萬眾期待既芝芝終於跟左我地返屋企, 係大肚既時間我同老公2個就由奶奶家搬左出黎, 二口子自己照顧自己, 所以即係話呢個坐月期間都只係得我同老公2個自己一腳踢!   我係無請陪月,而老公亦係煮個公仔麵都煮唔到既人, 所以大肚既時候就訂左月子餐, 起碼先解決左食既問題,其實我真係好明白要坐好個月,坐好個月係可以令身體比以前好,  所以其實我都好緊張自己個月子嫁,等我一點一點講解下我既小小經驗同準備啦   -飲 飲呢方面相信大家都知道炒米茶呢樣野, 我都唔例外, 係生之前一個月我就自己用白米加三色米陳皮炒好, 再用茶包袋入去係雪櫃待用, 我都有放入走佬袋帶去醫院嫁! 我就預左自己一日三包, 有時都未必一定用到3包, 就算坐完30日月,我就會一直飲,飲到無晒為止先會飲返普通開水 -食 我岩岩都提過我係訂左月子餐既, 邊間我就公開講啦, 佢會有唔同既Plan, 而我就揀左一日兩餐既plan, 佢會下午12-1點左右用gogovan送黎, 因為我住既係村屋, 所以就麻煩老公每日落樓下幫我拎上黎 每餐都會有兩餸一湯,餸呢就會午餐同晚餐唔同,而湯就會一樣,好唔好食就真係好個人, 我就覺得唔錯,清清淡淡,但分量呢就一定足夠!間中仲有糖水送tim! -沖涼 大家都應該會聽過坐月期間接觸生水係對身體唔好, 先唔理佢點解,但既然咁聽, 就咁信啦,  我係呢個坐月期間都係好乖無接觸到生水, 咁沖涼點呢? 我一早就準備好薑包沖涼, 而薑包入面係有薑皮同艾草, 每次想沖涼果時就用熱水加薑包黎沖, 我亦有準備左薑皂,至於洗頭我都係照用薑水加薑皂洗, 只係洗完之後唔洗一頭都係薑味, 我就會用熟水再過一過水, 至於黎緊惡露既下身, 我會留返走佬袋既沖洗瓶, 用沖洗瓶入熟暖水沖洗, 沖洗瓶我仲會長期準備定係廁所,平時洗下手都有得用嘛! 其他野都無咩特別,都係照正常咁樣, 不過照顧初生BB真係一大挑戰! 下一篇就輪到講下點樣兩個P牌父母去照顧一個初生BB喇! 歡迎聯絡合作和活動,邀稿: Email: risako_ka@yahoo.com.hk Instagram: Tszyuchichi