最近同小Sheryl去街街，在街上遇到一件事，很想跟各位爸爸媽媽分享一下。 事緣就係有一位小朋友，我估佢大概6-8歲左右，在M記買左野食外賣，手拿住杯可樂好興高采烈咁諗住準備去食，點不知一唔小心甩手，成杯手上的可樂就跌左落地，當時吸引左我目光睇下發生咩事。然後，個小朋友嘅爸爸好嬲，企左喺度，用好惡的眼神厲住個小朋友，一路唔出聲，厲實佢，個小朋友個樣好驚，想喊又唔敢喊，郁都唔敢郁，個爸爸就一路企係度厲住佢，咩都唔做，完全無意識係要抹番乾淨個地下，而隔離仲有個細佬同媽媽都無出聲，全部人一起厲住個小朋友，我又留意下細佬，佢都好驚痴實呀媽唔敢郁，就係呢個定格，足足定左成10分鐘。。。然後，小朋友開始想走去呀媽度，呀媽就唔理佢，然後呀爸就開始開Turbo鬧個小朋友。。。  我真心覺得好Crazy! 心諗其實洗唔洗咁呀? 個小朋友唔係犯下離天大罪，佢只係唔小心甩手跌左杯可樂!!  當然，雖然我係好唔認同呢位爸爸點解要咁嬲，但我都唔會上前去干涉。只係，呢件事讓我反思一下，如果第日我的小朋友有咁嘅情況，咁我又會點處理呢? 其實，我覺得小朋友手仔比大人要細，亦都唔會好似大人一樣咁有力，控制得咁自如，佢地好多時拿著D野會好容易跌落地，我覺得作為家長，係先要了解呢一點，小朋友整跌野係十分普通的事，根本唔需要Angry。第二，唔好話小朋友，我地做大人有時都會唔小心整跌野，我地都會有機會會整跌杯可樂，甚至跌爆電話。。。咁大人會唔小心，小朋友都一樣會，其實個小朋友整跌左杯野飲，佢地自己都會唔開心，正如我地整跌野，都一樣會唔開心，有無必要仲要被狠狠地責備呢?  我記得小時候，應該係讀緊小學，有一次我同家人去街食野，食大排檔，食完晒野之後姑姐就帶左我地幾個小朋友去隔離間檔仔買雪糕食，好開心自己選味道，睇住個哥哥"不"杯雪糕出來，我小心咁雙手拿住，一擰轉頭準備番番自己位度，有個大人行過望唔倒我(因為太矮)，一野撞埋來，成杯雪糕跌左落地下，我望住杯雪糕，好唔開心，再望望其他小朋友已經好開心咁食緊佢地自己杯雪糕，我就眼淚直踴出來，我記得果個撞到我的人都好好人，即刻話買番俾我，但其實，我當下已經好唔開心，就算買番俾我，其實其他小朋友都已經一起食完，我就好似被可憐咁買番俾我，跟住再自己一個食。。。 其實，講左咁耐，我係想表達一樣野，雖然係小朋友，但佢地都會有感受，佢地同大人一樣，都好需要別人包容同原諒，佢地同所有人都一樣，都會有唔小心的時候，都會有做錯的時候，作為家長，我地應該耐心咁教導，學識包容同忍耐，如果你下下都嬲爆爆出來，其實同樣地，小朋友都會學你一樣，每每事情都好容易發脾氣，因為家長就係小朋友的學習對象。我係度諗，如果我第時遇上咁既事，我一定會第一時間同小朋友講:「Aiya...咁唔小心呀? 唔緊要啦! 我地一起抹番乾淨啦! 因為係我地整污衊左人地商場個地下，我地係有責任幫人清理番架! 然後，我會帶埋小朋友問餐廳職員拿野抹番地下.... 然後，如果我地買番杯新的可樂，我會教小朋友可以雙手拿住，行慢D保持平衡就唔會咁易整跌啦!」我認為每一件事都係學習的時間，如果我地整污衊左人地的地方，我地應該教小朋友一份責任感，要好好處理自己的mess。我相信咁樣做，會係一個更好的做法。 雖然，我小朋友都仲好細個，但其實我覺得我每天已經練習緊耐性。。。我個B每次飲奶都好唔合作，成日都唔肯飲，飲得好少就停，點都唔肯繼續，好多時都玩成個幾鐘，家人同姐姐都無人想餵佢，因為真係太麻煩，而我有時哄下佢，過左1個鐘之後我都會開始唔耐煩，然後我會停一停，同自己講，其實可能我自己BB既時候都係咁，都會有唔肯飲奶既時候，唔需要嬲，係好正常的事。。。然後我就會感覺好一點，繼續努力哄下佢，然後佢又合作番肯飲了! :) =============================================================== 80後手作媽媽 - Sing Ching  作為一個80後手作人媽媽，自寶寶出世後，對她穿的用的都每天學習研究，務求給寶寶最好的，也很想跟新手媽媽們分享經驗，盡力搜羅實用又靚靚的寶寶衣服和用品，以貼地價錢分享給大家！有興趣媽媽們歡迎Follow以下Facebook Page: https://www.facebook.com/bjbabyhk Follow 我們的Instagram睇更多小Sheryl的生活照啦! https://www.instagram.com/bjbabyhk/ 如有任何邀稿或產品試用，歡迎電郵聯絡: bjacchk@gmail.com