上一篇提及陳皮梅咩原因過敏＆處理，今次繼續講返留院既情況 陳皮梅因為今次食物過敏住左2日醫院，入院當晚醫生指示阿女需要禁食，所以會安排吊鹽水。 一整晚我都抱住陳皮梅，不時望下佢既情況有無好轉，到底退紅未？唇色係唔係仲係咁瘡白？因為藥力既關係，阿女都比平時熟睡，我有嘗試將阿女放落床，等自己都可以休息下，但係一放低佢就好快嚇醒，就好似剛出世既BB, 比自己既驚嚇反射嚇醒一樣，由此可見今次入院佢一定受左唔少驚嚇。所以為左等陳皮梅可以好好休息，我又再次抱起....等佢好好瞓覺。 然後我先醒起，阿女佢禁食，咁我一定會谷奶谷死（陳皮梅係屬於親餵全母乳B），而我都無準備到揼奶既野，所以我只好等我老公早上8點黎醫院先可以救我。邊忍住谷奶既不適，邊抱住成身都係儀器線既陳皮梅.....等天光。 有諗過問醫院借揼奶器，但好可惜借到都無用，因為一放低陳皮梅，佢就好快醒。 期間姑娘都定時定候幫阿女量血壓/打針......仲要幫阿女留小便（姑娘貼左尿袋）＆留濕片。 急性過敏通常都黎得快退得快，嚴重起黎亦都好易致命。最慘既係.....你未知佢對咩成份過敏。 第二朝醫生巡房，檢查完陳皮梅，見佢無再出現過敏情況，就批准佢可以飲母乳＆唔駛再吊鹽水。而最快都要聽日先可以出院。 正因為今次陳皮梅係食左一隻日本品牌既BB麵而敏感，其英文翻譯成份只有兩種 1. Wheat Flour(小麥麵粉） 2. Spinach Powder (菠菜粉) 醫生話所謂既「菠菜粉」始終係再製，唔肯定係唔係只有菠菜成份，佢地亦化驗唔到，所以仍然係一個迷。然後叫我下次支持返本地野，因為英文翻譯成份未必準確，而佢地又唔識睇日文。 基於今次嚴重過敏，出院後都需要袋住支救命針防身，而我地都要學幫陳皮梅打救命針，下次如再出現呢個情況都可以做左急救先，然後再送入院，但係好可惜既係呢支救命針，過敏者需要體重夠10kg先可以用喺佢身上。所以要再安排....... 跟住醫院安排左營養師見我地，問左一啲陳皮梅既飲食習慣，加固既過程食過啲咩？有無試過過敏？出現過咩徵狀等等..... 亦都教我地對有懷疑/過敏過既食物，點樣再比佢試食返，始終嬰兒時對某啲食物過敏，唔等於佢一世都過敏,可能只係階段性問題。 醫生都寫左兩封轉介信比我地，帶阿女去出面私家做食物敏感測試，信既內容都有提到阿女對咩食物曾經出現過敏，醫生同營養師都提我地，報告內容只作參考，等阿女加固時可以多加提防＆小心嘗試，因為過敏情況會隨年齡改變。 到左住院第二晚，其實我已經好累了，喺醫院完全無瞓過，因為阿女除左我之外，其他人都唔肯跟，一離開就會狂喊，始終陌生地方，所以無人可以同到我接手，加上阿女係拒絕奶樽型，所以必須我親餵，我已經同老公講我已經2日無瞓過覺，再唔休息，阿女分分鐘無人奶飲，而陳皮梅喺醫院又休息得唔好，呢到瞓著，嗰到就要量血壓/打針，然後又整醒左佢，跟住我又要再氹佢瞓......既然阿女已經無再過敏情況，我地都打算問醫生是否可以出院。 第二朝，姑娘派左口服類固醇比阿女食，然後等到醫生巡房，我地都同醫生講如果情況穩定左，我地都想出院，但今日巡房既醫生就話唔建議出院住，因為想比佢試食埋會過敏既食物，萬一有咩問題，醫院馬上可以落藥。 但係基於我實在太累關係，如果留院試食，分分鐘要最少留多一星期，經我地商量後，決定再約期返黎醫院覆診，另外再喺外面做左敏感測試。最後真係有需要時，等我準備好再留院做試食檢測吧！   聯絡/合作/查詢： bonbonlove2003@gmail.com Facebook 專頁：http://www.facebook.com/陳皮梅成長記-109986377133806/