細佬8月4日一歲生日，今年只能在家簡單慶生，不過平淡都是福     2日後就到左番健康院打針嘅時候， 因疫情關係， 六個月以上嘅bb只能夠有一位家長陪同入去， 所以帶去健康院打針呢個重任就落喺我身上啦 係呢度要讚揚下老公，由軒軒到依家晞晞， 每次去健康院佢都必定會請假陪同一齊去，從不缺席不過今次無法啦     Booking時間早上9點，少人! 入門口前姐姐會每個量體溫， 同埋詢問bb幾大，確保六個月以上真係只得一位成人陪同， 盡量減少人流!     滿一歲bb可以著一條乾淨尿片磅重，晞晞7.53kg，比軒軒嗰時輕，由於晞晞六個月個次有7kg， 重得太少嘅關係， 姑娘都幫佢度埋身高：69cm 因為晞晞9個月大病過一次跌咗磅， 所以佢體重唔達標都係我預料中嘅事。     之後到見姑娘環節， 一如預期， 身高同體重都跌出哂生長線，不過只係跌好少好少，差1-2cm同0.5kg就可以入得番生長線。 而其他成長發展都無問題， 不過姑娘都安排我哋見一下醫生，等醫生睇下有冇啲咩大問題。     等見醫生就比較耐循例問番啲日常問題，無事就等打針。 一歲要打三支針： 麻疹、 流行性腮腺炎及德國麻疹混合疫苗 肺炎球菌疫苗加強劑 水痘疫苗 一邊大脾打一支，另一邊大脾打兩支 晞晞打第一支時只係喊左兩聲，但另外兩支打時keep住喊不過抱番就無事     最後去拎埋退燒藥就得。 要留意：打針後3-12日內可能有機會會發燒 下次就歲半先再返去囉~                   產品試用/活動邀請/其他合作 歡迎聯絡：tanleesharon2004@yahoo.com.hk 謝謝 Fb: [http://www.facebook.com/leessssfamily]