雖然劍橋爸請過的工人姐姐so far so good，但因為過去經常捱義氣幫朋友做「見証人」處理解僱外傭事宜，久而久之我對整個程序都略知一二。不過先旨聲明「劍橋爸」沒有受過法律專業訓練，所以如果因為以下分享令各位父母有任何金錢上的損失或招致勞資糾紛絕對唔關我事！   「劍橋爸」覺得為了避免夜長夢多，解僱最好喺一朝早開始進行，等姐姐有足夠時間執拾自己行李，亦令佢有時間搵boarding house免得流落街頭。地點方面最好喺自己屋企，我明白有父母鍾意喺agent「專業人士」果度處理，但個人認為風險太高，畢竟agent果度有太多「同鄉」可能令事情簡單複雜化，同時僱主亦不能確保agent能持中立態度處理。劍橋爸覺得agent打開門做生意，在商言商當然想「貨如輪轉」。在僧多粥少、求過於供的市場背景下，「斷約」姐姐係一件十分值錢的生財工具，吸引力實在大得難以令人不會質疑佢地可以中立、持平咁處理事件。   事前準備：Set cam、安排見証人（最好係無利益沖突的朋友）、文件（如終止僱傭合約通知書、確認離港日期機票信、僱傭合約終止時的收據等）   過程： 開cam並向外傭出示「終止僱傭合約通知書」交代「最後工作日」。通常家長為了年幼子女well being都會支付一個月代通知金，要求外傭馬上執野離開要求外傭提供由當日起計十四日內離港的日期。通常佢地喺果一刻未必即時會諗到而話「Open dated」，但記住上網買機票係要填日期的，所以你必需用盡所有方法，軟硬兼施令佢commit某一日，然後於「確認離港日期機票信」簽名作實以免日後反口 安排60-90分鐘時間俾姐姐「執包袱」，其間僱主即時上網購買機票。雖然合約沒有列明僱主必需購買寄倉行李，但若外傭向領事館投訴是有機會影響日後再次申薦，所以風險請各位自己衡量。另外，勞工處的「僱用外籍家庭傭工實用指南」亦建議僱主需「提供免費基本行李託運的機票」，不過同時亦建議「而非同等機票價值的現金」 簽收「僱傭合約終止時的收據」內各item，包括回鄉機票、膳食及交通津貼（每日$100）、未支付的人工、代通知金（1個月人工）、按比例發放的年假薪酬（做滿3個月以上的「大假」）、遣散費（做滿兩年以上但不再薦請外傭，因此如僱主仍在「面試中」則不適用）或長期服務金（做滿五年以上）等。 緊記外傭同一時間只能享有遣散費或長期服務金其中一項如外傭同意可檢查對方行李（但坦白講意義不大），然後握手寒暄道別，目送佢安全離家無穿無爛咁就搞掂熄機收工喇 於七日內向入境處遞交《終止外籍家庭傭工僱傭合約通知書》(ID 407E)。要記住這份文件是可以單方面遞交而不需雙方簽署，所以必須盡快處理以取得先導權！   以上流程只交待了一般情況，畢竟現實世界實在太複雜，「劍橋爸」遇過有啲case真係諗都無諗過，只可講僱主們必須團結捍衛大家的權益。不過，各位日後遇到乜野奇難雜症都歡迎搵我幫手！   如果想繼續關注最新育兒資訊，請留意「愛麗絲與劍橋爸」Facebook專頁！ https://www.facebook.com/pg/eliselovesdaddy/about/