正所謂一分錢一分貨，由於我被upgrade 咗去半私家，個plan 就貴咗4000，諗返轉頭，其實都不失為一件好事，個toilet 少咗人share， 人少d 又無咁嘈，休息都好d。而聞氧氣都係收多280，另外仲有兒科醫生，麻醉師，婦產醫生嘅收費，total 差不多7 萬咁上下。兒科醫生，麻醉師同婦產醫生嘅收費人人唔同，如果想有個預算，可以問返自己嘅婦產醫生，佢會話個大概嘅數你聽。   走佬袋方面，其實仁安都準備得好好，佢提供嘅媽媽包（床墊，產婦衛生巾，網褲，沖洗器）係夠5日用，我自己帶去嘅少量都無用武之地。 我個人嘅清單是咁的： 按金單 入院信 身份証 (自己同老公嘅 copy) 電話 八達通 信用卡 現金 長襪 喂奶睡衣 喂奶胸圍 乳墊 紗巾 毛巾 長褲 叉電器 尿袋 盤仔 濕紙巾 廚房紙 保溫杯 炒米茶包 乾糧( 真係好怕忽然肚餓????） 個人清潔，護膚品   出院袋我係出院個日先叫老公拎黎，都係bb 出院衫，出院前一日姑娘有講座教你要帶d 乜，要點做，跟住做就得，我自己就執咗兩套唔同厚薄嘅衫，比姑娘幫我揀。   上奶 幸運地我上奶好快，生完第二晚已經石頭胸，漏咗好多奶（浪費哂我好珍貴嘅初乳呀！）。仁安姑娘好細心，有教我點按摩，點推走d 硬塊，通返d 乳線。我亦有問姑娘拎奶樽返房用手唧奶，睇見d 黃金初乳，真係好有成就感。唧出黎嘅奶我叫姑娘半夜先喂，其餘時間我都係好勤力咁跟返喂奶時間去喂奶，奶都係新鮮飲好！我自己就由入院開始飲炒米水，飲到滿月咁上下，唔知係咪我好食得飯，夠米氣，所以奶量都好夠。   bb 情況 黑珍珠做結構個陣已經照到佢有一隻腳指彎咗，生完兒科醫生黎同我總結bb 嘅情況都有提及過，到第一日親子時間我老公影相我睇，真係嚇親，比我想像中嚴重好多，第二日問醫生，醫生都有好詳細講解我聽，叫我唔好睇相，落到床親眼睇過就知無咁誇張，安慰我其實好普遍，唔係大問題，唔會影響行路。   而家9個月，黑珍珠腳指的確無出世個時彎得咁誇張，至於有無影響，我仲需要d 時間觀察。   另外，我喂奶個陣發現黑珍珠手腳會震，同姑娘講，佢地解釋我聽初生好常見，但黑珍珠震得好密，真係令人驚有其他原因（請體諒媽媽嘅神經特別緊張），姑娘見我一臉膽心，就幫我同醫生講，晏畫醫生特登黎解釋我聽，聽完心都定d。   仁安 nursery  姑娘真係值得一讚，我最後有寫thank you card比佢地，實在太感動，佢地令我嘆咗5日，好溫柔，好細心，bb 係佢地手都特別乖，証明佢地好專業。我掃極都掃唔到風，佢地兩三下就搞掂。喂奶又係，人奶啜咗10-15 分鐘，再喂奶粉，喂咗成粒鐘都係飲咗少少，但佢地喂bb 就好肯飲，真係覺得佢地有magic hand。 好可借我係last day 先醒覺一定要寫比佢地，無逐一mark 低佢地個名，如果我下次再去生，我一定要逐個記低，寫係thank you card 到。我唔知佢地會唔會有bonus(我以前做日本公司，收到讚賞的確有金錢以外嘅獎勵)，但我覺得by name 收到表揚係對佢地嘅認同，等佢地知道用心工作係無白費，對佢地工作有積極鼓勵嘅作用，希望佢地對下一個照顧嘅bb會更好。