係唔係個個懷孕既女人，都會情緒低落？ 我知道係因為荷爾蒙既問題，令到個人既情緒產生變化。但係真係有咁勁咩？ 冇野做後，我嘗試令自己忙啲，每日都搵野做，等自己冇多餘既時間亂諗野。但一到左夜晚，個種壞情緒就會黎探望我。 我唔想同屋企人講，係因為怕佢地擔心；但我又唔可以同老公講。佢每日收工返黎，就已經好支力，同埋佢要努力工作搵錢，壓力已經好大，我真係唔想再俾壓力佢。 所以一到左夜晚，佢一訓著左，我就遲遲都訓唔著，就會出廳坐，坐坐下我就會喊。我知我好似成日都情緒低落，我亦都好努力去嘗試變得開心同快樂啲，但有時真係好難，好無助。 有時個人會好矛盾，唔想令老公擔心，唔想令到佢有多餘既壓力；但我又好嬲佢唔多啲關心我。因為我試過無啦啦係度喊，佢就會問我：「做咩又喊丫？」佢地有時都唔會明白點解你既情緒會低落，又唔好好上網查下，搵下答案，淨係識問！ 有時我係度諗，有左小朋友，到底係我自己一個人既事？定係我地兩公婆既事？點解好似到最後，所有既野都係我自己一個受哂，冇人關心，冇人同我分擔！欲哭無淚⋯⋯