早排去KFC食野, 米豬食咗個蘑菇飯就鬼咁開心, 仲喉咗我啲巴辣香雞翼, 唔得呀真係太辣呀, BB唔食得ga ma~ (呢啲時候就係BB XD) 下次响屋企整返個餐比你啦~ 蘑菇飯個汁仲可以任添~ 仲配埋鮮搾橙汁~ OK?   材料(3人份量): 無激素雞中翼 12隻 有機蘑菇 10粒 牛上湯 100ml 有機粟米 1條 白飯 3碗 橙 2個(仔only)   雞翼醃料: 糖 2茶匙 片粟粉 2茶匙 五香粉 1茶匙 豉油 1湯匙 麻油 1茶匙   做法: 1.  雞翼洗淨抹乾後用醃料醃製3小時(最好過夜)   2. 蘑菇以濕紙巾抹乾淨後切片備用   3. 粟米起粒備用   4. 預熱焗爐180度, 準備2隻碟, 其中一隻放入5湯匙麵粉, 將雞翼薄薄沾上麵粉後放另一碟備用, 全部上粉後放入焗爐180度每邊焗7-8分鐘   5. 粟米隔水蒸5分鐘, 取出後拌入小量牛油   6. 溶化1湯匙牛油於煲內, 加入蘑菇片快炒, 加入小量鹽, 黑椒及百里香, 蘑菇出水後加入1湯匙麵粉, 炒至無水份後加入牛上湯, 煮至濃杰備用   7. 橙切開搾汁   8. 白飯放餐盆內, 加入蘑菇汁, 其餘分格分別放入雞翼及粟米粒, 完成   影片食譜>>按我<<   米豬見到我焗雞翼已經開心到不得了~ 係咁問食得未, 你睇個餐連枱墊都未舖就影相, 就知道佢幾咁心急啦~ 可以自己一個食晒成個餐喎~~ 食完會好大隻ga~! 手瓜起展呀!!! 千祈唔可以怯! 怯就會輸一世!!! 歲半咀嚼能力良好就食得喇~   煮食小貼士: 1. 雞翼可轉用氣炸鍋 (180度每邊6分鐘, 之後轉190度焗2分鐘), 或半煎炸 2. 懶嘅話粟米唔駛起粒ga, 劈開一半蒸熟後插隻筷子入去成枝拎住咬 3. 家鄉雞皇飯都OK ga不過米豬鐘意食蘑菇飯囉~ 4. 本身想整橙汁汽水ga, 但唔記得買梳打水囉~ 如果你地想整橙汁汽水, 可以梳打水:水 1:1咁溝~~ 有汽就更加有feel啦~   米豬豬的page~ 每日都update~  歡迎各位like & follow~ 亦都歡迎大家聯絡我同米豬豬一齊試用產品或合作~ https://www.facebook.com/NereusYu/