雖然已經係產後兩個月多，但生產過程仍然歷歷在目，仿如昨天發生一樣，我諗我一世都唔會忘記:P   預產期1/1的我，每日都同玥玥講記得準時出世啦，同媽媽一齊倒數。可惜仍然未有動靜!! 已經攞埋8/1催生期，每日如常－食柯訓，唯一有少少唔同就係夜晚訓教多左種M痛的感覺。   玥玥比媽媽的信號會係見紅先? 定訓訓下穿水? 終於係4/1既早上，起身去廁所見紅啦!! 之前一直同自己講入院前要飲杯好濃既蜜糖水/食朱古力，等可以加快產程… 當然，當下我只係記得要沖涼，然後就拿拿聲執走佬袋再食個M記入院   去到屯門醫院，當時仲係疫症初期，老公仍然可以陪入院，上A7產前房，姑娘問下咩生產徵兆就示意老公先去辦入院手續。 然後我就跟姑娘去檢查宮頸 (無想像中痛，係有少少唔舒服) 宮頸已變軟。由於第一胎普遍都係耐，姑娘安排我入住產前房等待，此時就要同老公暫時分開。 因為肺炎影響，晏就既探病時間取消左只剩夜晚，一個人時間流流長都唔知點過。 放好行李後，姑娘安排駁機檢查寶寶心跳、宮縮及count胎動。 初期觀察半小時，期間醫生姑娘會不停黎檢查你的情況亦會有人黎抽血。係中午派餐前，突然有姑娘係我身後掛左禁食的牌仔… 什麼?! 我問姑娘點解要禁食既，原來因為寶寶宮縮反應有幾下心跳drop了… 只食左個巨無霸的我好後悔唔加多幾隻雞翼。 駁機由最初半小時變了觀察幾小時了，姑娘不停叫我轉下身刺激胎動。 到左夜晚探病時間，老公帶左飯黎，太肚餓膽粗粗問醫生可唔可以食野 (心諗唔食野邊有力生仔lol) 醫生睇睇報告再探多次宮頸就話可以食野啦～ 真係餓死我   去到夜晚九點幾，覺得陣病強烈左，即時開返個app count宮縮 見大家都落床行黎行去，我都跟住行睇下可唔可以開快D… 初時8-10分鐘痛一次，姑娘話如果五分鐘痛一次先禁鐘。去到三點幾，開始痛密左5-6分鐘痛一次，個子宮好似比人扭毛巾咁，一痛個人就扭埋一舊，禁鐘叫姑娘檢查，一度都未開過… 唔 係掛咁痛都無開到…? 之後又痛得疏左，結果訓著埋……   待續   下一篇文章: [卸貨記錄] 屯門醫院48小時食盡全餐生產記 (下) https://mamibuy.com.hk/talk/article/82230   如果想知道更多我同寶寶生活點滴/一齊交流下心得，歡迎Follow IG & FB :P IG: Babychloew105 FB: 玥孩兒成長記 寶寶教會媽媽的事