我同Alfred 實在太耐無出去玩啦！趁佢幼稚園最後一年生涯，加上佢而家強制轉咗讀下午班，所以趁朝早有啲時間，就同佢嚟個「拍拖」日，好好享受一下只有我同佢嘅親密時光先（細佬乖，您大個啲先帶您出去玩呀）！今次我就揀咗一條比較輕鬆好行，行行中途又有地方可以HEA 下打下卡嘅龍虎山。   龍虎山位於港島西，由香港大學出發，沿路會途經三幢白色小屋嘅龍虎山環境教育中心，亦係我哋今次去郊遊徑嘅主要目的地。教育中心附近環境清幽、空氣清新，加上教育中心外觀打卡影相一流，內裡亦有推廣龍虎山生態發展，好適合一家大細去睇，而且更係免費開放呀！原來唔講唔知龍虎山環境教育中心現已分別列為一級及二級歷史建築物添呀！！！ 佔地約3,000呎嘅環境教育中心，包括水池花園，130年歷史建築英式小白屋，中心除咗介紹龍虎山的歷史、生態、地質與人文故事嘅恆常展覽外，亦會不定期舉辦主題展覽呀！    水池花園： 內有一個小小生機池，同埋花園內有唔少植物，部分以有機方法種植嘅。 ▲水池花園 ▲到手香驅蚊香草 130年歷史建築英式小白屋（龍虎山環境教育中心）： 當初上網搵好去處嘅時候，我就係被呢座英式小白屋吸引到。講真，呢度影相打卡真係好一流，既然一場嚟到，緊係要同我位小情人影多幾張相留念啦！另外，原來呢度，前身係西環濾水廠平房同職員宿舍嚟呀，而家就分別列為一級及二級歷史建築物。                 環境教育中心除咗外觀影相靚之外，其實內亦有唔少關於龍虎山以及香港大自然相關嘅歷史、人文同環境生態嘅資訊性資料呀。我同Alfred都係第一次嚟，入面其實都幾多嘢啱小朋友睇。 喺接待處位置就有唔同嘅書本／單張比大家取閱，仲有展示咗附近出現過嘅動物嘅片段同相。Alfred話估唔到，附近夜晚會有咁多佢從未見過嘅小動物，好似箭豬同果子狸咁！另外，仲有一啲真實嘅動物羽毛同巢穴可以比大家觀賞。     ▲Alfred超鍾意呢本「動物眼中的世界」   ▲睇咗超耐XD   ▲唔同動物標本、巢穴同雀仔羽毛     至於展覽廳入面就有唔同種類嘅昆蟲、植物、岩石標本、寶珊道山泥傾瀉因由、龍虎山一年山林物侯短片／相片介紹及動物發聲板等。而我哋就對昆蟲標本最感興趣，現場仲提供埋放大鏡比大家，Alfred第一次用放大鏡，佢好認真去睇下每隻昆蟲有咩唔同同分別！   ▲昆蟲種子標本         ▲植物標本     ▲香港岩石介紹   ▲寶珊道山泥傾瀉因由       ▲龍虎山一年山林物侯短片／相片介紹         咪睇呢塊板平平無奇？其實佢係動物發聲板，用手觸摸黑色嘅動物剪影圖案，就會發出該動物嘅叫聲架啦！     如果大家有時間嘅話，其實可以由半山克頓道郊遊徑上龍虎山郊野公園、松林砲台，甚至可以行到去山頂或薄扶林水塘。而且路線算係比較舒適易行，適合親子同遊！           最後，溫馨提示： -郊遊時，保護環境，自己垃圾，自己帶走。 -如行山前一定要做足準備，量力而為，安全至上。 -疫情緩和都唔可以鬆懈，記得勤手洗/搓手，勿摸眼、口、鼻。   【龍虎山環境教育中心】 地址：香港半山旭龢道50號（近大學道入口） 開放時間： （星期二、四至日）上午 10:30 至 下午 5:30 （星期三）上午 10:30 至 下午 2:30 網址：https://lungfushan.hku.hk/ ======================================== （以上資料更新至撰文當日） 聯絡電郵： alfredbb325@gmail.com 最近開始玩IG，歡迎追縱：allaboutalfred 最近開始玩YouTube，歡迎追縱： allaboutalfred 追踪更多育兒生活分享，請按 Alfred 成長日記      駐站BLOGGER: