米豬响屋企冇咩搞, 睇視視都放寬咗好多, 最近佢好鐘意睇小丸子大電影 - 來自意大利的少年, 故事係幾感人, 我有幾幕都忍唔住喊 (講緊睇咗N次都眼濕濕), 主題曲 大原櫻子 - キミを忘れないよ 每次聽都覺得好感動~~ 嗚~ Andrea 唔好走呀.... 米豬睇完係咁同我講, 想去巴川睇水燈祭典, 好想去食章魚燒, 好想再去大阪同京都....   而家咁, 今年都唔駛飛啦..... 本身今年暑假, 爸爸真係諗住帶我地去巴川睇水燈祭典ga ma...... 而家邊度都唔駛去喇, 既然冇得飛, 媽媽整章魚燒比你食, 扮去咗日本啦~~   材料: 低筋麵粉 200g 蛋 1隻 味琳 2湯匙 鰹魚湯 200ml 水 200ml 鹽 半茶匙 八爪魚粒 32粒 椰菜 1/6個 章魚燒醬 適量 蛋黃醬 適量 鰹魚碎 適量   做法: 1. 椰菜切粒洗淨瀝乾   2. 先將麵粉, 蛋, 味琳, 鹽及一半鰹魚湯撈勻至無顆粒(可逐小加入鰹魚湯), 最後加入清水拌勻成粉漿, 倒入量杯備用   3. 高溫預熱章魚燒模, 加入油, 用廚紙捽勻每格 4. 轉中火, 加入粉漿至8分滿 5. 加入八爪魚粒, 再加入椰菜粒, 然後再倒一層粉漿到模中   6. 轉小火, 用2枝竹籤刮模邊多餘粉漿, 將章魚丸推到轉90度,  加入粉漿到模中, 再推章魚丸反轉成圓形, 全盤成型後轉中火再煮2-3分鐘至粉漿全熟   7. 把章魚丸放到碟上, 掃上章魚燒醬, 加入蛋黃醬及鰹魚碎, 食得 2歲以上咀嚼能力良好, 無海鮮, 蛋敏感可食   影片食譜>>按我<<   呢隻為食豬, 一知道食得即刻開心到呢~   煮食小貼士: 1. 搽油0個枝棍我上網學人整ga~ 搓軟一張廚紙做波, 再用另一張廚紙包住佢, 吉對筷子入去, 响邊邊位索條鐵線落去就用得 2. 去街食加玉子又要錢, 加醬又要錢, 我整咗牛油果醬, 撈埋一齊食原來好正ga~~ 下次試吓整蛋沙律撈先 3. 如果懶熬鰹魚湯, 可以用鰹魚粉加水, 冇鰹魚粉, 可以用1湯匙醬油+200ml水代替鰹魚湯 4. 如果小朋友已經聽得明指令同埋大個D, 可以叫佢幫手搞吓粉漿同埋放吓章魚粒落模~~ 比佢地參與吓好開心ga~   米豬豬的page~ 每日都update~  歡迎各位like & follow~ 亦都歡迎大家聯絡我同米豬豬一齊試用產品或合作~ https://www.facebook.com/NereusYu/