You ever feel like your brain has SO MANY tabs open? 我掃到一個post，原來一個腦每段時間有10-15個tab係開既。所以有時當老公同我講一樣野時，我個腦有時會不自主咁衍生起對嗰件事既不同睇法，或solution，或者有其他野。有時個腦太多野諗，就需要揾野去放鬆一下自己。可以係去一個靚既地方⋯ 食返樣comfort food⋯ 聽歌⋯⋯ 我呢排就鍾意blogging。 之前既我成日得個想字，想完又唔行動，人生總會覺得少咗份滋味。 所以開個blog可以有籍口將個『想』字，化身成行動。 我就係覺得對我自己同對坡士b妹同埋爸b都會一個正面既影響。 另外，唔知你地又會唔會好易悶呢？ 我成日食一樣野，就會開始悶。就算每日送坡士b妹返學，我都好鍾意得閒轉下路線。 我就係覺得生活要不停咁有新衝擊先好。 係咪好矛盾咁呢，之前又話自己宅女，又怕悶。 但宅喺家，都可以以家為中心發掘不同樂趣架嘛。例如，煮d新菜式、玩下新遊戲、聽同唱新歌、睇下新戲⋯⋯ 但事實上，有個小朋友就知道，喺屋企唔會悶，小朋友會帶黎樂趣，亦都會帶出好多不同既drama，日日新鮮鑊鑊甘。 所以你喺屋企想悶？問過個仔女先吧。 （話說適當既『悶』對小朋友係好事，會令佢地發揮到潛在既創意，亦令佢地有時間去深入發掘佢地所認識既事） 所以唔知打blog呢樣野有幾啱自己，但起碼覺得對自己同家庭喺現況係件好事。 亦都可以令自己脱離呢3年湊女既正常routine ，放鬆到自己心情，揾返自己。 無論你係小朋友、係青少年、係大人、係老人、係返工、係全職媽、係退休人士～ 都要適時為自己注入新既色彩呀   （送上前2日見既一丁丁 粗大彩虹） ---------------------------------------------------- Facebook: SINGAPORE.BABYDIARY INSTAGRAM: SINGAPORE.BABYDIARY