講到懷孕之苦，最辛苦嘅莫過於「孕吐」，短則3個月，長嘅真係嘔足10個月 (嘔到生)。   我第一胎嘅時候，孕吐維持咗4個月左右，但已經覺得好辛苦。每一日都好似暈船浪咁，完全唔想食野，見到d食物都想嘔，好擔心冇野落肚BB吸收唔到營養，所以食到幾多得幾多，每次食完都會嘔，唯有希望都有少少可以吸收到。   試過出街食完飯之後去廁所，聞到清潔劑味即刻嘔返晒出嚟。食物落唔到肚，唯有食孕婦維他命丸補充返，但喺裡面嘅鐵質令到便秘好辛苦，產檢時問過醫生可以點做，醫生建議獨立食鈣片同葉酸就可以解決到。   究竟食咩先無咁易嘔？原來乾身嘅食物喺冇咁容易嘔，好似餅乾、果仁呢啲，正餐食炒粉麵都會容易d落肚。食餅乾好似冇咩營養？但喺無辦法啦，起碼食咗冇咁容易嘔出嚟。而果仁喺有葉酸嘅食物，可以幫助BB腦部發展，每日都可以食8-10粒。   早餐可以食穀物片沖奶，會容易d入口，又吸收到營養。 到咗第二胎，孕吐情況更加嚴重，今次以為到4個月會胃口好返，點知都喺完全冇改善，每日最辛苦係諗午餐食咩好，平時鍾意食嘅米線、中式餸飯，因為有湯同有汁，諗起呢啲濃味同濕嘅食物都會想嘔。簡簡單單M記食個包？包都唔想食，因為都喺d軟同濕嘅食物，最後去咗Mc Cafe買乾身嘅蘑菇粟米芝士多士，雖然一食野都會有反胃，但喺慢慢食最後都食得晒，冇嘔到出嚟，應該都可以吸收到。 牛角包呢類都可以，不過未煮熟嘅菜唔好食，怕有李斯細菌。 生細佬之前嗰日係醫院，早餐食粥同烚蛋，我好努力食咗半碗粥，隻蛋就完全唔想食，諗住擺到晏d再睇下有冇胃口食，一直等到午餐、晚餐，跟住我唔小心撞跌咗隻蛋落地下，最後因為裂咗先唯有丟咗佢。   媽媽都可以參考下9大止嘔食物： https://www.eugenegroup.com.hk/article/detail/9%E5%A4%A7%E6%AD%A2%E5%AD%95%E5%90%90%E9%A3%9F%E7%89%A9   但每個人情況唔同，有d人都未必食得到。   雖然我兩胎都嘔得好辛苦，好擔心BB吸收唔到營養會太瘦，但喺最後，兩個仔出世都有6磅。細仔出世嗰時手腳都好幼，但喺餵咗兩、三個月奶，手腳都好快生返肉。所以媽媽們都唔使擔心，懷孕期間盡量食自己食到嘅野，需要時食返孕婦所需嘅補充劑，BB都一樣可以健康出世。   BB出世6磅，但手腳都好幼。 BB 3個月手仔腳仔都生返好多肉。