琴日同太太、呀仔，仲有契媽一齊去行山，初次用孭帶挑戰由屯門既嶺南大學至何福堂之間的山路。可能最近大家都百無聊賴，所以行山人士的確比預期多。有時候在小徑走著，真係要講一句「唔該借借」，才能繼續前進。 沿途雖然未有如畫的風景，但睇住花花草草樹樹，吹住自然風，的確令人心曠神怡。最近疫情肆虐，未敢帶呀仔在街上大搖大擺，唯有趁週末到山上舒展筋骨。一路行都有路人搭搭訕，以下係我今日聽得比較多既說話： 「小朋友好叻喎！」 「你睇，BB行山喎！」 「加油呀BB！」 「勁呀，BB上到山頂！」 「好得意呀個BB！」 但係全程兩個多小時都係無人讚「爸爸勁喎有腰骨仲力大無窮好有男子氣概由山腳孭住BB一個箭步走上山頂唔喘下氣」！ 老實說，獲得別人認同與否對我黎講其實無咩所謂。 不過有啲時候，一個人忽略你既努力係唔緊要既，但同時間被一群人忽略，我諗大家都會有多少感受。容許我偷換一下概念。作為新手父母，有陣時總會聽到有人衝出黎話： 「BB禁細粒既？係咪唔夠營養呀？」 「以前都唔係禁湊既！」 「BB喊喎一定係餓/眼瞓/瀨左便便喇！」 「哎呀，搞成禁既？乜唔搽啲野呀？」 「咦，乜小朋友唔似你個樣，又唔似你先生既？」 「佢一定係需要抱/攬/錫/拖/餵喇！」 「我一早話左俾你知喇...」 「點解你唔呢樣果樣呢樣果樣呢？」 相信大家聽過既受過既，又豈止以上幾句？「原來隨便錯手可毁了人一世」係真既。有時候，一句閒言閒語可以尖銳得令人崩潰，無視一直默默的堅持。禍從口出，一出口便收不回來。既然係禁，話說出來前不如轉換一下角度，讓人聽得舒服，得到一份基本認同？始終，湊大一個BB背後的辛酸，只有為人父母才能切身體會。 你，最常聽見的又會是甚麼？ 泥圍爸爸的育兒時光 Facebook https://www.facebook.com/laiwaipapa/ Instagram https://www.instagram.com/kennethlaife/