半夜穿水： 7月17號，剛剛38 weeks 0 day, 正式開始放產假，以為終於有時候慢慢收拾BB物資。凌晨2am，去夜尿的時候，一開始以為自己漏尿，因為未到廁所就底褲濕左，但發覺一行就出水，心感不妙，立刻叫醒老公。老公以為我好痛，其實係咩感覺都冇，好彩走佬袋一早執定，於是立刻飛的士去醫院。 瑪麗醫院產前病房： 直上K9南翼，去到才2點半，登記、量血壓，好快就有醫生來檢查，醫生放左個儀器入來，然後叫我咳幾聲，一咳就有羊水流出，醫生話我知，“你真係穿左羊水”，跟住問我想等自己作動或是催生，然後俾了很多份文件我睇，叫我翻埋床慢慢睇，睇完同意就簽名，同意書包括切陰道，若果有意外的話，醫生會如何處理，等等。 翻埋床位後，安撫老公，跟住老公就被姑娘趕走了，然後就被綁上胎心監測儀，同時自己要拿住個按鈕，一感受到BB任何活動就要按一下， 於是，我就完成沒有訓過。 產前病房不時傳來其他產婦痛苦的呻吟，無論胎動幾頻密，無論你有幾痛，你未開3度都係繼續在產前病房苦等。 檢測胎心胎動大約一個多小時，護士過來睇我簽曬文件沒，詢問我等自己作動或是想催生，我考慮到穿水後感染的風險，所以決定催生，但就想等天光後，因為想食埋個早餐，等自己有氣有力，護士表示可以，叫我休息等待。 產房催生： 早上7點幾，食嗮醫院的一大碗無味粥。 8點幾，醫生巡房，問我有冇宮縮，我話沒有任何感覺，也沒有見紅，跟住醫生就同我確認了催生的安排。 8點半，我就被推去產房，綁上一部測宮縮，一部測胎心的機器。跟住手機被強行要求關閉，話會影響儀器準成度。 早上9點，準時開始打催生藥，由每小時6ml開始注射，慢慢觀察身體反應。我問護士，係咪可以坐波，據聞坐波可以讓度數開得快D。點知唔夠波，於是姑娘推了一張大凳俾我，叫我扎馬咁坐，得閒又轉下個下盤。 10點就加到12ml 每小時，11點加到18ml, 我都係沒有太多反應，偶然有宮縮，但都唔痛。因為沒有陪產，負責照顧我的護士就陪住我，播音樂俾我聽，同我吹水打發時間。因為不是太痛，我就好努力地慢慢做深蹲。 中午12點，催生藥加到24ml每小時，開始有痛的感覺，宮縮開始10分鐘一次，大概12點半開始，宮縮開始接近5分鐘一次，每次20秒左右，痛的感覺開始強烈。我拒絕了聞笑氣，因想先用呼吸法緩解疼痛，免得之後再痛得厲害時就沒有法寶了。 下午1點多，醫生巡房，醫生話我羊水太多，阻住阿B個頭落來，要幫我放些羊水出來，放羊水的感覺不是痛，只是很不舒服。然後醫生告訴我，你已經開了4度了。 下午1點護士們交更，早上活潑開朗的護士叫我繼續努力，然後離開了。下午更的護士是個十分溫柔的姑娘，她鼓勵我話， 頭3度係最難的，叫我繼續努力，並且幫我搵左產球過來，她扶住我在產球上活動下盤。 開始堅痛 1:30pm, 宮縮的感覺開始越來越頻密，我無法再用呼吸緩解疼痛，開始聞笑氣。 我開始覺得時間無限漫長，我唯一可以做的事情就係望住個胎心監測儀，鼓勵自己“好快可以見到臭臭B啦！” 宮縮開始伴隨著腰痛的感覺，陪住我的護士姑娘好溫柔地幫我按摩腰。不知為何，我聞笑氣讓我有想嘔的感覺，並且完全唔覺得笑氣的減痛效果，姑娘俾左TENS止痛機我用。 TENS止痛機可以調節不同的電波強度，分散痛感，我覺得這個工具最好用！到生的時候，我幾乎要開到最大力。 3pm左右開始，急屎的感覺開始出現，這是因為胎兒下墜壓到直腸而產生便意，急屎的感覺讓我好想用力，但姑娘一路提醒住我，叫我千萬不要用力，否則會讓肛門腫大，生的時候只會更辛苦。 宮縮的密度，急屎的程度，腰痛的感覺，全部都越來越強烈！ 3點45分，叫左醫生來來檢查，醫生話：你已經開左9度了，應該可以在一個小時生！聽到這個消息我又開心又氣餒，開心係終於開了9度了，氣餒的是，點解仲要痛一個鐘頭！！ 4pm, 入來了2個姑娘，開始圍各種布，拿工具，而我急屎的感覺也越來越強烈，陪住我的姑娘一直提醒我千其不要用力。 最後一擊 4:10pm, 來了幾個助產士，教我如何發力，終於獲知可以開始用力了。始終係新手，未能立刻掌握她們教的用力姿勢，然後開始用力時，好自覺會發出聲音，點知被人批評說我浪費了力氣在發聲音上，我真係好無辜，我覺得是自己本能反應要出力時有聲。 下一次宮縮又來了，我想出力，但測量宮縮的機器未能顯示我正在宮縮，助產士話未到，但我真係覺得好痛好急屎，助產士擔心我係痛到分唔清楚，但見我十分肯定就無奈話俾我試下。現代醫療的悲劇就係太相信機器，我用力後，事實證明我的感覺時對的，助產士話睇到BB個頭了。於是，助產士開始唔睇機器，叫我自己感覺到宮縮時就用力。 第二次宮縮用力後，都係唔夠力將阿B推出來，助產士BB心跳開始低，話要call兒科醫生stand by，同時告訴我需要切開會陰方便BB出來。在會陰處落了麻醉針，小小痛，但好快就被第三次宮縮的痛蓋過了。 我知道要更加用力，因為阿B已經卡在產道一段時間了，我用力的時候feel到助產士同步在切開我的會陰，產房內所有的護士都在大聲叫“就來得啦，用力”。 “個頭出到來啦”，當我聽到哩句，成個人都鬆一口氣。 個身好快跟住出來，好似唔洗點用力，助產士將阿B丟在我身上，可能卡在產道太耐，阿B成個人都係紫黑色的，見到果下都好震撼！姑娘好快手幫阿B抽走口內的羊水，減臍帶，跟住姑娘就比我睇阿B個池菇椗，告知我係仔仔，再叫我認清楚阿B個樣，然後就話要抱去俾兒科醫生檢查。 而我就繼續乖乖地捱埋縫傷口的痛，傷口未縫完，阿b就已經檢查完畢送翻來我身邊，告知我一切正常。 拖左成個幾月才有時間精神去寫下這個過程，希望每一位待產的媽媽都一切順利！