暫下眼Sheldon b已經5個月，要趁我仲有印象，將當日嘅情況好好記低，如果唔係我應該好快會唔記得哂。(生完bb之後記憶力真係會愈嚟愈差） 話説我一早喺陀住Sheldon b嘅時侯，已經向助產士同事請教好一切，問定哂幾時入院好，因為好擔心疫情關係冇得聞止痛氣、冇得陪產，點知最後真係發生哂，因為我由入院到Sheldon b 出世用左一個鐘到冇。 仲記得喺37週個晚，已經有一兩下宮縮同背脊痛，但果時諗都冇諗過原來係bb準備出嚟嘅征兆，一嚟喺懷孕後期企得多行得多都會有一下半下宮縮肚痛，二嚟好多人都話第一胎通常冇咁早出世。 結果，到零晨3點幾去廁所嘅時侯，就發現見紅lu，於是即刻叫醒老公，商量完就決定入院。喺屋企執埋走佬袋，就決定call uber 入醫院。喺撘緊Uber 嘅時候，發覺每兩三分鐘就痛一次，已經心知不妙了。 到醫院嘅時候，已經差唔多04:45，入到去，老公就坐低登記資料，另一位姑娘就幫我度高磅重量血壓，然後再帶我去檢查房聽bb心跳、剃毛，然後就到內診，一檢查完，姑娘就同我講已開6、7，叫我唔駛老公去做COVID-19 測試(因為疫情關係如果要陪產的話，就要有72小時內嘅陰性 COVID-19 報告)，因為會趕唔切出報告唔好㗰錢。其實聽到果下真係好傷心，因為冇諗過喺生仔呢個咁重要嘅時侯，居然冇老公喺身邊陪伴。 大約5點鐘嘅時侯，就入產房喇，一入到產房換好衫後，我就要求要聞止痛氣，但因為未有COVID-19 報告，所以冇得聞止痛氣。之後就有姑娘幫我撩鼻做COVID-19 測試，然後再抽血同喺手背種豆。由於keep 住陣痛，我就話想打止痛針，但原來已經開6、7 係冇得打，因為怕bb出世時呼吸唔好，於是佢地只好比香氛我，放鬆我嘅心情，但效果唔大，一嚟已經好痛，二嚟隔住口罩聞根本就唔係點聞到。 入左產房大約10分鐘後，醫生就嚟到。醫生再檢查嘅時候，已經開9 lu，於是佢就幫我人工穿水，feel到一股暖水流出嚟感覺。跟住，醫生就幫我消毒下身，再打一支局部麻醉，減低一陣剪會陰嘅不適。然後，我就跟住助產士嘅指示，一feel到有痛嘅時侯，就用力push，同時醫生就剪左會陰，可能因為keep住有陣痛，所以剪果下冇乜太大感覺。之後再用力push多幾下，喺05:30 Sheldon b就出左嚟喇。當醫生剪完臍帶，姑娘清潔好，就抱過嚟比我睇。 我和Sheldon b嘅第一張合照   當你以為咁就完結，其實之後先係最辛苦嘅時刻。當姑娘幫我打左支子宮收縮針，就開始feel到強烈的宮縮，甚至比陣痛更痛。而同一時間，醫生亦縫緊傷口，雖然有再打局部麻醉，但依然feel到聯針嘅痛，所以我覺得生完嘅痛係比陣痛同生個下更辛苦。不過，當見到bb個下，真係會幾辛苦都值得。 古靈精怪，表情多多   而老公就只能喺產房門外等，等到bb出世後，就隔住箱仔睇。 之後我就同bb一齊喺產房等，等到COVID-19 報吿出左，姑娘先至比bb我埋身去餵奶，然後就我番產後房休息，bb喺育嬰室比姑娘照顧。正式開始成為媽媽嘅生活。   當日出世得2.65kg 嘅un豬仔 而家亦變成左一隻肥豬仔lu   想睇更多Sheldon b嘅相， 歡迎follow FB/IG : Sheldonbb_story