每個媽媽幫BB加固時，除左怕BB會便秘之外，更怕BB會食物過敏。   輕微既過敏都還好，但遇上嚴重既過敏就真係要提高警覺。   今次分享我第一次經歷＆處理，希望各媽媽都可以參考。   事發嗰喺上個月尾，我第一次試煮BB蔬菜麵比陳皮梅試食，當時我諗住選擇一啲成份較簡單既BB麵，可以減低發生過敏既機會。加上陳皮梅第一次食，份量都唔會太多。   陳皮梅過去係有試過2次左右既食物敏感徵狀，但都唔算嚴重，當時佢亦都無表現得唔舒服，而且好快自行痊癒，基本上即日或第二日已經好返..第一次只出輕微風癩，而第二次係嘴邊皮膚發紅＆一次嘔吐。 而今次陳皮梅基本上食左幾條BB麵，我就見到佢嘴邊皮膚有啲紅，有懷疑既時候，都會停止餵食並加以觀察。因為陳皮梅之前都試過過敏，所以我都會睇定啲再決定是否需要搵醫生。 呢一次既過敏徵狀同之前唔同，今次佢有扭計，而且風癩爆得好快同好勁，除此之外，佢成個人既皮膚都變得好紅，由頭皮紅到腳趾尾。 我眼見唔多妥，就馬上叫我老公今次要帶佢去醫院 ，感覺好唔對路。 呢到講完，陳皮梅突然放軟晒，然後開始昏睡。 一個BB正當好唔舒服喊緊既時候，佢係唔會突然間眼瞓然後瞓著...所以.....無錯....今次係過敏性休克。 腦海中浮現兩個選擇 1.call白車 2.自行飛的士去醫院 我觀察住佢呼吸正常，然後屋企距離醫院叫近，所以我選擇左第2個方法。我叮囑老公一定要拎埋包BB麵去醫院。 去醫院途中，我一見陳皮梅想瞓，我就會整醒佢，盡量唔比佢瞓，觀察住佢既呼吸....一定要佢KEEP住比反應我，途中我心諗，我唔想將我學過既CPR用喺自己個女身上，亦希望用唔著...... 到左急症室登記，登記嗰個職員話等叫名。大家都知道，急症室候診既人係有幾多，是否緊急仲要經過分流站既護士判斷，同時等緊分流既人亦都唔少。 而當時陳皮梅keep 突然昏睡既情況，我不停叫醒佢，而且佢無再喊，全身無咩力氣，我無可能再等叫名，所以我抱住陳皮梅去分流站，叫護士可唔可以睇左佢先，因為陳皮梅年紀仲細（8個月），通常都會優先處理，而且仲係食物敏感。 正如我所講，陳皮梅好快就可以安排見醫生，其間護士比左氧氣陳皮梅吸，血壓低，叫我繼續唔好比佢瞓。見到醫生時，放陳皮梅上床都係無咩特別反應，因為我已經叫唔醒佢，佢已經昏睡咁，醫生睇完資料就馬上幫陳皮梅吊藥（抗敏藥＋類固醇），叫我出房等，我同老公喺房外等，聽到陳皮梅大喊（因為被吉針) 還好，佢仲可以大喊，咁都好啲，然後護士叫我入去幫手，因為陳皮梅係咁喊同埋好驚，而且要幫佢照埋x-ray.....搞左一輪，就安排陳皮梅上病房。 其實上病房途中，陳皮梅啲風癩已經退左，但係阿女成個人仍然好紅，嘴唇好白，仲係咁震，我有問急症室醫生點解阿女會咁震，佢無發燒，係唔係因為啲藥？因為未試過咁樣，醫生話「佢可能驚.....」但我唔覺得呢個係原因。 到左病房，姑娘都見到阿女震得好勁，同埋係咁喊，叫我抱起佢，等佢唔駛咁驚，我又多口問多次姑娘 我：點解阿女咁震既？ 姑娘：等我set好啲機先，要再幫佢量血壓，量左好多次都唔太量到 等所有儀器都set好，姑娘再望一望個report, 然後再望一望阿女，見佢全個人都仲係好紅，仲係咁震，所以姑娘再call多次醫生。 我抱住阿女，突然阿女嘔左，我就同姑娘講 我：佢嘔左啲食物出黎唔係會好啲？ 姑娘：你都可以咁諗既，依家叫左醫生落黎再望下佢 醫生到左病房，邊檢查邊問情況 醫生：要再幫阿女打支針，你當係救命針，係一支腎上線針。 我聽完只要阿女好，咩針都要打 打完一支之後，姑娘A繼續留守觀察，睇左陣就話仍然唔太好，佢覺得要再打多次，但另一位姑娘B就話「咁細個會唔會太多」然後姑娘A話「你信我啦」講完就再去叫醫生，然後同我講「放心，有我地喺到，救左你個女先」.......打完第二支救命針，再睇，情況終於都有好轉.........阿女無再係咁震，而佢亦都累到昏昏入睡，當然每打一次針，佢都唔好受.....我同我老公都係..... 今次真係算叫好彩......好彩上到病房遇到細心既姑娘，觀察到阿女既情況，驚險既情況穩定左。今次係第一次經歷，少啲應變都唔得，真係執返條命。   聯絡/合作/查詢： bonbonlove2003@gmail.com   Facebook 專頁：http://www.facebook.com/陳皮梅成長記-109986377133806/