Shopping..Shopping.. 有邊個女人唔鐘意Shopping?  我相信唔只女人，男人都愛shopping，只係買既野唔同。 我係一個「購物狂」，只要有能力，自己又鐘意，我會買到收唔到手。 懷孕前，買既都係圍繞自己，老公同屋企人，一睇到岩佢地既野，我就會買。我好有儀式感，生日，節日，無論係咩野特別日子，我都總有理由去買野。 到懷孕後，所有野都要以少少為優先。係買bb野之前，我已經上網睇左好多唔同既網站，吸取左唔同既意見，有啲咩應該買，有啲咩唔洗買；又或者邊個牌子好啲，邊度買平啲。我足足溫左兩個禮拜書，比較左唔同既意見，網站，寫埋shopping list，先出動。 咁岩撞正bb展，仲唔係我出動既好時機。我臨出發前，已經登記哂所有可以登記拎禮物既網站，一去到就唔洗等啦，節省時間。 朝早同老公好早就出門口，一食完早餐，就揸車出發。我以為我地已經好早，點知好多人俾我地仲早丫。去到會場，已經有成一大半人啦，好勁丫。 入到去，頭腦清晰既我，就拎住我本shopping list，去相關既展覽攤位，拎試用裝，拎禮品同買野。當日我買哂所有少少要用既野，例如要著既衫仔，包被，浴巾，紗巾等。跟住就去左睇bb車，但係睇極都好似唔係好岩心水，又或者係未確定要買邊類型既車，所以就放棄左。 然後就去左買bb既清潔用品，因為俾bb著既衫仔又或者要用既物品之前，都要清潔過先可以俾bb用，所以一定要買清潔用品。由於我地已經買左好多野，老公亦都兩個膊頭都滿哂。我話要幫手拎，佢話佢要展現「爸爸力」，唔準我拎野，所以我地選擇左送貨服務，咁就唔洗拎得咁辛苦啦。 當日係bb展，洗左好多錢，但我同老公都好開心，因為所有野都係我地親自挑選，俾我地既少少。而哩兩日亦都陸續收到電話，係送貨黎既電話，好開心，超期待。 少少，爸爸同媽媽都好期待你既來臨丫，我地既小寶貝。