上回提到薯餅媽早上11點被人推緊去產房，到達產房後，即刻感覺到一陣寒意，薯餅媽不禁打左個冷陣， 開始緊張了...... 放低晒電話走佬袋入LOCKER後，就被推入一間房入面，等左一陣，醫生黎左檢查，之後就幫薯餅媽 人工穿水，原來人工穿水一D都唔痛，只係FEEL到一大攤水係下體流出，之後，就開始幫我落小 小催生藥，叫我慢慢等下，而家只係開左三度到，起碼仲有成6-8個鐘，呢個時候陣痛都未去到好痛， 助產士問需唔需要打止痛針或者聞笑氣，我竟然話唔洗，薯餅爸入左黎陪我一陣，助產士就叫薯餅爸 去慢慢食個飯先，話第一胎應該有排等。 跟著，薯餅媽就訓下痛下醒下，突然，FEEL到個陣痛強烈左，痛到我要捲埋一舊，我就問助產士 要笑氣聞，助產士幫我檢查後，話我宮頸突然開得好快，已經開到六度，即刻俾電話我打俾薯餅爸 叫佢番黎，我同助產士講「我好想柯出黎呀」，助產士話忍住呀，宮頸未開晒，忍多陣先， 真係好難忍，只好不斷聞笑氣，聞到個人WINGWING地，薯餅爸番到黎，過左陣，助產士話見到BB頭髮， 可以試生喇，即刻將床變做生產床，擺對腳放上架，準備生產。 助產士話一陣痛就用力柯，薯餅媽用盡全力柯，終於，解脫了，一個圓圓既頭仔出來之後，就到滑嘟嘟既 身體，薯餅下午兩點出世了，助產士將薯餅拎埋黎我身邊，問我性別後就拎BB去抹身磅重。 之後，助產士就幫我排出胎盤，薯餅都已經抹好身，姑娘將佢擺係我心口，作第一次肌膚之親，好神奇既時刻， 姑娘仲幫我地影左第一張全家福，望住懷中既薯餅，即使縫緊會陰都完全不當一回事了。 縫完會陰後，姑娘就鼓勵餵初乳俾BB，所以，就開始我同薯餅第一次既餵哺體驗，又係好神奇既一刻， 薯餅滿足既樣子更加肯定我之後既母乳之路。   總結這次生產過程，薯餅媽感恩只用了大約四個鐘頭薯餅就出世了，而當中既痛楚並沒有想像中咁痛，只是 未夠度數時，要忍住不能柯出來，有點難受而已，勉勵各位準媽媽，只要放鬆心情，為母則強，那些痛是可以 忍受的，加上謹記聽從助產士的話，適當時候用力真的很重要。