Day 755 豆沙人生第一個面試前夕 In K1 1:37am 豆沙媽媽仲未瞓，上網四圍睇幼稚園資料 十月頭出世的豆沙，剛剛過咗兩歲, 個腦裡面有十萬個問題,問緊自己 做大b 好定細b 好？ 入學劵好定讀私校好？ 上午好，下午好定全日好？ 名校區好定屋企樓下好？ 其實睇咗幾個月，都未有答案 然後發現, 其實再睇多幾個月，都唔會有答案 Good enough is enough 永遠唔會做到the best 人就係貪心，想要最好，做人父母就係想俾仔女最好 深就好？ 識得多就好？ 多就好？ 學得快就好？ 跟得上就好？ 咩叫好？ 點為之好？ 對邊個好？ 為佢好？ 真係佢好定只係你覺得佢好? 一邊睇資料，一邊不停的反問自己 背後原因其實只有一個：驚 做父母的驚自己揀錯，揀唔到最好俾仔女 之前去上心理堂講過，每一個害怕的背後其實都代表咗一個insecurity，係一代人的insecurity 而家的教育「供應商」就係睇中呢一點 家長好多野怕， 怕蝕底， 怕輸在起跑線， 怕落後， 怕小學追唔上， 怕中學追唔上， 怕大學追唔上， 怕碩士追唔上， 怕博士追唔上， 怕人生追唔上 （去到呢到應該再無野追唔上啦掛） 其實係怕自己一個唔小心揀錯咗N班，引發蝴蝶效應，影響到仔女第日時唔能夠出人頭地，三十歲前買唔到樓（普遍都係用呢個嚟judge你幾成功 (請自行配上反白眼emoji)） 喂！咪住！停一停！其實你仔女真係咁差？你係咪對佢真係咁無信心？你其實想佢追到邊個？ The best 你永遠唔會知，要追其實只應該追自己(要贏人先要贏自己？！曝露年齡系列） 童年只有一次，no take two! 佢開心就已經係佢 ge The Best! 無論選擇係咩，no take two,你比較唔到揀A同揀B邊個好，亦無人話俾你知你有無揀錯，sorry 無最後答案 唯一可以比就只係同人比，但一同其他人比就己經被人牽著走 輸其實無咩問題，我就唔信佢會因為入錯K1而輸晒成個人生！對於自己的基因還有小小信心（除非佢係基因突變，咁無計:P） 輸得起先至係最終贏家(好似係, 隨非唔係) 學校教育不會比家庭教育重要,老師唔可能取代家長 教養係家長走唔甩的責任 其實咩係教育, 豆沙媽媽真係唔識咩叫教育, 要睇番啲書惡補下先得 明知個問題係個制到,但仲要去玩埋一份!? "Why Not Break The Loop" 心入面係咁loop! 人生漫長,小朋友有無限可能, 2歲人仔就要諗定小學讀咩會唔會早得濟,佢地五時花六時變,真係咁早就限住佢點行? 豆沙媽媽 寫於 豆沙K1面試前的零晨 Ps: 想試下做細b報K1，發覺原來想簡簡單單愉快學習都要過五關斬六將，有感而發 Ps: 對一個兩歲人仔去面試其實可以有咩期望，唔喊就當贏咗 Ps: 聽聞有啲學校仲話要單獨面試，於心何忍要小朋友獨自面對一個完全陌生的環境咁無愛心 Ps: 利申，只報咗四間，兩間撞時間要二揀一，一間撞咗去旅行，不過俾改，全部村校非名幼 Ps: 其實係陪跑心態，但唔盡力又對唔住自己，乖乖地係到做準備睇學校份 質素評核報告 （睇完好似無睇咁，空洞，無內容) Ps: 以上文字其實係寫俾自己睇, 驚自己唔記得咗個初心, 教養路上只有不斷地克服挑戰去強化自己的教養理念