去唔同中心打針會唔會唔方便都係考慮之一. 完場亦都係排隊交問卷拎禮物走得~ Kinectics都係有奶粉送, 都係要一至五去拎~   第二十八個產前講座: 2019/10/25 Illumama Community 1對1營養諮詢(約1小時) 顧明思義呢個唔係講座, 同之前惠氏個營養諮詢一樣, ILLUMAMA COMMUNITY都係透過SMS報名, 所以記得要入埋佢地個媽媽會. 同埋一收到SMS就最好即刻回覆, 因為先到先得, 好快無位. 今次個諮詢係酒店舉行, 去到登記完就坐底填問卷等叫號碼, 過左大半個鐘就到我去見營養師, 都係講下D飲食習慣, 大約5分鐘完左就有袋禮物拎走, 同場仲有八珍豬腳薑卷送, 大收穫! 第二十九個產前講座: 2019/10/25 BeautyMama《新手父母必學孕婦按摩班》《BB疫苗不可不知》(約2小時) BeautyMama對上一次舉辦講座係8月, 但我嗰次抽唔中. 不過佢地好貼心, 係第二次講座舉辦前會先whatsapp比之前抽唔中的媽媽, 如果出席可以留定位. 咁我當然say Yes喇~哈哈 講座一開始就玩whatsapp抽獎, 即係鬥快send答案, 令現場氣氛都好好. 我有幸答中左一條XD. 之後就正式開始示範在家中爸爸們可以點樣幫懷孕媽媽按摩. 如果爸爸都有一齊去聽就可以現場一齊學做按摩動作, 都幾得意. 當晚得我一個, 按唔到背脊, 唯有自己同自己按下手仔喇~哈! 之後都有介紹下佢地中心的按摩服務, 同埋可以現場用優惠價$100買張coupon試做下~我都買左一張但未去試… 之後就係由另一間醫療中心講關於BB疫苗, 相比之前Kinectics的疫苗講座, 今次就講得唔算太清楚, 不過佢地個疫苗講座價比Kinectics係更優惠DD. 完場有小禮物拎走~ 第三十個產前講座: 2019/10/26 瑪麗醫院產前講座(3)~分娩的認識 (約1.5小時) 係瑪麗醫院的第三個講座, 跟返進程去到講解分娩的注意事項, 一如以往都係資訊好豐富, 好實用. 不過今次講座係無禮物的~   第三十一個產前講座: 2019/10/26 OxfordPath解構母乳形成及母乳餵哺技巧 (約1小時) 今次係小班講座, 大約得10對爸媽. 第一部分由護士講下餵母乳的好處同注意事項, 而第二部分就係OxfordPath顧問同每對爸媽講下Oxford Path呢套教材的內容. 而我本身已經聽過一次亦無買到, 所以聽完第一部分就走左lu~今次講座係無禮物的~   10月下旬衝左8個講座, 其實由8月開始都去左好多大大小小的講座, 所以黎緊11月報名的講座就會相對減少 下次分享應該要等到11月尾lu~ 多謝收看, 遲D見!   想重溫之前的媽媽講座分享可以click以下連結:- 2019年8月媽媽產前講座分享 https://mamibuy.com.hk/talk/article/77957 2019年9月媽媽產前講座分享 (上集) https://mamibuy.com.hk/talk/article/78251 2019年9月媽媽產前講座分享 (下集) https://mamibuy.com.hk/talk/article/78872 2019年10月媽媽產前講座分享 (上集) https://mamibuy.com.hk/talk/article/79198