今胎生二寶坐月同上胎的確好大分別，上胎都有老公、媽咪、老爺奶奶同工人姐姐幫手，但今胎好多嘢都要一腳踢。疫情之下就連叫媽咪過來幫輕下都要三思，皆因之前同樓有人確診，為保障大家安全同健康，都係親力就為好啲。   好彩嘅係有咗第一胎嘅經驗，知道應該點去預備燉湯同炒米茶俾自己。 亦感謝媽咪一早幫忙炒定咗啲炒米同黑豆俾我坐月用，藥材方面奶奶都預早幫我打點好。 Pack米茶方面就有小JM幫手同我一齊Pack一齊分擔，而JM爸就負責幫我整燉湯坐月飲。   媽咪成日都話坐月坐足100日先係最好。上胎我坐月都係坐足100日，所以今胎亦唔例外。   今胎我主張餵母乳，希望可以保持心情放鬆、愉快同盡量多休息以助上奶！   今次小JM媽媽就為大家介紹多款坐月炒米茶及上奶米茶，希望可以為各位人奶媽媽打打氣！     坐月媽媽必備良品    －「炒米茶」 三色炒米茶 製法：  －    先洗淨白米、紅米、黑米或糙米，待乾 －    再用白鑊將米炒約十分鐘至微微金黃即可 ＊白鑊，即係無任何油鹽糖既調味＊   待炒米攤凍之後就可以用器皿盛載，以便日後用來沖「米水」之用，所以建議有時間可以一次過炒定多啲，唔駛要用先炒咁麻煩。   米米的功效：  紅米 －養心、補血 黑米 －補腎 糙米 －健脾補脾   媽咪話坐月要飲米茶飲足100日，咁自然會想要多啲口味同變化以保持新鮮感，唔駛下下飲埋同一款咁悶呀嘛。 今次坐月都飲過不下八款米茶，頭一個月主要以坐月米茶為主，第二個月就開始會飲下上奶米茶當轉下口味。     坐月米茶： 第一星期主要以陳皮米茶為主。 材料介紹: 陳皮：健脾、行氣，順產開刀都啱飲 圓肉：止血安神、益心脾、補氣血 杞子：補肝腎、益精氣、改善面色、明目安神 南棗：補中益氣、養血安神 黨蔘：補中益氣、健脾益肺 北芪：   1.) 三色炒米 + 陳皮   2.) 三色炒米 + 陳皮 + 圓肉 + 杞子   3.) 三色炒米 + 陳皮 + 圓肉 + 杞子 + 南棗 + 黨蔘   4.) 三色炒米 + 陳皮 + 圓肉 + 杞子 + 北芪   上奶米茶： 我由第五星期開始先飲上奶米茶 1.)　三色炒米 + 黑豆 + 無花果   2.)　三色炒米 + 黑豆 + 陳皮 + 黨蔘   3.)　三色炒米 + 黑豆 + 通草 + 黨蔘   4.)　三色炒米 + 南棗 + 沙蔘   5.)　三色炒米 +  陳皮 + 通草 + 南棗   因為今胎自己坐月，所以會預早包裝好啲米茶，方便一包包拎來煲。 我係臨生二寶前就已經同小JM一齊Pack咗頭一個月嘅米茶，到飲到差不多就再請小幫手一齊Pack米茶包，順便當係親子活動啦！小JM仲可以從中學識分辨其中一啲材料添，仲知邊啲可以即食～ 圓肉就例牌會被小JM偷食打斧頭。     舊文重溫: 母乳系列。泌乳湯水。炒米茶:  https://bit.ly/2QqSXAV