(舊blog搬屋,呢篇真係比較多人問)   睇新聞，見到有個bb 嘔完奶之後去咗做天使寶寶，個心即刻好唔舒服 無click 入去睇內文，無論點都係一場悲劇，無論邊個有問題，有無法律責任, 成個family已經受到懲罰, 每一個人都已經好傷好傷！   豆沙係嘔奶嘔得好勁的BB , 係佢住院時, 同出院後覆診，每次見醫生都會問關於嘔奶的問題。而我地自已都又不停上網睇資料，睇書去了解多啲嘔奶原因同情況. 豆沙由飲得奶 用胃喉開始就嘔奶, 訓箱時，餐餐奶之後都嘔，每次都要幫佢換床巾 最誇張有一次試過見住啲奶由針筒落胃喉，上番又落番，上番又落番幾次 我地當初第一次見到佢嘔到成床奶，即刻好緊張，走去問醫生，個醫生好冷靜咁問「 BB 係 lur 奶 定嘔奶 ？」   原來 嘔奶 都分唔同程度的嘔法 普通嘔奶: 又叫lur奶或者回奶，其實唔叫嘔，吐出嚟的份量唔算多，通常2-3啖，係口到自然慢慢咁流出嚟，或者掃風時urg 氣時連帶urg 埋出奶嚟   真正嘔奶: 又叫噴奶，有嘔的動作，係個胃到出嚟，噴射式口鼻到衝出嚟，份量較多   原來嘔奶係好普遍的情況，唔理 早產B 定 足月B 都會有呢個問題, 只係早產b 會吐奶的機會率比較高   吐奶的真正原因 BB吐奶其實係因為 佢食道同胃之間有一個幽門，初生BB ge 呢一個幽門未生得成熟，就好似一對門閂唔實咁，擋唔住啲奶倒流. 如果BB食得太飽，太用力郁、喊、扭計或者仰睡時，啲奶就好容易係個胃到沖開呢個幽門而倒流番出嚟。 講到尾係器官未生得成熟，係結構上的問題, 所以早產B吐奶的機會D大,係因為一般個幽門都未生得好.等到BB大大下就會改善。好似時間可以沖淡一切咁，時間亦可以改變好多野！   吐奶/嘔奶重點在於點處理 其實吐奶/嘔奶並唔可怕, 最多係洗衫換衫換床單再餵過, 其實最怕係大人唔識處理 以下有三大重點大人要注意:    1. 俾奶續到透唔到氣 吐奶定嘔奶都好，其實係最得人驚係BB俾自己嘔出嚟啲奶續到, 甚至上咗個鼻到 透唔到氣，怕佢窒息出意外.  如果遇著呀b勁吐奶，真係要每隔半個鐘就要望下佢. 豆沙B啱啱出院個時我地真係三個人，早午晚三更輪流睇住佢   2. 無奶到肚影響生長 飲幾多，嘔幾多，有出無入，無野到肚！如果bb嘔奶的情況嚴重到 每日唔夠濕片 或者 影響體重 無增長，就要搵醫生check 清楚, 係佢飲唔到定唔吸收   3.噴射式嘔奶, 器官有問題? 如果係一日2-3次噴射式嘔奶，甚至係口鼻噴出，有可能係口/ 呼吸/ 食道 /胃有問題 令到佢有吞嚥或消化困難，就一定要搵醫生check 清楚. 聽早產媽媽分享，醫生可以開啲 凝固劑 加落奶粉 或 人奶到 等啲奶杰啲，無咁易被BB嘔到出嚟   雖然講就好似講到結構性問題，只可以等時間過，等佢自己成熟，但豆沙沙的吐奶情況實在令人好崩潰！ 佢最高記錄一日因吐奶而要換8套衫，日日開兩機衫，3-40條紗巾都唔夠佢用！連豆沙媽媽都俾佢吐到一日換幾次衫. 仲要飲完奶吐，飲完一個鐘又吐，飲完個半鐘都仲吐. 真係佢吐奶吐到我怕怕.    豆沙爸爸同豆沙媽媽唔想DRY等咩都唔做, 所以不停地搵咗好多唔同方法去試下，希望幫助改善豆沙嘔奶的情況，有以下Tips 俾大家參考下：   1. 餵奶前掃風加按摩 飲奶前幫佢掃下風，有氣的話urg 晒出嚟先好飲 同埋可以按摩肚肚，呢樣好work, 有風會特別易嘔奶，豆沙通常按完摩放咗屁屁，之後個餐奶就嘔得少 如果個日喊得多，會特別多風，我地會按摩耐啲, 按摩手勢請自己上網參考, 我地係用 I Love U 手勢 （題外話: 喊得多就多風，多風就唔舒服，唔舒服又喊，喊又多風, 不斷無限loop.  所以按摩好緊要，喊又好，扭又好，唔舒服又好，吐奶又好，無便便又好，都可以靠按摩幫下, 放個屁屁就舒服D, 記得係飲奶前, 飲完奶奶飽飽唔會按摩 (你自己都唔會食飽去揼骨一樣) 落唔落油都無所謂,如果想落油可用BB油或BB專用按摩油）   2. 揀適合的奶咀 豆沙沙係醫院用過nuk 唔駛用力就有奶出，飲得好多好快，亦嘔得好多. 出院番到屋企用chuchubaby 就好少少，要用力先有奶出到，飲得慢啲，用pigeon 都ok 如果奶樽倒轉放就不停滴奶出嚟，一條線咁，就代表出得太快, 奶咀真係要夾bb, 有啲bb餓鬼咁飲得切就快出無問題，有啲bb長期飽水吞唔切就要慢出，有啲bb懶啜，唔識啜就要用大孔=唔駛用力啜的奶咀 另外有防脹氣奶樽，有朋友話work, 有朋友話照吐，豆沙就未試過 不過就算 同一個奶咀 都仲有得分size 同 可以自己開大個孔 仲有奶樽扭得緊啲就會出奶慢啲，鬆啲就會出奶快啲 餵奶就好似湊b 咁 不斷試 不斷try and error 去搵合適的方法，無計啦bb未識講佢想點呀嘛！ So far, chuchubaby 同 pigeon & pigeon 闊口都係大路受歡迎，大家可以試下   3. 奶量要注意，切勿over feed 如果bb吐奶，要留意佢吐出嚟的奶係好水水咁液體狀 = 未消化到 OR 有小小渣 流質狀 =消化緊/咗. 如果 好多時都係液體狀 就可能係飲得太多，飽到嘔，下餐要賞試減少少份量，寧願小食多餐，睇下情況有無改善 不過豆沙沙無論多啲少啲都係吐咁多，反而減咗奶就早咗喊奶, 我地就決定照俾番正常份量佢算. 減咗都無改善, 又唔夠飽,咁減嚟無意思   4. 切勿餵空氣 餵奶時要注意 頭一啖 要有奶入晒成個奶咀先放入BB口， 如果唔係佢就啜咗啲空氣 同樣最後一啖都係，見到就無，我地就會停手，以免佢啜到空氣   5. 餵奶中間停一停，掃一掃 BB飲得太急，又多風，又易續. 我地試過一餐奶分2-3次餵，中間停手掃風. 即係餵1/3 停手，掃幾下風，再餵1/3停手，掃幾下風，再餵埋剩低1/3. 中間掃風唔駛掃太耐，主要係俾佢回下氣，唔好一次過飲太急太多，掃唔掃到都繼續餵埋佢 樽餵，杯餵，埋身都一樣, 飲飲下, 中間停一停掃一掃再嚟！不過埋身相對地係會少啲風的! (無錯, 餵一餐奶係餵好耐)   6. 找到合適的掃風方法 無論點餵奶，都要掃風！樽餵，杯餵，埋身，胃喉，飲完奶我地都會掃風. D人話埋身唔駛掃, 其實係錯, 豆沙照有氣urg到出嚟. 豆沙就算係醫院用胃喉落奶都要掃風，係掃到佢urg氣的！ 掃風要掃到urg, 佢唔urg 都無計 掃風有幾種方法，大家可以試下邊一種啱你個bb. 掃風掃得好，吐奶都會吐小啲. 豆沙嚟講，抱佢坐係大肶，護住佢條頸， un 腳咁un 佢會易啲出風。原理就好似開氣水前，彈下罐底咁，等啲氣上晒面 （好似係，除非唔係） 另外，上膊頭拍都唔錯，不過豆沙爸爸試過俾佢吐到成背脊都係奶（你個曳豬！） https://www.fhs.gov.hk/tc_chi/mulit_med/000005.html 掃風方法   7. 飲完奶唔好即放低 飲完奶掃完風，唔好即刻放落床，嘗試打直抱 15-30min不等，等佢啲奶徹底落晒隔，會無咁易倒流番出嚟 通常頭先掃唔到風,我地會打直抱完再掃多一陣先放落床/搖椅   8. 床仔/搖椅斜斜地 飲完掃完抱完，放佢落床仔/搖椅訓覺，最好將床仔 斜斜地墊高bb的上半身跟頭，我地係床單或床辱下墊摺好的毛巾，就好似醫院nicu箱仔咁打斜， 原理就好似一個未扭得實蓋的氣水樽，斜斜地放的話漏的機會 會比平放 少（豆沙媽媽都唔係好明自己講咩） 但唔好用枕頭，好危險   9. 飲飽奶BB要側訓不仰睡 將BB打側訓 而唔係仰睡 可以減少嘔奶的情況，另外，側訓都可以大大減低BB俾自己吐出嚟的奶續到自己的機會，nicu 都會將bb側睡，另外一個原因係方便醫護人員遠距離已經睇到BB個情況  不過要注意唔好成日瞓同一邊，要經常換邊，否則好容易會變歪面，唔對稱，豆沙訓咗75日醫院，訓同一邊，塊面仔嚴重歪晒 BB開始識反身係另一個要注意的時期, 豆沙成日飲飽奶玩反身,反到自己吐奶 豆沙媽媽試過撈起反轉咗隻豆沙,跟住見到佢個身下面收埋咗一大攤奶, 無枕頭, 吐出嚟的奶量唔多,佢都仲透到氣, (不過一識反身枕頭就一定一定一定唔可以用)  對付識反身的吐奶怪,最好的方法係綁佢係搖椅!   10. 補奶唔補奶 如果BB嘔咗奶, 份量都多, 驚佢唔飽, 可以考慮下一餐早D餵. 如果想即時補奶俾佢, 都最少得15-30分鐘, 等BB透順條氣, 個胃仔口仔休息下先 (大人嘔完都唔會即刻食野啦)   11. 藥物幫肋 私家醫生有建議 如果豆沙有體重輕咗的話 就可能要俾佢食 去風水，早產媽媽谷都有講過 wind drop 同肥仔水，如果有需要，記得問下醫生 但咁細bb食藥始至終有啲擔心，而豆沙不停吐奶但又識重，所以我地都無試   如果做齊晒以上咁多樣 呀B 又夠濕片又無成日扭計 又重得好 但都係吐吐吐，咁可能真係要 認命 ... 俾啲時間佢身體慢慢長成熟, 等佢個幽門自己慢慢生埋   而豆沙沙做齊以上咁多樣，都叫有D改善，但都係時吐時唔吐，去到更正3-4月就吐少好多，而5-6個月到就風都唔駛掃了   豆沙媽媽有個表弟係足月B,都係吐奶吐到一歲，都肥肥白白，健康成長，而家女都生埋, 所以呢，有時真係要認命   (題外話) 豆沙媽媽唔記得係邊個媽媽谷有媽媽分享過 話醫生講 肚臍唔再突出嚟就代表肚肌肉同裡面開始成熟，就會吐小啲 豆沙媽媽無深究 呢樣野，但豆沙 吐少咗奶的同時 佢個肚臍又真係由突變平咗 大家如果知道係咪真記得同我講   (帶番個頭盔先) 以上內容係豆沙媽媽自己的經驗，睇書，上網睇資料，媽媽谷資料搜集 得出嚟，啱豆沙唔代表啱第二個BB 有疑問 最好番去問健康院或者醫生, 如果我有咩資料唔啱都記得同我講 豆沙媽媽唔係專家，唔係醫生，唔係護士，只係一個為咗個豆沙努力研究育兒資訊的半職早產媽媽，緊張大師練變身做佛系媽媽 現在進行式中！係育兒路上仍然艱辛奮鬥ing！火力全開 迎戰 難搞豆沙大怪獸！   又打到咁長, 其實想一開二但又懶,又唔知cut邊個位好... 所以又係好長一篇,希望幫到新手爸爸媽媽 (自己都覺得自己好長氣, 唉~ )    參考網頁: https://www.fhs.gov.hk/tc_chi/health_info/faq/child_health/CC1_3_1_5.html 為甚麼會吐奶呢？