最近又開始為妹妹開刀生定勇敢的試順產煩惱中，諗返起上年5月開刀生竹竹好似唔係好耐，趁自己仲記得，寫返個經歷先 ⠀ 開刀醫院 我既婦產科醫生係3間醫院掛單：浸會、法國、仁安，綜合左 1/環境、2/價錢、3/餵人奶既support，最後我揀左仁安醫院，雖然醫院同我屋企距離好遠，（灣仔<=>大圍）但係開刀係預約時間去，所以都唔太大concern既。⠀ ⠀ 開刀時間 我係照完結構就book私家醫生擇時辰開刀，因為係晏晝3點開刀，正正係醫生既診症時間內，所以會有附加費用；姑娘亦提醒我，手術當日9點先要入院同開始禁食，晏晝開刀好處就係唔洗提早一晚入院，可以住足package既5日4夜⠀ ⠀ 手術前 當日到達醫院，就去入院部登記手續，搞掂之後就上去3樓婦產科見姑娘等收症，做晒最初步既登記，姑娘就會幫媽媽剃毛、抽血、同駁1個鐘胎心機，無問題先會帶我入病房等手術時間。⠀ 我大概係房等左個幾鐘，姑娘就黎比左粒止嘔藥我食，同埋提我要換定手術袍，將身上所有頸鏈、手鏈、耳環除晒！趁呢個時候，一定！一定！一定！要去沖返個涼（唔沖就無得沖架啦，起碼到12朝）⠀ ⠀ 手術期間 姑娘推手術床入病房，叫我自己爬上去，就會推我入手術室，老公一直都陪住我落去，我入手術室預備，佢就去等候室換袍，準備一齊入去見山竹既第一眼 ⠀ 手術室姑娘會再問多次好多問題，例如你叫咩名，知唔知自己將會做咩⋯⋯推我入手術室果時已經見到醫生同麻醉醫生都準備好晒（其實果時我已經驚到想喊）⠀ ⠀ 麻醉醫生話開始打麻醉藥，要我一定要配合佢，盡量卷起個身抱住膝頭，佢就打藥入到脊骨，之後姑娘會幫我訓返平，攤開兩隻手，放暖風機入手袖，等我唔會打冷震，醫生會測試我下半身既感覺，直到我開始有種麻痺既感覺，佢就話手術好快會開始，同時間老公都入左手術室，坐係我隔離陪住我喇！⠀ ⠀ 事後睇返老公影既相，原來成個麻醉過程只係6分鐘 ⠀ ⠀ （寫住咁多先，開刀過程下回待續）⠀ ⠀ #開刀生產⠀ #剖腹分娩⠀ #仁安醫院⠀ ⠀ ——————————————⠀⠀ ❣️IG : www.instagram.com/tamsiumoon⠀ ❣️Fb: www.facebook.com/tamsiumoon0521 ⠀ 歡迎任何關於煮食、嬰幼兒活動邀請、產品試用合作⠀ ⠀⠀ #山竹媽X竹竹日誌 #新手媽媽 #竹竹 #育兒日誌 #二寶媽 #孕媽媽 #孕媽咪 ⠀⠀ #加固心得 #母乳餵哺