距離預產期愈來愈近，作為新手媽媽第一胎咩都唔識，成日都會想像自己會係咩情況下入院生囝囝出來。年頭上網睇，話因為疫情關係無得陪產，同埋話要戴住口罩聞笑氣，搞到有D擔心。好在之後產檢問左姑娘係可以陪產同無規定要帶住口罩生仔嘅，但就無得探病。本身預產期係6月25日，係伊利沙伯醫院(QE)最後一次產檢時，已跟醫生預約了如BB仲未出世就27號入院催生。但就係39W5D零晨…BB已經準備好出來同大家見面了!             回憶起當晚，晚上11點幾仲係到食西瓜，BB當晚係肚到都比之前活躍搞到訓唔到，我都有諗會唔會就係今日呢? 之後大約3點我被樓下住戶的煙味攻到很不耐煩，便起身去廁所，誰不知一上返床個下就卜一聲！穿！左！水!! 我立即拍拍老公話 :「穿左!穿左!」訓到死豬的他，仲唔知發生緊咩事。。。回過神來就立即同我一齊收拾行裝準備楂車出發去醫院。穿水真係好誇張，漏到我去到醫院訓係床到檢查個刻仲係咁漏，所以提提大家走佬時要帶多兩條大毛巾墊住，因為真係勁濕。身為公務員親屬，所以例行問下有無頭二等房。唔知係咪疫情小左人去公立醫院嘅關係，非常幸運地竟然有頭等房!姑娘便立即幫我預留床位並安排我直入B4產房。                 去到早上6-7點我都未出現陣痛，姑娘就安排打催生。等下等下開始有小小痛，普通經痛咁，姑娘仲提我聞下笑氣可以任吸。產房環境唔錯，老公仲係到睇電視。。。去到中午又再痛D，姑娘問我考唔考慮打止痛針(瑪啡)，因為要打就係開左3度前打架喇，咁我就打定先啦因為驚唔知生幾耐架嘛。嘩…跟住就開始哩料，D陣痛一下下咁來，我就不斷係咁叫老公過來幫俾笑氣我聞。之後個兩三個鍾其間，醫生好似入過來兩次CHECK度數，跟據老公目睹，話覺得佢CHECK時仲恐怖過生仔個下。而我都已經痛到傻傻下，所以唔係好記得發生咩事lu哈哈! D姑娘一出左房，我就會痛到同我老公咆哮，按左兩次鐘仔叫人入來睇都話未夠度數生住! 最後，個種陣痛就係一下前一下後，感覺好似呀囝要係下面衝出來咁，真係頂唔順。。。再叫姑娘來，佢望多兩望，終於話可以試生喇!個下心情幾期待快D完。期間隔離房都有媽媽試生緊!佢叫到好大聲令到我都嗌埋一份!!一到生姑娘們就係咁係隔離加油加油不斷打氣，氣氛緊張得來其實都幾趣怪開心。之後半個鍾左右，BB就出世喇!身為細碼媽媽嘅我生左個3.7kg的大碼BB出來，過程很順利，好感謝QE的醫護人員。姑娘抹乾淨BB後就俾我地抱下仲幫我地影相留念，非常貼心!                        生完BB就過床推返我上A11病房休息喇。雖然咁多個鐘無訓過，但迎接新生命嘅喜悅已蓋過左一切，剩係同大家報喜都唔得閒訓。哩緊醫院三日兩夜嘅體驗再係下集同大家分享啦。