【 安妮媽媽第二胎QE生產記錄 | 二胎大不同 】 2020年4月17日 半夜凌晨三點開始覺得肚痛，以為又好似之前咁假宮縮，無理佢又繼續瞓，之後持續半個鐘痛醒一次，直到5點半果次覺得痛多左，就決定起身擦牙洗面，檢查多次入院袋，叫醒老公起身準備送我入院，再打俾婆婆過來照顧哥哥，快速食早餐。 聽人講話第二胎產程會更快，所以我地即刻搭的士去QE，點知好戲在後頭！ 去到QE拎住入院記錄卡就可以直接上B4産房。我要自己入去産房做檢查，老公幫我去登記辦理入院手續。 可能係疫症期間，護士都問得好詳細，也提醒由入院開始就一定要帶口罩，生BB時都唔可以除。 檢查後就可以去C2產前房，由於唔知仲要等幾耐，所以叫老公番去陪哥哥。 首先要上床聽BB心跳半小時，途中如果BB有郁就㩒一下制。 聽完心跳姑娘就檢查宮頸，話宮頸差小小就ok，要繼續等。。。。。 一等就等到下午5點，途中keep住5分鐘痛一次，每次陣痛都痛到入心入肺！每次痛到想死的時候，真心希望聽到姑娘話已經開夠度數可以上產房，但無奈一次又一次失望。。。 到5點半頂唔順係咁㩒鐘叫姑娘，佢地即刻入嚟幫我再檢查，經過14.5小時後終於終於終於開到2度，可以上產房喇！用最後的力氣執番好個入院袋就自己過床，打電話通知老公可以上產房後就要熄電話，之後姑娘會推我上產房。 仲記得上到產房一過床就係咁聞笑氣，隔住個口罩都無理，就係要不停吸不停吸！吸到姑娘不停提醒我，無痛就唔好吸住，要呼吸下新鮮空氣，但我果刻真係痛到無哂意識。。。。 去到後期真係以為自己會痛死係手術床上，直到生左弟弟出嚟，⼀抱住佢，前一秒發生過的事就好似忘記了一樣，只知道眼淚會不自覺地不停流不停流，相信呢個就係母愛，能戰勝一切！ 今胎完全體會到來回地獄又折返人間！ 邊個話第二胎會快d！明明第一胎3.5小時就生左，仲生得唔太辛苦，成個過程快狠準！但今胎總共用左16.5小時先生到出來，真係痛到入心入肺！ 但我真心要多謝QE成班的助產士，每個都好專業，都好細心溫柔，係自己孤單一人係產房時，佢地每次入嚟檢查都會為我講一些鼓勵的說話，到後期我最痛的時候都一直陪住我，真心感謝！ 因為防疫措施，醫院唔俾陪產和任何人士探訪，生完之後見過老公一面就入產後房，老公真係勁好，無得陪產但堅持係產房外等到我生完出黎，為的就係可以見到一面。 生完呢胎，正式封肚，我真係無勇氣再生第三胎了！ ————————————————- 歡迎連絡安妮媽媽： Facebook專頁： 安妮媽媽親子日記 IG: @Annie_mama_diary | 安妮媽媽親子日記