由陳皮梅出世開始至今，呢9個多月以來，我都係以全人奶埋身餵哺。人奶路的確唔容易，特別係剛開始既時候，只要挨唔住，就好容易放棄。 餵左咁耐人奶，我仍然最憎聽到有人問我「夠唔夠奶餵BB? 」或者「你係唔係唔夠奶？」我聽完只會回佢一句「我唔夠奶佢一早餓死左啦！」 加上係第一胎，好多野都無經驗，有邊啲野應該要知道，其實都一頭霧水，好多野都好被動。嗰陣我可以順利上奶同堅持，好彩我遇到一位好既姑娘，指點一番。 因為陳皮梅要留觀察室48小時，所以佢唔喺我身邊。我記得吱初乳左好耐先吱到大半支針筒，無人教你點吱，真係手都軟了，滴滴皆辛苦！每3個鐘就重覆呢個動作，每一次我都盡我既能力去吱多啲，當然唔係每一次都有咁多。我當時會認為「可能我真係只得咁多」吱到乳頭又痛，手又累。 直到第二日下午，無端端有個姑娘搵我，我一見到呢位姑娘，我就認得佢，因為每次去醫院產前檢查，我都會見到呢位姑娘教啲準媽媽如何餵母乳。而點解佢會黎搵我？就係因為佢見到我交出去既母乳開始變少（每次醫院都有mark紀錄），所以佢就專登黎了解下，睇下有無野可以幫到我。 真係好彩有呢位姑娘黎搵一搵我，如果唔係，我一直都以為自己初乳只得咁少，因為作為一個新手媽媽，的確唔知道自己到底可以提煉到幾多初乳比BB，吱奶既手勢是否正確，唔係所有姑娘都會有時間教你。 我今次好好彩，同埋我生BB既醫院好著重媽媽餵母乳，所以提供左好全面既資詢同跟進。 然後我喺佢面前做一次吱奶既動作，原來手勢正確同唔正確，吱出黎既份量係差好遠，同埋當你正確時，吱既過程會輕鬆好多。 當然每間醫院都有唔同既做法，所以我建議每位準媽媽，真係要主動問。 分泌初乳只有三日，所以要好好把握呢三日，比BB飲到多啲既初乳。 以下係我既經驗Q&A, 大家可以睇睇 問題一：初乳唔係黃色？係唔係變壞左？ 答：唔係，雖然大部份人認識既初乳係「淡黃色」，不過我嗰陣有一邊吱出黎既初乳係「啡色」，顏色有啲混濁，當時姑娘解釋因為我乳線中有血絲，所以初乳既顏色會有改變，唔係因為你吱損左/初乳變壞左，啡奶對BB唔會有影響，營養價值依然存在，當啡色既初乳過左，就會變返黃色。唔好以為有問題唔比BB飲，有啲媽媽會以為有問題而唔比BB飲，掉左就浪費晒。記住頭3日既母乳叫做「初乳」，過左就無架啦！ 問題二：BB啜到你痛/損晒，係唔係應該放棄？ 陳皮梅都係2日後先開始埋身，的確BB只係一個剛開始學啜奶既初哥，邊有可能唔整痛你，我都損過無數次，但每次痛既時候，只要再重新調較，放啱吸啜位置，唔好死頂，過多幾次，BB就會慢慢學識，仲會越飲越叻。雖然每個BB一出世就「識飲奶」，但係「識飲奶」唔等於「識得有技巧吸啜」，媽媽千萬唔好忍痛有得BB繼續啜，因為只會令你受傷位置越痛，只要BB啜得啱，媽媽係唔會覺得痛。損左既部分亦都會隨住BB啜返正確而唔會再痛，唔好覺得麻煩/唔忍心打擾而唔糾正BB既錯誤吸啜方式，如果唔係等到自己受唔住痛楚或損到無可再損時，就會好易放棄親餵。 問題三：懷疑奶量唔夠？追奶？ BB一出世就會不停密密追奶飲，特別係人奶，人奶無奶粉咁襟飽，呢到餵完唔夠一陣，Bb又喊要飲奶，好多媽媽都餵到開始懷疑人生，跟住就擔心自己唔夠奶，埋身餵都唔知BB飲到幾多，繼而覺得自己無奶。我知道有好多媽媽會用揼奶方式去睇自己有幾多奶量，點知比自己揼出黎既奶量嚇一嚇，少得可憐。 然後就不停追奶，追追下因為奶量太多，搞到乳線塞埋。但我想講，只要選擇親餵，就唔需要特別去追奶量，我自己都係揼出黎唔多奶既媽媽，但係.....揼出黎少奶，唔等於「唔夠奶」。因為就算你個揼奶器有幾好，都一定唔會揼得清乳房既奶，而無一個揼奶器會比你身邊既吸啜神器（BB) 厲害，加上「後奶」既奶速較慢，我地係無法用手擠出/揼出，但係只要BB吸啜就會飲到。 記得左右輪住餵，平衡返個奶量，除非媽媽刻意去退奶，唔比BB吸啜，搞到經常嚴重谷奶。只要BB持續吸啜，媽媽既大腦就會一直下令分泌乳汁。留意BB有足夠濕片，咁就唔會唔夠飽。所以媽媽....要比多啲信心自己。 問題四：唔夠人奶補奶粉？ 為免自己有依賴，所以我屋企係唔會放定一罐奶粉做備用，唔到最後一步，我都唔會出動「奶粉」，因為無野係比母乳好，無後路，人既本能就會堅持。我聽過好多媽媽都會選擇「兩溝」，但「兩溝」有個壞處，除左BB會混淆味道，亦有機會對奶嘴＆乳頭產生混淆，有機會令BB抗拒是旦一方，其實如果可以堅持，最好頭6個月以純母乳餵哺，之後先再考慮比唔比BB飲奶粉。做父母既最希望BB有良好既健康。 問題五：餵人奶要唔要戒口？ 初時我餵人奶，都有留意邊啲食物會退奶，好似有好多野唔食得，但時間耐左，我發現其實有好多野係可以食，不過我有食物唔會掂 1.豬潤 2.花膠 3.含酒精飲品/食物 4.淡豆豉 5.生麥芽 6.乳鴿 7.韭菜 （其實有時都會有食到，但量唔多，所以無影響） 以上食物都係姑娘特別講明唔可以食，大家可以參考 做人奶媽媽既路一定係辛苦，意志堅持好重要，但BB隨時間長大，媽媽就會慢慢變得比以前輕鬆，所以最辛苦既時間好快就會過。 追蹤陳皮梅FACEBOOK http://www.facebook.com/ChenPiMei2019/
