假期去街嫌多人、去食餐飯又貴過人，想同家人戀人過一個浪漫節日，露營絕對係好時機~~喂! 但去露營冇得沖涼、又要去臭格，煮野食、冇野玩，點頂啊?! 初初我都覺得不可思議，但去下去下又發覺幾好玩喎，只要解決難頂嘅問題就可以喇! 我同鯨爸未婚之前都試過倆口子去露營，2日1夜輕輕鬆鬆的，到兩隻monster出世後，我地再去露營既負擔變得十分沉重...講緊膊頭啊！   經歷了好幾次露營後，有些少心得想同大家分享... 1) 申請大嶼山permit 好多camp site 都係大嶼山，往往下車後仍要步行一段路，揸車人士最好申請permit，方便攜帶超重嘅營具同糧食，減輕膊頭嘅負擔，permit每日得25個，仲要一個月前先開放申請，一定要set alarm同人鬥快搶quota喇 2) 合適嘅服飾 Camp site好多都日曬夜涼兼風大，所以面衫最好通爽快乾，外套則要防風保暖，仲有一樣野好緊要，就係盡量唔好著有袋既褲，因為camp site好多沙，好容易帶左好多沙返屋企，洗衫會洗出好多沙 3) 帳篷裝飾燈 露營新手未必知，而家去到camp site會睇見好多帳篷都掛滿裝飾燈，好eye catching、別樹一格，小朋友特別喜歡，想夜晚光一啲，可以考慮加一些輕身USB或乾電池裝飾燈，$2x起喳 4) 糧食之準備 一日三餐固然重要，但係camp site煮食同家裡大不同，裝備冇咁多，所需時間都耐啲，唔通餐餐杯麵算數咩？小朋友尤其唔等得，呢個時候零食好緊要，我一定會帶定去camp site!  5) 露營最佳時機 曾試過夏天熱死辣辣去露營，靜止唔郁都出晒汗，成身痴笠笠人又臭，所以露營都係秋冬涼爽季節好，冇得沖涼呢個問題亦可以用 #免沖水潔膚濕紙巾 解決，坊間都好多品牌有呢類產品買 6) 小便解決有道 營地多數都有廁所，不過旱廁居多，即係冇得沖水個種，熱天兼高使用率時，真係要閉氣先去得，但小朋友未去過的話，我都鼓勵一試，感受良多...不過咁，而家去露營唔洗再驚去臭格，因為有應急尿袋，係自家帳篷裡就可以輕鬆解決wee wee啦! 7) 食材揀選注意 營地冇雪櫃，揀選食材就要注意保溫問題，第1日仍可選擇吃鮮肉的，但第2日就要吃防腐的肉，如腊腸腊肉罐頭等，3日2夜仍然可以食得好好的，中間亦可以諗一些環節，令小朋友可以幫到手的，如洗菜、切午餐肉等，增加露營趣味同投入感 8) 自備娛樂項目 其實露營可以好多野玩，營地有沙灘的可以玩沙玩水，靠山的可以遠足，即使咩都冇，亦可以自備，大B可以玩球類、放風箏、紙牌遊戲如UNO、冚棉胎、7級豬、狼人殺等、細B則可以玩吹bubble、搖控車等。我家鯨魚剛過去既露營就玩生火 (鑽木取火)，唔洗再日夜睇youtube電視電話了 9) 救命藥傍身  露營同外遊一樣都算係勞動大嘅活動，因為裝備負擔重，又可能遊山玩水，救命藥一定要傍身。 長假期又來了，如不宜去人多密集地方，可以考慮去郊外露營啦! 更多親子分享，請Like & Follow 鯨魚家姐‧蝦子細佬Facebook 同IG啦!