上回講到生完返上A11休息。好好彩我可以有頭等房住，先講下環境，窗口個境幾開揚，個時係黃昏時間望出去都幾靚。間房有兩張梳化椅，有個雪櫃仔同電視。單人房有獨立廁所整體都乾淨舒服的，特別係疫情底下就顯得更加方便衛生。        第一晚的中式晚餐，有杏仁糊做甜品。     第二日早餐，粥加餃子。                                   差唔多6點夠鐘食晚飯，因為點餐係前一日就要揀定，所以姐姐只是隨機派餐俾我食。望落都幾豐富，兩款肉兩個菜，又有湯同糖水，味道就清清地最緊要健康。疫情關係老公無得探病，所以佢就返屋企拿物資俾我。奶奶跟陪月姨姨吩咐煮左鱆魚肉餅飯同絲瓜湯俾我上奶，另外焗埋炒米茶同預備左薑水我洗手，真係覺得自己好幸福呀!                         去到8點又會派紙包奶同餅乾。之後姑娘會送BB入來俾媽媽試下喂母乳，但BB一係我身到好快就訓著左無咩點食。新手媽媽拿手唔成世，但姑娘同姐姐都好好，會教你點樣喂母乳抱Ｂ同埋換片。QE有位資深的授乳專家姑娘，佢專登入來講解教導我點樣按摩胸部同親喂BB。基本上之後係醫院嘅生活就係不斷咁擠個胸想有人奶喂呀Ｂ，奈何第一胎可能未有咁快上到奶，俾O仔啜極都無野食到 ╥﹏╥  唯用針筒吸Ｄ奶出來喂，但都係得好小。可能我無要求補奶粉，姑娘都無特別去喂，話ＢＢ有便便去到就無問題。最後去到第三日，我開始擔心餓親O仔！一得閒就係咁試擠奶，終於有返Ｄ成績，就轉用奶杯裝住Ｄ奶喂。最後，等埋個黃疸報告今日下午就可以帶埋呀Ｂ出院喇～(≧∇≦)家人係屋企都等到好心急!呵呵♪      包到實一實嘅O仔   下午茶     晚飯後茶點                                                     第三日早餐    第三日午餐，(自選)牛扒，甜品有香橙pancake，撞正端午節仲有糉食!                                                                 2020 QE產子記 (上) https://mamibuy.com.hk/talk/article/92361