琴日約左表哥一齊去探索Legoland！ 作為Lego 既小粉絲一直好期待佢哋嚟香港㗎！ 因為呀媽之前去日本無時間去個邊既legoland， 知道香港開左緊係要去支持下啦！ 一入到去迷你天地就係大家熟悉嘅畫面， 用Lego砌左好多香港著名嘅地標， 真係唔敢想像點樣可以砌到出嚟。 呀媽即刻：嘩～～～～ 菠蘿包同表哥就好開心咁跑過去睇。     會有日頭同夜晚唔同既分別真係好靚！ 灣仔地鐵月台！勁真實！！！ 賽馬～～～邊隻馬會贏呢？ 之後我地就去左玩古堡歷險。 係玩射槍遊戲，都幾緊張刺激！ 低分到無眼睇。好明顯我哋唔係神槍手！ 城市歷奇： 係一個全場高放電既位！！ 爬高爬底又要避開障礙物。 不過如果有埋滑梯就更加好啦！ 放左一半電就去café到醫下肚仔。 其實價錢都唔太貴， 係主題樂園入邊算係抵！   有個好可愛既lego盒套餐價錢係$89。 一個Lego餐盒+一個冬甩+包裝飲品。 於是依兩個小朋友選擇困難症既時候喇！ 揀邊隻色好呢？   冬甩出名好甜，但係呢度既冬甩唔會好甜， 岩晒小朋友食！呢個餐盒已經比呀媽徵用左要黎野餐用！ 食完野表哥夠鐘參加創意工作坊（5歲以上先可以報名） 等緊表哥個陣帶菠蘿包去Lego池先。 記得一定一定一定要注意衛生除鞋同著襪呀！   魔法轉盤： 90cm高先可以玩～菠蘿包岩岩夠高多dd 。 大人表現愛既力量黎啦！ 旋轉期間要好似踩單車咁先會飛高d架！ 一停左就即刻降落！ 我地一共玩左3次累到頂唔順。 咁仲有男仔區女仔區 表哥起緊樓再測試下地震會唔會冧樓！ 有4D電影睇，不過菠蘿包唔鐘意戴眼鏡所以就無入去睇了！ 仲有一個bb區不過掛住玩唔記得左影相。 其他個d都係影相位。 總括來講其實都算唔錯， 職員哥哥姐姐好有禮貌，又會定時四周圍消毒， 又會係Lego池消毒 d Lego。 四圍都有部酒精搓手機。 地方其實唔係好大不過如果小朋友鍾意砌Lego， 平日人流唔多可以慢慢玩足一日。 玩完之後就有紀念商店，又到大出血嘅時候。 同表哥一人一個刻字鎖匙扣。         Legoland 門票：$240 @1 大小同價三歲以下免費 地址：k11 MUSEA地庫1樓B131-133號 網上購票：https://www.legolanddiscoverycentre.com/hong-kong/tickets-passes/