去到6點，媽咪就入左泥探我，打左針個人迷迷糊糊，同佢講好痛，孩子爸收左工番屋沖完涼7點就泥啦，醫生探完宮頸話開左3度，我就叫佢去食野先，距離要生仲有一段時間，孩子爸食完番泥，姑娘就叫佢按下背，我有啲想柯既感覺，姑娘就再同孩子爸講，佢痛既時候你就叫佢呼長啲氣再慢慢呼，孩子爸好傻地問左句，我點知佢痛呀？姑娘就話你見到佢表情就知嫁啦。我問姑娘啲催生藥水可唔可以減番底啲，佢有啲燥底話減番細你開唔到度數，咁用藥泥做乜呀？ 去到9點幾，已經好想柯，藥水減底左65，又到一班實習+正式醫生泥巡房，痛到個人係咁震，佢幫我探宮既時候，我痛到踢開左個醫生隻手，叫佢細力啲，個醫生就話我咁痛，不如比我開刀啦，其中個姑娘話佢依家都開到五度，進度都幾好，睇多陣先決定啦，醫生走左後，我同姑娘講我想開刀，姑娘就好溫柔咁話，你已經洗濕左個頭，番唔到轉頭，好快就入直路架啦，捱多陣啦，你都唔想食全餐嫁？大約十點忍唔住係咁柯，又有另一個姑娘行埋泥，我又同佢講你地比我開刀啦，個姑娘就勁大聲話，你要開刀就去私家，依到係政府，唔係你話開就開(我心諗係個醫生話比我開我先咁講姐)，一直痛梗又想柯，我都會大叫姑娘好想柯，當然佢入到泥叫我試柯，又柯唔出。 我問孩子爸依家幾點，佢話10點，我就諗不如忍多2個鐘等到18號先生，我媽話17號唔好，過左陣，我問姑娘下次巡房係幾點？佢話12，我先頭以為係醫生接生，心諗我依家已經痛到咁，未要忍多個半鐘先有得生？到11點，我聽到有姑娘係隔離床，我就大叫姑娘我想柯呀，佢就走泥問我，冇陣痛有冇想柯既感覺？我就話有有有(其實係冇既)，咁個姑娘幫我探完宮頸就比我入產房，我就見孩子爸就咁入左泥，接生嗰啲姑娘叫我有陣痛拉長吸氣呼氣咁柯，試柯第一次唔成功，個接生話睇我個樣唔似生得，嗰下我勁驚佢叫我番去待產又唔知等幾耐先有得番產房，就好努力地咁柯，來來回回用左大約30分鐘就柯左出嚟，柯完嗰下真係好爽，好似人地超級便秘咁，生梗嗰時會不知不覺柯左啲bubu，我仲講左句唔好意思，聯傷口同唧番胎盤出泥都好痛，大概就係咁樣啦。 其實我真正痛既時間唔多，只係痛左八個鐘，三點到七點嗰種痛係忍到既，後尾原來會痛到係咁震又失常亂講野，途中我有話要聞笑氣，姑娘話我就生聞完仲衰，迷糊個人生唔到，唔比聞，如果冇止痛針，我諗條腰痛到斷左都似，孩子爸入泥陪產，佢唔係好似著到啲醫生做手術咁入泥，好失望！生嗰下係好清醒，之後轉番去東九，有姑娘睇下邊傷口就話，幫你接生嗰個姑娘好好，唔近睇我都睇唔到你傷口，佢只係剪左好小，比呀b頭仔出，連幾cm都冇，比我簡多次我都會簡番廣華，無論姑娘、待產士、助理都好好！係自己衰多口問錯問題，先比人話，哈哈