[小熊與薯片兔的生活日常] 疫情下回澳門 新冠肺炎疫情大上大落，5月份同6月份疫情緩和，還以為有希望可以開關返澳門免隔離。結果，希望越大，失望越大。最終，我同爸爸決定帶返小熊返澳門隔離14天，然後過啲正常少少的日常生活。(可惜妹妹啲覆診係跟住香港醫院同醫生安排，所以短期內，我地將妹妹交低俾婆婆湊。因為實在冇辦法來回港澳無間斷地隔離)   最後決定喺8月3日入境澳門，當時入境要求要持有7天內有效嘅陰性核酸檢測證明+到指定酒店隔離14天。呢次返澳門，心情好緊張，提前準備好多野。 - 7月尾時，我同小熊都做好核酸檢測  - 收拾行李  - 同爸爸溝通好，準備好喺澳門補給物資  - 購買金巴車票 (因為疫情關系，要預先喺金巴嘅網站購票，每班車都有指定人數) 隨行行李準備： - bb車 - 水樽  - 奶粉 麵包 果汁 (因為到達酒店時，應該未到送餐時間) - 儲奶樽 儲奶袋 羊脂膏 奶泵 充電器 - 哺乳其間維他命丸 - 電話充電線 外置充電器  - 紅外線額探槍  - 尿片 濕紙巾 patpat膏 換片墊 - 消毒噴噴 酒精手液 bb搓手液 酒毒濕紙 - 大人口罩 bb口罩  - 旅行裝沖涼液  - bb證件 身份證 簽 (入境填表用)  - bb安撫公仔/玩具 (因為由香港到達澳門隔離酒店，連埋到醫院做核酸檢測，一共需要4-5小時) - bb衫褲1套 媽媽衫褲1套 內衣 抹身巾(到達隔離酒店時，馬上沖涼更換) - 膠袋 (到酒店裝污糟衫同鞋用) 返澳門當日，我地預訂12:00hrs 金巴車票，到達隔離酒店時，係16:00hrs。我同小熊朝早起身，食左一個豐富飽肚啲嘅早餐，就準備出發。小熊叔叔車我地到達港珠澳大橋香港口岸，我地預早左半小時到達(因為怕過關時對文件同手續會比平時需時較長)。到達後量體溫，就出示身分證，bb護照同陰性核酸報告過關。然後到金巴櫃檯出示QR code取票，金巴職員會再次要求出示陰性核酸報告證明，同時會俾份表格你填，上面主要填寫個人資料(姓名，電話，地址)。取票及填表後，就安排上車了。   大約13:00hrs， 我到達澳門口岸。到達後，要網上填寫澳門健康碼，同埋填一式3份的入境聲明，內容大概係同意接受隔離安排。填表後，逐一見海關同衛生局職員，交出護照(護照會在統一辦好過關手續後先派返)。由於會逐一會見同解釋隔離安排，所以整個過關過程總共用了1個多小時。   14:15hrs，我們被安排上指定旅遊巴，出發到山頂醫院逐一做鼻咽式核酸檢測，需時約1小時。15:30hrs，當所有人做好核酸檢測後，再次上旅遊巴到酒店，然後逐一安排上酒店房。   漫長嘅14天隔離展開。 到第12天，澳門衛生局會到酒店再做一次鼻咽式核酸檢測。然後就會喺第14天收到衛生局關於退房訊息。第15天早上，10:45hrs左右就退房，到酒店大堂量體溫，收取陰性核酸檢測報告，就可以離開酒店喇。 #疫情下生活 #澳門隔離日記 #小熊與薯片兔的生活日常  #小熊與薯片兔媽媽 #香港媽媽 #香港blogger #澳門媽媽 #澳門blogger =============================== Facebook： https://www.facebook.com/jaynjocemami/   生活易靚太 club： https://wow.esdlife.com/bi_be   香港媽咪幫 mamibuy：小熊與薯片兔媽媽 https://mamibuy.com.hk/home/19407