眨下眼就9個月，真係快樂不知時日過。好想做返個記錄，分享下經驗。   由陀住我粒珍貴嘅黑珍珠開始，已經打算剖腹，生前大概兩個月就同醫生講，醫生就幫手去排期，我無特別揀日（揀日醫生同醫院都會加收d 費用），淨係同醫生講時間最好早d，唔好太晏，驚會捱好耐肚餓????，有咗之後捱唔到肚餓。因為剖腹前12個中唔食得嘢，剖腹後個日又淨係可以飲粥水，醫生話到時唔會咁快有肌餓感，經歷過之後，証實醫生真係無呃我。   開刀前一日黃昏入院，辦好入院手續，就帶你上樓，然後再展開一連串嘅程序，姑娘簡介下有乜要注意，幾時食胃藥（其實唔洗擔心會唔記得，姑娘會提你，服務好周到），再問下有無指定兒科醫生（我無做research ，都唔知邊個醫生好，姑娘就話咁佢幫我簡，最後我覺得佢幫我簡嘅醫生都唔錯，好細心，肯詳細解釋比我聽bb 嘅情況），想比bb 飲邊隻奶粉，然後另一個姑娘入黎幫我剃毛，搞掂就要去做胎監（聽胎心），我個日超多準媽媽，成間房充滿唔同bb 嘅心跳聲，好amazing。 檢查完就有姑娘帶我入房，我被upgrade 咗去半私家（咪開心得咁早，錢是要自己比的喔，唔係免費up)，姑娘介紹完d 用品同設施就完成哂成個程序，開始等生。   標準房床位數量有限，咁岩我生個日又人多，所以標準房已滿，就up 咗去半私家，搞入院手續個陣，我有同cs 講可否盡量安排同香港媽媽同房，佢話唔保証但會幫我remark 返，好彩最後真係同港媽同房，大家都好守禮， 5日嘅住院都可以舒舒服服，安心地渡過。只能說同房嘅質素好影響你5日嘅心理同生理質素，尤其岩岩生完，荷爾蒙又特別影響情緒，一個好同房好重要。   完成哂d程序，懶得出去食嘢，就叫老公買譚仔我食，我就留係醫院沖個靚涼。可能太緊張，又好唔捨得bb 係肚入面同佢一體嘅感覺，都唔係訓得好好，好似無訓過咁就要起身準備換衫入產房。   由係房開始比人推落產房，真係好緊張，尤其入到產房，d 冷氣鬼咁凍，我成個人狂震，震到已經傻傻的分不清係凍定緊張，後尾有暖風吹住先好d，但牙鉸依然震過不停。麻醉師打完麻醉，下半身有一股暖流，然後醫生就話開始，無痛感，淨係感覺到拉扯，我諗5-10分中內醫生就話可以叫老公入黎，大家一齊傾下計，傾唔夠一陣就聽到bb 嘅喊聲，真係感動到喊出黎，好想即刻可以抱實我粒黑珍珠（為娘當時都未知係一粒黑珍珠，退咗黃之後，我家寶貝仍然好黑，先肯定佢似爸爸黑肉底????????‍♀️), 個刻好羨慕老公可以幫bb剪臍帶，剪完姑娘就幫我地一家3口影相，bb 都仲係有d 胎脂痴住，成塊發水面包咁，樣衰就梗，當然媽媽都唔弱，不過咁經典嘅埸面又有乜所謂呢。   bb 要去洗白白，我仍然縫緊針，忽然覺得好想嘔，醫生就比咗氧氣我聞，好快就好返d，就係咁，又多個額外開支，好彩唔貴。   開刀過程其實好快，我諗20-30分中內，但前前後後嘅準備同監察，由離開房到返入房都搞咗2個幾鐘。   第一日媽媽落唔到床見bb, 但老公可以有每日一次嘅親子時間，梗係唔可以錯過，事前要同姑娘預約，每日都約一次，而媽媽就可以係喂奶時段再見bb。   生完之後，雖然有麻醉藥，但其實我唔太眼訓，個肚又無咗，係有d 空虛，好彩真係唔肚餓。到咗晏畫，醫生黎檢查我嘅情況，就話我可以飲粥水（屋企人無準備唔緊要，仁安有得買），然後成日就攤係張床唔郁得，玩下電話，睇下電視，同掛住bb。   到第二日醫生話可以試落床，但一定要有人幫手先可以落床，因為好大機會見暈。又一次証明醫生句句都係真言，我落咗幾次先成功，一黎傷口痛，二黎真係超級暈，第一次落床想企係到，但唔夠5秒已經好暈，要即刻訓返低。原本約咗2點喂奶，都錯過咗，好傷心，唯有等親子時間先同老公一齊去見bb。第一次抱bb，我d 眼淚係跑出黎，終於抱到黑珍珠，終於可以痴返住我嘅小寶貝。   係仁安嘅5日可以話係媽媽嘅honey moon，真係好輕鬆，除咗喂奶同親子時間，都係自己係房到休息，亦都因為咁，出咗院之後真係極唔慣，又唔知bb 喊乜，自己又好累，好彩有屋企人幫手，如果唔係真係好易產後抑鬱，在此奉勸各位媽媽真係要識求救，小寶寶同媽媽嘅健康同樣重要，無論係心理定係生理各方面。