用whatsapp、wechat等等嘅通訊軟件，已經成為咗大家嘅日常。 我唔太鍾意send語音畀人，總係覺得send得語音倒不如打電話聯繫來得直接。   不過，唔知道大家有冇同我一樣，有某些字總會打錯、唔識打、甚至係唔識寫。呢個時候「語音轉文字」就大派用場了。有時，佢真係會精準到令你覺得難以置信；但又有時，會出現你覺得好搞笑嘅字……   今早，我叫老公幫忙去買「鷹」粟粉，用嚟「醃」肉。 獻醜啦，成句說話我竟然有兩個字都唔識寫。咁就唯有用「語音轉文字」輸入法啦！點知出咗「英」粟粉同「葉」肉，之後要用英文「cornstarch」同「marinade」上網查先知點寫。 咁啱得咁橋，巴士經過，出現某牌子嘅蠔油廣告，寫住「醃肉一支搞掂 」，好似喺到笑緊我唔識寫呢個字咁……   呢個經歷嘅教訓，就係唔好太依賴「語音轉文字」輸入法。而家唯有多D睇新聞、多D寫blog，以免成為咗「一孕傻三年」嘅女人。