回想起薯餅媽既孕期都比較輕鬆，無咩孕吐，加上口味無大改變，食得又訓得，迫巴士地鐵又得，所以周圍去， 有點掉以輕心，終於，在差不多WK32既時候，去廁所既時候發現「流啡」，孕婦最怕既事情發生係薯餅媽 既身上，當下，真係有點不知所措，即刻打俾薯餅爸，薯餅爸都好緊張，話即刻去睇急症。   去到急症，分流後就叫我地直接上產前病房檢查，產前病房有好多準備生既媽媽，見到佢地，薯餅媽終於有種就黎要生 既感覺，唔好講笑真係有D驚，但呢刻最驚既係薯餅未足月，真係出世既話器宮未發育得好，就要住箱仔，有排都未出得院， 姑娘檢查完，話宮頸未開，但始終有見紅，都驚BB會隨時出世，要留院觀察，薯餅媽聽完真係好擔心，只好乖乖入院。   坐係病床上，諗如果薯餅真係早產會點呢，腦海裡好多唔好既念頭浮現，薯餅會唔會係個箱仔度插晒喉管......... 諗諗下眼淚不禁流左出黎，好唔容易等到醫生黎，醫生同我檢查完，都係話BB有可能隨時出世，但始終未足月，WK34 前BB出世有機會唔識自行呼吸，所以建議打「強肺針」，幫BB強化個肺部，後遺症都無咁多，薯餅媽聽到即刻話打， 心諗普通打針姐，無事既！點知，醫生就話強肺針打係經肌肉注射會痛過平時打針，同埋媽媽有機會有副作用， 亦要係24小時內打2枝或者48小時內打4枝，叫薯餅媽考慮清楚打定唔打。   薯餅媽諗都唔諗即刻話打，「為母則強」邊會怕痛架？   過左陣，姑娘黎打針，薯餅媽一望枝針真係俾平時粗身D，姑娘問太太準備好未，枝針打落黎第一下，其實真係無咩野， 薯餅媽仲心諗個醫生講得咁誇張既，點知1、2秒後痛開始越來越勁，個種痛係持續性既痺痛，持續左大約成分鐘，薯餅媽 咬實牙根死頂，為左薯餅，為左薯餅，痛終於過去了。 12小時後，再痛多一次...........   最後，好彩薯餅都無早產到，只係俾預產期早兩日出世，用唔著枝強肺針，但今次既住院經歷都俾薯餅媽知道懷孕 真係唔可以太操勞，要休息多D，唔好咁掉以輕心。