相信好多準媽媽係籌備買BB野既時候都會收過或見過哩個checklist， 上一胎我都係跟哩個checklist 執走佬袋， 生完錢寶後發覺其實好多都唔需要帶的， 到今次第二胎，妹妹已經足月準備隨時出世， 又係執走佬袋既時候～ 跟據上次既經驗，同大家分享下有咩用品真係用到著或者可以簡化下， 始終個人認為，如無意外只係住2-3晚醫院， 何況係醫院期間其實都唔會咁得閒同咁有心機搞咁多野， 所以一切從簡，無論入院、住院同出院時都可以輕鬆Ｄ～ 媽媽用品： ✓準爸媽身份証：入院登記時用。 ✓產前檢查紀錄：如果一直有在廣華醫院做產檢，不需預備。 ✓床墊：防產後惡露太多漏出會整污髒醫院張床，廣華本身都會提供，不過以防萬一都會帶定。 ✓網褲 / 舊內褲：生完D惡露要用M巾墊住，網褲係用黎固定黏貼式M巾，舊內褲係帶扣式M巾用。廣華一般都係建議用網褲+黏貼式M巾，方便好多！ ✓孕婦衛生巾：其實一包全新既都夠用，萬一惡露真係太多，唔夠用先叫家人再帶多一包黎都唔遲。 ✓陰道沖洗器：用來沖洗陰道傷口，坐月期間都仍然有用。 ✓哺乳胸圍：其實哺乳胸圍係孕期既時候都有媽媽已經係戴緊，如果打算餵哺母乳的話可以著埋入院，可以選擇帶多件替換，但個人我連涼都唔打算係醫院沖，所以都唔打算會換。 x 乳墊、乳頭保護罩：一般產後幾日先會上奶出現滴奶的情況，加上大部分媽媽都唔需要乳頭保護罩，所以個人認為唔需要帶去醫院，必要時先再嗌家人帶。 x 吸奶器：如果打算餵哺母乳的話可以準備定，但唔洗一齊帶入院，一般都唔建議頭1-2日就泵奶，好容易會有石頭胸，加上廣華間哺乳室都有提供公共吸奶器提供，如真係有需要先嗌家人帶黎都唔遲。 ✓防滑拖鞋：生完bb好虛弱，鞋底一定要防滑，唔好貪方便帶酒店即棄拖鞋！醫院唔會提供 ✓廚紙：必備！代替普通去廁所用既廁紙，因為順產有傷口，用普通廁紙會痴晒落個傷口度。 ✓牙刷、毛巾、護膚品：為求簡化，我今次選擇帶一支旅行裝漱口水代替刷牙加一條小毛巾；護膚品就免了... ✓紙巾、濕紙巾：醫院無紙巾提供，需自備。 ✓保溫壺、焗茶包：產後不宜飲白開水，廣華醫院有熱水提供可以焗茶飲。 x 束腹帶 / 盆骨修正帶：唔洗帶，一般建議產後清左惡露先用。 ✓手提電話充電器：好重要！如果俾姑娘見到用病房床頭插座直接叉電會被阻止的。 ✓口罩、搓手液、消毒用品：疫情關系...連生仔都要戴住口罩生，所以要準備定多幾個口罩，仲有搓手液同酒精消毒已經係必需品。 ✓乾糧：可以帶定，如果咁岩你生完既時間岩岩過左醫院既食飯時間，咁就要捱到下次先有野食，會好肚餓... BB用品： ✓尿片：我帶晒係孕期拎到既NB sample去，都有十幾廿條，如果真係唔夠，醫院會借俾你，不過出院既時候要還。到時嗌家人帶番個數就OK ✓濕紙巾：幫BB換片時用，醫院唔會提供。 ✓凡士林 / patpat膏：幫BB換片時用，醫院唔會提供。 x BB沖涼用品：唔需要帶，醫院會幫BB沖涼。 x BB衣服：醫院有晒BB要著既衫、包被同被。出院時嗌家人帶一套BB入院衫就可以～ 助產物品： 廣華推祟自然分娩，如聽音樂、按摩、香薰等... 唔鼓勵聞笑氣及打無痛針分娩， 上一胎係產房既時候，姑娘開左音樂 + 俾左薰依草精油老公幫我按摩， 但我覺得只得薰衣草係完全唔夠!! 今次我自己準備左乳香同Valor精油～ 乳香精油對緩和疼痛最有效，乳香是分娩困難時的有效援助劑，幫助鎮靜和緩和呼吸。 Valor 精油亦可以舒緩陣痛既感覺，同時可以強化心理。 ---------------------------------------------------------------------- Facebook 專頁：Elvava Instagram：vava.ga