【 安妮媽媽的懷孕日記 @ 孕中後期QE產檢分享】 第一次見醫生（ 25w4d） 孕中期QE產檢，約左9點半見醫生。 第一次見醫生要準備: 身份證，住址證明，老公的身份證副本，留早上第二次的小便。 去到登記後就去護士房交低資料，就過對面房自己去磅重同量血壓，再同姑娘講番，之後拎番樽小便出黎驗。 如果好似我咁血壓低就要坐幾個字後再去量血壓。 之後就係等見醫生，要有心理準備要等一個鐘以上，因為實在太太太慢！ 今次仲要撞正當值醫生唔得閒，成班準媽媽要係度罰坐。 入到房見醫生，首先簡單問症，醫生會睇番之前係私家做的結構超聲波圖同資料。之後就上床用胎心機聽心跳，簡單檢查下個肚同胸部就完成，無得照超聲波。 ***醫生仲會俾埋張產科紀錄卡我，呢張卡好重要，要隨身攜帶，如果之後的孕期有任何懷孕唔舒服，見紅，穿水等，都可以直接上B座4樓產房，唔使先去睇急症。 今次我要求醫生開d孕婦維他命丸俾我，一次有8個星期分量，真係可以慳唔小。 第一次見完醫生後要再出去等見助產士，助產士主要係問番我孕期中有無咩唔明，又提我要入院生之前要塡寫好張*分娩程序指南*，入院生產時要直接俾姑娘。 分娩程序指南係要塡寫我想要的待產姿勢，鎮痛方法，生產姿勢和會否剪會陰等。 又講番一d餵哺母乳的資訊俾我聽，溫故知新。 另外俾左張政府產前講座的預約紙我，可以上網登記，但由於我上一胎已經全部聽過哂，所以都係留番俾d有需要的孕媽媽參加！ 見完出去再約4個星期後的期同拎維他命丸就走得，前後都攪左兩個幾鐘。 ========================== ** 政府免費產前講座，安妮媽媽推介: 「產前物理治療及夫婦齊學分娩球」，好有用，老公可以學到點幫孕媽媽按摩舒緩腰痛，但名額太小，要留意登記日期當日即book。 「輕輕鬆鬆分娩樂」，可以俾孕媽媽更清楚分娩的過程，睇下產房的圖片。 ========================== QE定期產檢（ 29w4d） 4個星期後又來QE覆診，今次只需要帶覆診紙，身分證。 同埋記住要留早上第二次的小便，食早餐前留起。 登記後又係自己去磅重同量血壓，再過護士房同姑娘講番，之後拎番樽小便出黎驗。就可以坐係出面等叫名。 今次見醫生仲簡單！ 入到房問你有無咩大問題，無就上床用胎心機聽心跳，簡單檢查下個肚就完成，快到2分鐘都唔使。 因為我有去私家產檢，所以要求醫生俾我可以遲多小小先再黎覆診，係呢個抗疫時期，唔想出入太多次醫院，最後醫生俾我5個星期後的36w番黎驗B型鏈球菌。 ========================== QE定期產檢（ 36w） 5個星期後又來QE覆診，步驟同上次一樣，仲要填寫健康申報表。 今次見醫生最重要係要驗B型鏈球菌，之後聽BB心跳，醫生仲會檢查BB的頭轉左落去未。 見完醫生約左下次的覆診期，就要過C4房抽血檢查有無貧血，之後就走得。 ========================== QE定期產檢（ 38w） 2個星期後又來QE覆診，步驟同上次一樣。 今次見醫生得知今胎中左B型鏈球菌，所以一作動就要即入院，生之前要打抗生素。 同埋我有同醫生反影BB朝早的胎動次數好似小過之前，所以檢查完要上病房聽BB心跳半小時。 見完醫生約左下次的覆診期，再去見姑娘，姑娘俾左張數胎動次數的圖表我，要我每天記下胎動的時間以作紀錄。 之後去急症室登記就上C2病房聽心跳，半小時後合格就可以走。 當然走之前要到會計部俾錢先，公務員家屬$68就ok。 ========================== 最後38週4天就生左弟弟。 希望這篇記錄可以幫助到有需要的孕媽媽啦。 ———————————————————— 歡迎連絡安妮媽媽： Facebook專頁： 安妮媽媽親子日記 IG: @Annie_mama_diary | 安妮媽媽親子日記