上回講到打左強肺針後，薯餅媽其實都有心理準備薯餅隨時會出世，但點知等了又等，等到差不多預產期時， 小薯餅都係無出黎既意慾，放緊產假既薯餅媽實在太悶，係預產期前三日走左去BBQ，（呢個媽媽真係唔知 自己仲大緊肚-。-）仲要開心BBQ到淩晨12點先番屋企。   就係訓訓下覺既時候，覺得好肚痛，好似「攪肚痛」咁，但薯餅媽實在太眼訓或者實在太忍得痛， 竟然可以照訓，訓到5點幾，終於痛醒左，諗住起身去廁所，去完一抹時發現流血，個量好似黎M咁多， 真係「見紅」了，小薯餅終於想出來了。   番入房，即刻嗌醒薯餅爸，好彩果日係星期日，薯餅爸唔洗番工，可以一齊去醫院，去醫院前薯餅媽 沖埋涼洗埋頭先出發（只有見紅未穿水先可以啊），仲要落樓下食埋個M記早餐，呢一刻既陣痛對 薯餅媽來說還可以接受，都係似「攪肚痛」，大約每10至15分鐘痛一次。   去到產前病房，姑娘檢查宮頸，發現宮頸開始軟，雖然度數尚未開，但都要入院等生，訓係病床上， 駁住胎心機，等醫生巡房，再報告一下，陣痛都係維持係可以接受既程度，大約8-10分鐘痛一次， 薯餅媽竟然睇睇下手機訓著左。（呢個媽媽究竟有幾忍得痛）   過左陣，姑娘嗌醒薯餅媽，話醫生開始檢查，醫生伸手入去檢查宮頸，發現宮頸開多左，話進度幾好， 醫生再望埋胎心機報告，突然面色一沉，原來小薯餅心跳有幾下跌得好低，醫生話BB有機會未必可以 等到宮頸自然開晒先出世，需要人工穿水，加快產程，否則有可能要緊急開刀，BB同媽媽都有危險。   薯餅媽聽到完全不知所措，正當薯餅媽仲驚緊既時候，已經有姑娘黎幫薯餅媽「種豆」，又有人 推左張手術床黎，叫薯餅媽換左件紫色手術袍，執晒行李準備過床，之後就推去產房，一路推， 薯餅媽一路望住天花板，眼淚不禁落下，手不斷摸住肚中既小薯餅，同佢講「加油」， 一定要平安出世呀，媽媽會同你一齊努力.......（待續）   P.S 關於「種豆」，今次姑娘幫薯餅媽種左係手腕側邊，而唔係傳統既手背位，薯餅媽感覺 打既時候無咁痛，而且唔會咁易撞到個傷口，但痛既接受程度都係因人而異，大家不妨做個參考， 最好都係問番醫生姑娘專業意見。