[小熊與薯片兔的生活日常] 我的生產記歷 (子宮頸短媽媽/早產寶寶，一瞬間就改變決定) 子宮頸短媽媽的生產紀錄： 子宮頸長度： 3/1/2020 (21+3週) 2.8cm 20/1/2020 (23+6週) 2.58cm 17/2/2020 (27+6週) 2.5cm 11/3/2020 (31+1週) 1.5-1.72cm 15/3/2020 (31+5週) 1.2-1.4cm 16/3/2020 (32週) 港怡醫院0.5cm/ 瑪麗醫院 1cm 本來一早book 定左港怡醫院順產生薯片兔妹妹架..  結果，因為妹妹想早一啲出黎見我同爸爸，我地臨時轉左去政府醫院生薯片兔妹妹... 對於作為媽媽嘅我，私家醫院同政府醫院當然大不同啦.. 因為我生小熊時都係喺私家醫院生 (主要大不同係私家醫院可以真正地享受無痛分娩) ，所以臨時要轉去政府醫院生薯片兔妹妹我真係好驚... 以下係我今次嘅生產經歷，好彩最後比預期中冇咁痛同順利..  3月15日，我朝早起身後發現見紅 (加上訓覺前我都肚痛左一段時間先訓到).. 咁岩又遇上星期日，我睇開嘅婦科診所係冇開門的，所以我打俾婦科醫生，佢聽完我嘅情況之後，叫我入港怡醫院幫我檢查下情況... 1030am 就去到港怡醫院，登記然後上病房，跟住就開始種豆同打抗生素 (每隔4小時打一次)，然後等醫生... 醫生檢查完就開始安排注射安胎針同強肺針俾妹妹 (每隔12小時打一次).. 3月16日，0200am，我打左最後一次安胎針同強肺針.. 然後0300-0600am，我個肚不停宮縮痛，護士就幫我駁機聽妹妹心跳同計算宮縮次數，由於宮縮都比較密，最後護士半夜打左俾，醫生晨早到醫院幫我檢查，檢查時，發展子宮收縮情況嚴重，當時子宮頸只剩下0.5cm，妹妹週數只有 31週6天 (在私家醫院生產最低要求是足34週)... 同醫生商量後，醫生覺得我地情況比較適合轉去政府醫院，等待生產 (因為仲要等兩星期先會足34週，呢兩星期內，醫生可以幫我安排高劑量的類固醇安胎針，但係可能成效也不會太大，唔擔保能夠保胎到34週生產) 經過我同老公考慮後，我學決定由私家醫院轉去政府醫院生產..  因為我之前從來沒有喺政府醫院或健康院排期做過任可產檢記錄，所以港怡醫院幫我安排好救護車經 A&E 去瑪麗醫院生產.. 由於文件上和手續上交接的安排，港怡醫院嘅護士連同老公一起跟著救護車出發..  0830-0900am到達瑪麗醫院後，先在 A&E等候安排到產前病房，然後抽血/驗尿/駁機聽妹妹心跳等 (大致上沒大問題).. 接著就跟老公分開，展開隻身上場作戰狀態，留喺瑪麗醫院接受檢查和待產...   整天下午，妹妹都冇動靜，完全冇陣痛過，我如常玩電話，休息，食野飲野...全天都有護士定時量體溫，量血壓，用胎心機聽妹妹心跳等等... 直至3月17日，0000am 個肚又開始宮縮痛同見紅，雖然只有好少痛，護士都幫我駁機聽妹妹心跳同計算宮縮次數... 突然0100am 開始，宮縮痛嘅次數開始有少少頻密，護士就叫左醫生黎超陰超，見到宮口開始進入軟化狀態...  到0130am 到，feel到下體好似有啲野流出黎，唔知係血絲定係其他野，所以姑娘開始幫我check，佢開頭以為啲液體係頭先超陰超殘留gel，但睇睇下先覺得似係穿左羊水 (我都唔識分點先係穿水)... 護士又再叫左醫生黎，我都開始進入緊張狀態，因為當時我未係感覺到好痛，但就疑似穿左羊水... 醫生再次檢整，開左2度了，而且真係穿左羊水喇.. 0300am，我就俾人推左入產房，陣痛亦都密左同埋痛楚感覺大左.. 入到產房，護士俾左笑氣我聞，但我覺得啲膠味好重好臭，開頭死都唔聞，後來真係頂唔順，拎左個笑氣黎聞下，習慣左聞笑氣就覺得有啲幫助到減少痛楚嘅作用... 突然間，有一下感覺到妹妹要出黎喇，我就大叫，跟住護士嘅指示呼氣呼氣 (佢地不斷叫我當自己吹緊蠟燭)，推左幾下，妹妹就出左世喇.. 因為妹妹早產，細細粒 1.915kg，所以成個過程30分鐘內攪掂，冇傷口不用縫針，痛左一陣就okay，謝天謝地... 可惜，妹妹出世就要去加護病房，所以佢好快就俾護士抱走左檢查，出世後聽到妹妹喊聲就冇見過妹妹，連咩樣都唔知，要等到同一日下晝 0300-0800pm探病時間期間先可以去加護病房睇下佢 (即12小時後) 3月18日，”新冠肺炎” 疫情下的關係，醫院都問我想唔想早一日出院，我當然想啦，因為我想返屋企食好啲嘅野食 (按正常程序應該3日2夜/ 生產48小時後先可以出院，即是3月19日先係正常出院日期)  0300pm，我等埋加護病房探房時間，睇埋妹妹就同老公返屋企喇... 因為妹妹早產左2個月，所以都要留院觀察一段時間，黎緊就同爸爸輪流去醫院睇妹妹，希望佢可以喺醫院乖乖地，食飽飽早啲出院啦..  生產記錄時間表： 15/3/2020 1030am 到達港怡醫院 1115am 上到病房 1240pm種豆 0100pm打抗生素，每4小時打一次(因為32週，仲未check b鏈，打定俾bb有抗體保護) 0200pm打強肺針，安胎針，每12小時打一次 (因為32週，bb心肺功能未發展成熟，打定強肺針為妹妹早產做準備) 16/3/2020 0200am 最後一針安胎針，強肺針 0200-0600am 宮縮痛  0700am 見醫生做陰超，商量生產安排 0800am 上救護車 0830am 到達瑪麗醫院A&E，安排上產前病房 1100am 見瑪麗醫院的婦產科醫生 1140am入醫後，定時量體溫/抽血/量血壓 17/3/2020 0000am 宮縮痛 0130am 穿羊水，宮口已開2度 0300am 產房 0324am 妹妹出世(1.915公斤) 0328am 胎盤排出 18/3/2020 0230pm 辦理好出院手續，準備出院 0300pm 到加護病房探妹妹 (早產妹妹要留在醫院直至收到通知) *** 疫情下生妹妹： - 沒有陪產 - 沒有探病時間  - 家人可在指定時間送物資到醫院 (瑪麗醫院是 1000-1100am) - 老公拎野俾我都有可以，但要媽媽可以落到床，親自落到醫院門口取才可以 (需要護士批準) - 醫院全程帶口罩(吸笑氣時除外) #港怡醫院 #瑪麗醫院 #早產寶寶 #子宮頸短媽媽的生產記錄 #小熊與薯片兔的生活日常  #小熊與薯片兔媽媽 #香港媽媽 #香港blogger #澳門媽媽 #澳門blogger =============================== Facebook： https://www.facebook.com/jaynjocemami/ 生活易靚太 club： https://wow.esdlife.com/bi_be 香港媽咪幫 mamibuy：小熊與薯片兔媽媽 https://mamibuy.com.hk/home/19407