38週5嘅早上，二寶終於出世啦~~     轉眼間嚟到38週4嘅晚上，我有規律性嘅陣痛。覺得肚底抽住痛一陣，一個鐘頭每隔15分鐘就痛一痛。所以，老公就陪我入醫院待産了。 好彩我哋搭的士，而唔選擇揸車。 而家雖然係疫症期間，其實我間中陣痛，都好需要有老公依靠。 入到醫院，首先要到臨時區探熱量體溫。 然後拎住入院嘅VIP卡，直踩上B4産房做分流登記。 咁呢個時候，老公同平時一樣都係唔入得去住。太太入去産房做分流留、檢查、登記。 疫症期間，所以姑娘會問得比較詳細，例如有無離開香港、去過中國或者其他地方，有無發燒、傷風咳嘅症狀等。 然後就進行一般檢查，例如磅重，瞓上床聽BB心跳、度肚、摸肚。 姑娘整理排版同時，都做埋入院用文件，等老公同步去辦理入院手續。 完成入院手續，拎埋排版。就可以去産前病房，疫症期間老公只可以陪我去到病房門口，就要將行李交俾姑娘，姑娘幫手拎。   ^ 待產嘅產前病房…難捱嘅陣痛正式開始!! 而我就開始孤身生b大作戰了！以前無疫症，基本上都入到産房，一般情況下老公都可以嚟陪産。 但疫症爆發下，政府醫院取消咗陪産。 而我喺産前病房，為保障自己安全健康，都需要戴口罩。 無論陣痛幾痛都好，我哋都要戴住口罩。 生二寶，痛嘅速度都快咗，痛到大概4點幾5點穿水，搞完一輪上産房催生。 其實我已經好攰，亦覺得無力好痛。 同上胎一樣，帶住行李坐輪椅，有姑娘推住。所以行李真係盡量輕便，就會方便啲。特別係，而家疫症嘅時勢。 上到産房，由於我一穿水就喺産前病房，將所有胸圍除去，換上紫色手術袍。所以上到産房除咗底褲、m巾就可以直接瞓上床，等生。 重點嚟啦，仲戴住口罩，咁QE仲有無笑氣㗎？ 答案係，仲有笑氣，放題任吸。 但産婦要戴住口罩咁吸，我覺得係比起上胎用更大嘅力去吸先吸到笑氣。 今胎，疫症期間老公無得陪産。所以，幾痛都要獨力承受，好想揾個人依靠、搣、扭、鬧都無。 所以，今胎陣痛一痛除咗碌、吸笑氣、大嗌。   ^ 孤身作戰…不過明白老公都好唔開心!  生完之後，醫院無減BB同媽媽合照呢部份。為咗見證呢次疫症生b，我口罩都唔除，影低呢一刻啦！ 然後，産後大家都一定想知探病呢？ 答案係，無嘅。 成間醫院，已經取消所有探病時間。如果有物資想要，可以照樣叫老公或屋企人拎到病房門口交收，又或者講清楚床位，俾姑娘轉交亦得嘅。     如果屋企人未趕得切拎物資(例如零食)，都可以問姑娘拎餅同奶充飢。     雖然係政府醫院，不過生完BB再加上餵人奶，我對食真係無慾無求，我覺得午餐係最豐富。     醫院產後生活，努力記錄BB食奶、片片嘅紀錄。     仲有努力追奶嘅生活，喺醫院住咗3日，我由0.5ml努力擠奶擠到兩邊加埋有30ml，都算係一個小成就。     產後第2天嘅鬆、大肚腩…嗯! 除咗要努力追奶，仲要努力修身!!!     -------------------------------------------------- 歡迎聯絡我&和牛B: chungying56@hotmail.com Facebook專頁: 和牛B嘅成長專頁 Instagram: wagyubmami                -------------------------------------------------- 姊妹合作**Precious M accessories** 利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。