嘩..原來好耐無update. 因為話咁快, 豬仔包已經半歲. 宜家講返6個月前, 係聯合醫院既經歷先~ 回到2019年... 8月10日朝早見紅，之後去尖沙咀睇方醫生，一直因為未有陣痛而未有入院。之後返屋企瞓左陣去咗99度食飯。食完飯開始有零星陣痛，返到屋企沖涼之後喺床睇愛回家。當時大概10分鐘一痛。12點上床瞓覺。但係瞓得唔好，因為大概五至6分鐘痛一次，不過唔算好痛。到凌晨兩點，因為痛已有規律，同埋見紅咗已有一日，所以叫醒大少準備入醫院。 8月11日凌晨2:15去到產房，大少要喺出邊等，入去檢查check BB心跳同鎮痛規律。姑娘話仲係未得因為痛太少同埋不規則，所以我瞓喺床度咗心跳半個鐘。啲姐姐就教我綁產婦衛生巾。凌晨2:45上返去4B產前病房，因為未入得產房大少要返屋企等。探病時間再嚟探我。當時我真係後悔入咗醫院，因為好似自己孤軍作戰一樣。有啲想喊。好掛住大少。 終於捱到朝早八點有早餐食同埋醫生巡房，醫生再check BB心跳同埋伸手入去睇吓宮頸開成點？佢都話未生得住，都鎮痛至兩至3分鐘一次先至可以。之後痛楚就開始密左痛多咗。姑娘問我大少會唔會陪產？佢會唔會12點探病時間再嚟探我？我話會。姑娘建議佢學產前按摩可以幫我舒緩痛楚。我立即答應同打電話叫大少嚟醫院。佢嚟到之後姑娘教佢用按摩油幫我喺背部按摩。真係好有幫助！希望我可以瞓返覺，因為由夜晚開始我就冇瞓過覺。大少一直喺病房陪我同我按摩我個心都定啲。 到12點探病時間媽咪同奶奶都有嚟探我，當時我已經痛多左不過仲可以忍到。同埋一直都keep唔到有規律。見紅亦都冇見多咗。過咗探病時間大少繼續幫我按摩，其實真係有啲心痛佢真係好攰因為佢都冇乜點瞓。 輾轉間又到六點探病時間媽咪繼續又來醫院，煲咗野比我飲。當時痛得多左，大約維持三至4分鐘痛一次。每次一同媽咪幫我卒背脊，真係舒緩到好多。之後大少繼續幫我按左一陣大概去到夜晚10點。姑娘話如果佢唔按住就要返屋企先。雖然唔捨得但係冇辦法。。。其實佢都要返屋企抖下，不過我哋都知道今晚一定會生。所以有啲進退兩難。大少提議佢瞓喺病房外走廊，但我唔想佢咁辛苦，最後我揀咗叫佢返屋企先，我一有call佢就即刻返嚟。 大少走咗之後姑娘黎幫我檢查，佢話開咗兩指但係未有度數(原來有唔同)，佢幫我用手嘗試加快宮頸開嘅速度希望可以盡快落產房。佢做完呢個動作之後真係痛多咗。 好辛苦咁捱到8月12日凌晨兩點，大概兩至3分鐘痛一次。呼吸法已經唔係好幫到手。姑娘你幫我檢查，佢話已經開到四度可以落產房，叫我打俾老公。我嗱嗱聲打俾大少叫佢立即返嚟聯合。我就準備落產房，姑娘叫我先去小便同埋換返產婦衛生巾。之後執好晒啲嘢就用輪椅推我落2樓，入產房。 入到產房已經係凌晨2:30左右，換上紫色袍，上床個助產士過嚟幫我檢查+種豆。因為我未穿水所以佢幫我用人手穿水，穿完水之後係會更痛，痛得更密！之後教我點樣聞笑氣。開頭都有啲用但之後係冇作用！同埋因為BB心跳有啲不穩，怕唔夠氧氣所以俾咗貓鬚我。 之後時間我已經唔知太多，只知道大少入咗嚟，佢幫我揸住個笑氣俾我聞。因為我覺得冇用成日都拎開佢，但係姑娘叫佢點都比我問會好啲。而我就不停地陣痛，因為越嚟越痛亦越嚟越密。我真係想唞一唞嘅時間都冇。我已經開始不停大叫同埋打張床隔離塊板。真係覺得自己好似Hulk。。之前仲擔心種左豆自己咁郁會好痛. 但果個時候真係絛野痛得過生仔!!! 粒豆已忘記左.... 到咗大概凌晨五點我實在忍唔住大叫BB要沖出嚟，再嘗試開始入嚟檢查話倒數已經全開可以試吓生。我試左成個鐘，一有痛咁就不停Push，但真係唔夠氣亦唔夠力。大少係身邊不停加油，同埋幫我抹汗。未開晒倒數之前都仲可以飲水，打開晒度數好唔俾飲水只係用水濕一濕張紙巾俾我含着嘴唇，因為我已經嘴唇都乾晒口都乾晒。我已經痛到明知打止痛針BB出嚟之後需要打解藥，我都問咗姑娘可唔可以打。但其實自己個心定唔想打。因為怕影響到BB。到醫生入嚟已經係大概六點。佢話因為我已經是生左一個鐘都唔成功，問我要唔要用產鉗。嗰一刻無論有任何方法可以生到BB出嚟我都會答應。我簽好文件後佢哋快速準備晒所有工具，請大少出去之後就開始放小便同埋用產鉗。期間係會打麻醉針。其實用產鉗都要配合我用力同埋陣痛，當有鎮痛是用嚟push，醫生先會鉗到BB出嚟。好快阿B就出世啦，放喺我肚上面不停大喊。由佢出世果刻就喊到離開產房，真係好大聲㗎。 姑娘之後抱佢過嚟俾我睇望真啲佢個樣同埋手腳帶嘅名啱唔啱。問我知唔知自己頭先做咗乜嘢，同埋生左仔定女。最後就係生埋嗰胎盤同埋聯針，我已經冇乜感覺。同埋話我知因為用產鉗, 所以佢面仔暫時布個印. 之後會退. 我再留喺產房一個鐘，睇下仲有無咩事, 例如出血..啲姐姐叫我打電話俾老公叫佢去食啲嘢先。因為自己電話熄左, 所以姐姐借左個電話俾我打俾大少. 姑娘就教我係個肚上面要按下個子宮，個子宮變到好實要再按下佢先至會收縮得好啲。但我實在太攰冇乜點按到。同埋按落去其實有啲痛，佢哋應該會feel到有好多血出嚟。我問啲姐姐可唔可以俾杯水我，組組仲俾埋飲管的..之後我飲咗全世界最好味嘅一杯水！ 都大約八點我可以上返4A產後病房，要自己過床係有啲辛苦。而大少就喺出邊等我。因為佢沖左啲炒米茶比我飲。但佢都冇得再陪我啦，因為我上咗病房後就要探病時間先來得。我出去見到佢之後，叫佢快啲返屋企瞓，因為佢都真係好攰啦。