消失咗一陣，係未以為我夠鐘去咗生BB呢   妹妹仲未捨得岀嚟呀！！   我都好想二寶妹妹可以「退房」，唔好住太耐。 依家已經38週啦，個肚都幾大下，行動開始唔方便，夠鐘好岀嚟俾媽咪抱下啦。   今個星期終於肯動身執個「走佬袋」（二寶媽就是懶），同樣都係去政府醫院分娩，有著上胎嘅經驗，外加今胎的疫症問題，今次個「走佬袋」有少少唔同，多咗消毒用品。   等我分享一下去政府醫院必備「走佬袋」用品，希望幫到無頭緒，唔知要點執「走佬袋」嘅新手媽媽。   媽媽 (孕婦)用品 ▪️孕婦衛生巾: 無論順產或剖腹產媽媽都會有惡露，只係流量多定少的問題。建議帶定2包孕婦衛生巾比較穩陣，特別順產媽媽，下面有傷口，勤力一點換衛生巾，可以保持下體清潔乾爽，減少發炎。 另外，孕婦衛生巾有分黏貼或扣款兩種，媽媽可以問下自己間醫院要求用邊一款。 ▪️網褲： 產後姑娘一般會幫忙先著好網褲同衛生巾，順產只需留院三日兩夜，所以一包4條網褲都夠用 ▪️沖洗瓶： 呢個必須要帶，唔好唔記得 ▪️皇冠牌濕紙巾： 去完廁所用完沖洗瓶，再用濕紙巾抹下體，會更乾淨，仲可以直接掉入廁所內沖走。 ▪️洗漱用品： 牙刷牙膏，面霜，橡筋。其實住得幾日，簡單清潔就好，無咩時間可以扮靚敷面膜。 我就用紙巾代替臉巾，可以用完即棄。   嬰兒用品 ▪️初生尿片: 政府醫院唔提供尿片，媽媽可以買一整包初生尿片帶去。 又或者好似我咁，懷孕時會入唔同媽媽會，可以將尿片sample 儲埋一次過係醫院用。 個人建議，BB預計6磅或以下，可以用Huggies 0碼片。 而預計6磅或以上，可以用Huggies NB片或以上 Pampers ichiban NB片。 ▪️優質紙巾: 紙巾可以當紗巾仔餵奶時用，當臉巾用或去廁所時用。 所以要慎選紙巾，我揀Tempo係濕水後都唔易有紙碎，比較堅韌，而另一好選擇就係卷裝廚房紙。 ▪️濕紙巾： 主要用嚟幫BB清潔用，必須帶一大包先夠用 ▪️嬰兒手套: 初生嬰兒指甲都幾「利」，媽媽唔會一岀世就幫佢哋剪（那裡來的閒情逸致) 上胎試過生完第一晚，餵奶或空閑時，BB就自己劃花咗塊面，雖則佢哋皮膚修復能力好高，但套住手套都比較安全。 如果包住瞓覺時就唔洗套啦～   各大媽媽會入會尿片sample， 儲埋一次過係醫院用。     雜項用品 ▪️暖水壺： 產婦多數生完就會飲炒米茶，所以暖水壺最好備一個。我揀有杯蓋的，可以方便倒岀熱茶放涼，又可以當漱口杯，一物二用。 ▪️炒米茶(無岀現圖中)： 大家自行決定係未需要帶。 ▪️手提環保袋： 有時去廁所或想刷牙洗面時，要拎好多嘢，預備一個手唔細袋仔，方便一次過拎。 ▪️充電器： 醫院的電制用於醫療設備用，所以床頭電制有時唔俾產婦用，大家拎定一個已充滿電嘅大容量充電器，可以幫手機叉電，但記住要拎埋充電線呀。 ▪️防滑拖鞋: 必備用品，不解釋。 ▪️長襪（無岀現圖中）： 生產完的媽媽都會怕入風，所以帶對長襪可以保暖用。   消毒抗疫用品 ▪️消毒濕紙巾/搓手液/消毒噴霧： 因著新冠狀肺炎的問題，個人衛生好緊要。餵奶前後，或自己進食前後，消毒用品可以用來清潔雙手，而消毒濕紙巾可以去廁所時消毒座廁，仲之樣樣要小心。       抗疫口罩 ▪️口罩：無論進岀醫院或分娩時，有唔少醫院規定要配戴口罩，所以大家都要預備4-6個口罩係走佬袋。     ************************************************************ 免責聲明:本文章所發表的全部內容均屬個人意見及感受，並不代表該品牌之言論及立場。 如需協助或希望獲得更多有關產品資訊, 請直接聯絡該品牌查詢或尋求相關專業意見。   歡迎邀稿│合作試用│出席活動: 年糕 Email: lincolefu@yahoo.com.hk 年糕 Facebook: https://www.facebook.com/LINCOLE.LIN.GO 年糕 Instagram: http://instagram.com/Lincole_happy