一般黎講，小朋友到左兩歲，家長們就會開始幫佢地戒片！ 男仔女仔嘅戒片方式都各有不同， 戒片辦法亦層出不窮， 以下純粹分享一下軒軒 在家戒片 嘅情況     軒軒而家係2y9m， 其實早喺佢歲半後， 有段時期我哋入洗手間佢都好鍾意跟住入嚟， 我哋照畀佢入， 等佢可以從中睇下我哋點樣去廁所vv， 然後嗰段時期我就順勢問下佢想唔想去馬桶度vv， 佢如果答咗想，我就幫佢除拉拉褲抱佢坐上我哋大人個馬桶（ 因為當其時都未幫佢添置任何裝備） 當然啦佢都只係純粹坐上去，係並無vv屙出黎， 但都唔緊要，最緊要係佢哋自己想嘗試！ 如是者幾日後佢就冇再有呢個要求， 即係佢心理同生理都應該未ready， 咁我都唔會強迫佢。 如果強迫佢令到佢抗拒咗反感咗就唔好 我就係呢個時間開始慢慢搵一啲裝備返嚟畀佢     第一樣添置嘅就係以下呢個小馬桶 其實初時我並無諗住買呢樣物品， 因為我一心諗住直接帶佢去大人洗手間， 後嚟買咗而家發覺都幾好用， 因為當有大人喺洗手間嘅時候佢就可以係呢個小馬桶度屙住先 一買到返嚟當然冇咁快識用啦， 畀佢坐下玩下等佢唔好咁抗拒先 呢個牌子嘅小馬桶係成功vv到後有音樂播出架     第二樣添置嘅就係戒片褲， 最少都起碼預五條！ 戒片褲可以承受到少少vv濕， 如果佢哋萬一真係屙咗落去， 都未至於咁快會成地都係vv。     第三樣添置嘅係底褲仔， 我盡量都會買返軒軒鍾意嘅公仔或圖案， 同埋選料係棉質。     自 歲半試過成日跟我哋入廁所睇我地點去之後就停左， 中間經歷咗個冬天， 費事濕咗又成日要除衫除褲驚冷親， 所以等到佢兩歲半， 春夏天嘅來臨， 我哋就正式開始啦     一開始我哋 喺軒軒瞓醒晏覺嘅時候就幫佢著上戒片褲， 間唔中幾個字左右就會問一問佢需唔需要去vv，頭一星期佢好多時都已經v咗落戒片褲， 但好在佢v咗落戒片褲之後都去小馬桶度坐一坐， 間唔中會有一兩滴屙咗出嚟係小馬桶度， 呢一個星期裏面試過一個半鐘ko咗三條 戒片褲 到第二星期開始佢慢慢就已經冇再整濕 戒片褲， 當然啦有時佢好專注做緊一樣嘢嘅時候， 趕唔切去洗手間都會整濕咗少少 戒片褲。       戒片褲其實質地都唔算通爽，但天氣就越來越熱， 呢個時候我就幫佢轉著底褲仔啦， 亦好在佢而家已經唔會再瀨濕落褲仔 雖然都係要keep住我哋間唔時問下佢需唔需要vv，但都已經叫做成功喺屋企戒左片 而家仲會早上落街食早餐同傍晚帶佢落街行下玩下， 都係直接著戒片褲或者底褲仔落去， 喺落街之前叫佢去一次vv先， 返到屋企再馬上叫佢去vv， 甚至有一次我同佢落街， 佢主動同我講咗一聲話佢好急， 我就馬上帶佢返屋企， 佢都可以成功忍得到幾分鐘路程 而家除咗小馬桶之外佢都可以喺大人馬桶到去vv， 仲識得自己冚蓋沖厠同洗手， 一set過自己做曬     下一步就要幫佢戒出街片 同企係度vv， 我相信佢應該都會好快成功， 因為如果而家同佢出街， 著住拉拉褲， 佢每次都會主動問我哋可唔可以vv落去 等遲啲成功埋再同大家分享     喺 戒片呢條路上面， 最重要係千祈唔好強迫， 好似拍拖咁， timing 係最重要， timing唔啱嘅話， 迫都迫唔到 因為小朋友未ready就係未ready。 而喺整個戒片過程，我從不講任何負面說話e.g. 瀨尿醜死怪， 咁冇用㗎…… 因為咁樣講會令到佢哋心理上會好唔開心！ 以為咁樣可以令佢哋快啲成功戒到？ 咁諗就錯喇！ 反而可能會令到佢哋對呢件事抗拒咗反感咗 要記得時常讚美佢， 不要吝嗇！不論大人或小朋友， 其實人人都喜歡被別人讚賞呢                     產品試用/活動邀請/其他合作 歡迎聯絡：tanleesharon2004@yahoo.com.hk 謝謝 Fb: [http://www.facebook.com/leessssfamily]