我決定, 要教米豬煮飯!! 都唔知仲要坐呢個監幾耐, 教數字教英文又唔so我, 一味要入廚房痴住我, 咁鐘意入廚房, 一齊煮啦~~ 我地今次嚟一碟過唔駛煩系列~ 雜菜燒春雞   材料: 春雞 1隻 (咁啱磅咗, 今次隻雞係826克) 西蘭花 1個 紫洋蔥 1個 甘筍 2條 乾蔥頭 1個 蒜頭 2瓣 牛油 2湯匙   醃料: 鹽 1茶匙 糖 1茶匙 醬油 2湯匙 百里香碎 1茶匙   做法: 1. 雞完全解凍後, 抆走雞毛(if any), 清走所有內臟後用醃料捽勻全隻雞, 包括雞腔, 最小醃4小時(最好過夜) 2. 預熱焗爐200度, 雞室溫回暖後從雞胸剪開, 將牛油搽响雞皮同雞肉之間, 要攝隻手/匙羮入皮下搽, 雞翼尖包一層鍚紙, 然後放上焗盤, 入焗爐200度焗20分鐘 3. 所有蔬菜洗淨切件, 乾蔥頭切絲, 蒜頭切片  4. 西蘭花及甘筍先用滾水+半茶匙鹽+1湯匙油烚4分鐘, 瀝乾水備用  5. 中火爆香乾蔥頭及蒜片後, 加入洋蔥略炒, 再加入西蘭花及甘筍, 以半茶匙鹽調味 6.  將已焗了20分鐘的雞取出, 將所有蔬菜放入焗盤內, 再將雞放上菜上, 放回焗爐200度焗5分鐘, 之後調高至220度再焗5分鐘  7. 食得~   小廚師訓練由批皮開始~  批咗幾次皮, 今日比佢切切~~~ 响隔離真係睇到一額汗............   煮食小貼士: 1. 蔬菜先炒/烚過先入爐焗, 可以保持蔬菜水份, 以免被焗爐焗乾, 同時又可以索到雞味~ 一舉2得 2. 皮下搽牛油會令雞皮超級脆, 搽面頭冇搽皮下咁脆 3. 其實菜連埋雞, 一餐真係食唔晒, 我地食淨1/5隻雞, 主要係雞胸, 食唔晒就玩手撕雞, 第2日lunch做墨西哥烤餅~ 詳細做法可以參閱返 煮媽媽 - 墨西哥烤餅   米豬豬的page~ 每日都update~  歡迎各位like & follow~ 亦都歡迎大家聯絡我同米豬豬一齊試用產品或合作~ https://www.facebook.com/NereusYu/