20200213     係行李篇提及過，我地直飛廣島唔多機揀，航空公司選擇左：HK express（亦係我地第一次搭呢間航空） 09:15 a. m 嘅機，我地6：40a. m. 到左機場（要留意番：依家進入機場範圍要係門口出示機票先俾進入，唔一定要print出黎，手機睇到都） Check in時我地選擇左係閘口先寄bb車，佢會俾定埋大透明膠袋我地一陣入架bb車落去 搞掂好哂7點鐘去坐低食個早餐先     記住：帶住bb就可以幫佢帶水入禁區！其他人就只可帶100ml以內液體！     飛廣島好快，2小時45分鐘就到，我地好準時0915起飛，香港1200降落。 係機上記得預先填好入境紙 軒軒第二次搭飛機，正值 trouble two嘅佢今次係起飛降落要扣好安全帶時比較難搞，要出動小食呢招同上次一樣都係起飛時訓左，都訓左超過一個中先醒，之後就玩下玩具，好快就宣佈降落嚕～呢程機都有80分 晞晞就第一次搭飛機，由我地到左機場開始佢就無訓過攪，所以一上到飛機我就同佢食奶訓，同哥哥一樣起飛時已訓左，訓左起碼兩個中。訓醒又玩下自已啲牙膠玩具。不過佢應該耳仔唔太舒服所以都扭扭下，同佢啜下奶就無事，降落時都係啜住奶，對於第一次搭飛機嘅佢黎講都有90分（我地選擇左坐機尾，貪佢機尾少人啲，唔怕嘈親人又空氣流通小小，所以無bb籃架）     落機排隊申報健康狀況表、入境、拎行李 40分鐘搞掂哂。由於廣島機場無鐵路，所以要搭旅遊巴士，但我地已經錯過左13：40班車，下班車出廣島JR新幹線口要15：00先有，所以去食個lunch先，廣島唔係大機場，所以唔會有太多商店同餐廳，可以睇到飛機升降好似得呢間 餐廳隔離係觀景台出入口 到埗呢日超大太陽好熱，有成17度添好似     食飽飽同兩兄弟換埋片就落番去搭旅游巴，旅客通常搭兩架，一架去廣島巴士總站（廣島最旺個頭，紙屋町個邊。如果諗住專留係廣島玩，唔需要搭長途新幹線或JR的話，建議住呢邊，真係旺過我地jr廣島站個邊好多）；另一架去JR廣島新幹線口（我地就係搭呢架，因為我地今次行程主要搭新幹線周圍去） 車程好快50分鐘就到，15：10上車，16：00落車     今次我地住呢間酒店都值得推介俾大家 廣島21世紀酒店   Hotel Century 21 Hiroshima    我地經hotel.com book ，連續7晚都係住佢，2月中出發，我地十月尾book，一家四口豪華雙床房都係＄4500 左右，重點係間房好大有40平方米，同埋有嬰兒床提供。我係入住前兩晚sd email去詢問下有無bb床，浴盆等等，佢都好快回覆左可以提供bb床俾我，但其他物品就無啦，我估唔到佢一次過提供兩張bb床俾我，仲要大過依家屋企晞晞訓緊個張 雖然冇民宿/ apartment 啲廚房，但咁大間房，絕對夠哂軒軒玩 伏匿匿 地點雖然唔係JR站隔離，但行十分鐘內已到。 有兩條路可以行，一條路係廣島站南口出到黎個見到有個地下街入口，落地下街沿左邊直行到尾再上電梯，上到去就身處下圖條橋，望前就係酒店啦，隔離仲有間東橫inn；另一條路就行地面，同樣南口出，沿左邊一直行會見到有個停車場入口同馬路，過馬路之後行右邊過多條大馬路，再右邊一直行就會去到下圖條橋。     休息一下，日本時間17：30 出發去廣島站附近睇下有咩食，去左某商場，呢間個view一流， 仲有 榻榻米 坐。（今次旅行期間如果間餐廳有榻榻米我地都一定坐，因為軒軒會一支箭飛左埋去）     好認真睇餐牌 呢8日經常食兒童餐，基本上都一定會送埋玩具，係一籃玩具任佢揀一件 凍嘅蕎麥麵好好食     食飽去買埋個JR pass先，我地今次買『山陽&山陰7日pass』，￥20400 一位，買時要show passport，需連續7天使用，可免費坐指定席。     去 big camera玩具部俾佢玩一陣，再買埋宵夜就番酒店休息嚕～                   產品試用/活動邀請/其他合作 歡迎聯絡：tanleesharon2004@yahoo.com.hk 謝謝 Fb: [http://www.facebook.com/leessssfamily]